Julani

Lutani pa vo ve mukati

Nkhani 73: Fumu Yamampha Yakumaliya ya Yisraele

Nkhani 73: Fumu Yamampha Yakumaliya ya Yisraele

JOSIYA wangwamba kuwusa ufumu wakumwela wa mafuku ngaŵi nga Yisraele we ndi vyaka 8. Vyaka ivi vimana ukongwa kuti munthu waje fumu. Sonu pakwamba, ŵalaŵala anyaki ndiwu amuwovyanga kuwusa mtundu wa Yisraele.

Josiya wangwamba kupenja Yehova wati waja pa ufumu kwa vyaka 7. Iyu wangulondo mo nganguchitiya mafumu ngamampha nge: Davidi, Yehosafati ndi Hezekiya. Iyu weche mnyamata wanguchita chinthu chinyaki kwambula mantha.

Fumu Josiya ndi ŵanthu ŵaku atuswa angoza

Ayisraele anandi anguchita vinthu viheni kwanyengu yitali. Yiwu asopanga achiuta aboza ndi kugwadiya angoza. Sonu Josiya ndi ŵanthu ŵaki angwamba kutuzgamu angoza m’charu. Nchitu iyi yenga yikulu ukongwa chifukwa ŵanthu anandi asopanga achiuta aboza. Amuwoni Josiya ndi ŵanthu ŵaki wo atuswa angoza pachithuthuzi ichi.

Pavuli paki, Josiya wangusankha ŵanthu ŵatatu kuti awoneliyengi nchitu yakunozga nyumba yakusopiyamu yaku Yehova. Ŵanthu angusonkha ndalama ndipu anguzipereka ku ŵanthu wo agwiranga nchitu yakuzenga. Panyengu yo agwiranga nchitu m’nyumba yakusopiyamu iyi, Hilikiya mula wa asembi wangusaniya chinthu chinyaki chakukhumbika ukongwa. Iyu wangusaniya buku la malangu lakali lo Yehova wangukambiya Mosese kuti walembi. Buku ili lingusoŵa kwa vyaka vinandi.

Buku lo, anguluta nalu kwaku Josiya ndipu wangukambiya munthu kuti wamuŵerenge. Wati wavwa vo waŵerenganga, Josiya wanguwona kuti ŵanthu angutondeka kusunga malangu ngaku Yehova. Ivi vingumuchitiska chitima ukongwa ndipu wangukeruwa vakuvwala vaki nge mo uwone pachithuthuzi ichi. Iyu wanguti: ‘Yehova watikwiyiya ukongwa chifukwa apapi ŵidu akutondeka kusunga malangu ngo ngakulembeka m’buku ili.’

Hilikiya ndi Fumu Josiya

Josiya wangutuma mula wa asembi Hilikiya, kuti wafufuzi vo Yehova waŵachitiyengi. Hilikiya wanguluta kuchifumba kwaku Hulda, mchimi munthukazi. Iyu wangumukambiya uthenga wakutuliya kwaku Yehova kuti wakamukambiyi Josiya kuti: ‘Yerusalemu wabwangandulikengi ndipu ŵanthu wosi alangikengi chifukwa asopa achiuta aboza ndipu m’charu mwazaza vinthu viheni. Kweni chifukwa chakuti iwi Josiya, wachita vinthu vamampha, chilangu ichi chizengi pavuli pa nyifwa yaku.’

2 Mikoka 34:1-28.



Mafumbu

  • Kumbi Josiya wanguja fumu we ndi vyaka vilinga, nanga iyu wangwamba kuchitanji wati waja fumu kwa vyaka 7?
  • Kumbi Josiya wachitanji pachithuthuzi chakwamba?
  • Kumbi mula wa asembi wangusaniyanji po ŵanthu anozganga nyumba yakusopiyamu?
  • Nchifukwa wuli Josiya wakeluwa malaya ngaki?
  • Kumbi mbuthenga wuli wakutuliya kwaku Yehova wo mchimi munthukazi Hulda, wangukambiya Josiya?

Mafumbu ngakusazgiyapu

  • Ŵerenga 2 Mikoka 34:1-28.

    Kumbi Josiya walongo chakuwoniyapu wuli kwa ŵanthu wo atenele kuti angukunthiyapu masuzgu ngo akumananga nangu paunamana wawu? (2 Miko. 33:21-25; 34:1, 2; Sumu 27:10)

    Kumbi Josiya wanguchita vinthu wuli vakukhumbika ukongwa mu chaka cha muwusu waki cha nambala 8, 12 ndi 18 kuti walutiski panthazi kusopa kwauneneska? (2 Miko. 34:3, 8)

    Kumbi tisambiranji pa nkhani yakunozga malu ngakusopiyapu nge mo Fumu Josiya ndi Mura wa Sembi Hilikiya anguchitiya? (2 Miko. 34:9-13; Ntha. 11:14; 1 Ŵako. 10:31)