Julani

Lutani pa vo ve mukati

Nkhani 41: Njoka Yamkuŵa

Nkhani 41: Njoka Yamkuŵa
Mosese ndi njoka ya mkuŵa

KUMBI yo yazingikana mu chimiti ndi njoka chayiyu? Awa, ndi njoka chayiyu cha. Njoka yo yingupangika ndi mkuŵa. Yehova wangukambiya Mosese kuti wayizingi m’chimiti, kuti asani ŵanthu ayilereska aje ndi umoyu. Kweni zo ze pasi po ndizu njoka chayizu. Izu ziluma ŵanthu ndipu asani zaŵaluma atama. Kumbi wachiziŵa chifukwa chaki?

Nchifukwa chakuti Ayisraele akambanga vinthu viheni vakususka Chiuta ndi Mosese. Yiwu angudandawula kuti: ‘Nchifukwa wuli ungutituzga mu Egipiti kuti tizifwiyi munu m’chipululu? Munu mulivi chakurya ndi maji. Ndipu tavuka kurya mana yanga.’

Kweni mana ngenga chakurya chamampha. Yehova ndiyu wanguŵapaska chakurya ichi mwakuziziswa. Ndipu wanguŵapaska so maji mwakuziziswa. Kweni ŵanthu yaŵa awonganga cha kuti Chiuta waŵaphweriyanga. Ndichu chifukwa chaki Yehova wangutuma njoka zikali izi kuti walangi Ayisraele. Njoka zo zaŵalumanga ndipu anandi afwanga.

Ayisraele alumika ndi njoka

Pavuli paki ŵanthu angukambiya Mosese kuti: ‘Tananga chifukwa tasuskana ndi Yehova kweni so iwi. Sonu romba kwaku Yehova kuti watuzgepu njoka izi.’

Mwaviyo, Mosese wanguŵarombe ŵanthu. Sonu Yehova wangukambiya Mosese kuti wapangi njoka ya mkuŵa. Wangumukambiya kuti wayizingi mu chimiti, kuti weyosi yo walumika ndi njoka walereskengi njoka ya mkuŵa. Mosese wanguchita nadi venivo Chiuta wangumukambiya. Ndipu ŵanthu wo angulumika ndi njoka achiranga asani alereska njoka ya mkuŵa.

Pankhani iyi, titenere kusambirapu chinthu chinyaki. Taŵanthu tosi tiyanana ndi Ayisraele wo alumikanga ndi njoka. Ndipu tosi titufwa. Asani ungawona, usaniyengi kuti ŵanthu akota, atama ndipuso atufwa. Ichi nchifukwa chakuti Adamu ndi Eva angugarukiya Yehova ndipu isi tosi te ŵana ŵawu. Kweni Yehova wanozga nthowa yakuti tizije ndi umoyu wambula kumala.

Yehova wangutuma Mwana waki, Yesu Khristu kuti wazi pacharu chapasi. Yesu wangupayikika pa chimiti chifukwa chakuti ŵanthu anandi aŵanaŵananga kuti wenga muheni. Kweni Yehova wangupereka Yesu kuti wazitiwombo. Sonu asani tingalereska kwaku iyu ndi kumulondo, tazamuja ndi umoyu wambula kumala. Kweni kunthazi uku tisambirengi vinandi va nkhani iyi.

Maŵerengedu 21:4-9; Yohane 3:14, 15.



Mafumbu

  • Kumbi nchinthu wuli cho chazingika m’chimiti pachithuthuzi po, nanga nchifukwa wuli Yehova wangukambiya Mosese kuti wayiŵiki penipo?
  • Kumbi ŵanthu angulongo wuli kuleka kuwonga pa vinthu vosi vo Chiuta wanguŵachitiya?
  • Kumbi ŵanthu angupempha Mosese kuti wachitenji, Yehova wati watumiza njoka zikali kuti ziŵalangi?
  • Nanga nchifukwa wuli Yehova wangukambiya Mosese kuti wapangi njoka yamkuŵa?
  • Kumbi tingasambiranjipu pankhani iyi?

Mafumbu ngakusazgiyapu

  • Ŵerenga Maŵerengedu 21:4-9.

    Kumbi kudinginyika kwa Ayisraele pankhani ya chakurya cho Yehova waŵapaskanga, kutititcheŵeskanji? (Maŵe. 21:5, 6; Ŵaro. 2:4)

    Pati pajumpha vyaka vinandi, kumbi Ayisraele anguyigwiriskiya nchitu wuli njoka yamkuŵa, nanga Fumu Hezekiya yinguchitanji? (Maŵe. 21:9; 2 Ŵaka. 18:1-4)

  • Ŵerenga Yohane 3:14, 15.

    Kumbi kuŵikika kwa njoka yamkuŵa m’chimiti kumiya wuli kupayikika kwaku Yesu Khristu? (Ŵaga. 3:13; 1 Pet. 2:24)