Julani

Lutani pa vo ve mukati

 TICHITENGI VINTHU NGE AKHRISTU

Mo Tingasazgiyaku Lusu Lidu mu Uteŵeti—Mo Tingayambiya Kukambiskana ndi Munthu Kuti Timupharazgiyi

Mo Tingasazgiyaku Lusu Lidu mu Uteŵeti—Mo Tingayambiya Kukambiskana ndi Munthu Kuti Timupharazgiyi

Yesu wangumupharazgiya mwamwaŵi munthukazi wa ku Samariya chifukwa wangwamba ndiyu kukambiskana nayu munthukazi uyu. Kumbi tingachita wuli kuti tisazgiyeku lusu lidu pakwamba kukambiskana ndi ŵanthu wo tileka kuŵaziŵa?

  • Mukhumbika kuchita vinthu mwachanju kuti muyambi kukambiskana ndi ŵanthu. Chinanga kuti wanguvuka, Yesu wangwamba kupempha maji ngakumwa kuti wayambi kukambiskana nayu. Mwaviyo, mungayamba ndimwi kumutawuzga mwaulemu. Pavuli paki, mungakambiskana nayu vakukwaskana ndi mo kwachiya pa zuŵa lo, pamwenga nkhani yo yachitika waka sonu. Kumbukani kuti chilatu chinu ntchakuti mukambiskani nayu. Mwaviyo, mungakambiskana nayu nkhani yeyosi yo yingamukondwesa. Asani napu waleka kukumukani, kudandawula cha.Yesani so kukambiskana ndi munthu munyaki. Mupempheni Yehova kuti wakuwovyeni kuja achiganga.—Nehe. 2:4; Machi. 4:29.

  • Mukhumbika kuja masu kuti muyambi kumupharazgiya, kweni mungachitanga vinthu mwakuthawiriya cha. Munthu wangakondwa cha ndipuso wangakhumba cha kukambiskana namwi asani muchita nayu vinthu mwakumuchichiza. Kweni mungaguŵanga cha asani munthu waleka kukambiskana namwi mwechendamupharazgiyi. Asani muchita mantha kupharazga uthenga wamampha, yesani waka dankha kwamba kukambiskana ndi ŵanthu kwambula kuŵapharazgiya. [Wonesani ndi kukambiskana vo mwavwa mu vidiyo yakwamba.]

  • Yesesani kusaniya mpata kuti mupharazgiyi ŵanthu. Mungakamba fundu yinyaki yakukwaskana ndi vo mugomezga, yo yingachitiska munthu kuti wakufumbeni mafumbu. Venivi ndivu so Yesu wanguchita. Iyu wangukamba fundu yinyaki yo yinguchitiska kuti munthukazi yo wamufumbi mafumbu. Mwaviyo, mafumbu ngo munthukazi uyu wangufumba ngangumukika mu uthenga wamampha wo Yesu wangukonkhoska panyengu iyi. [Wonesani ndi kukambiskana vo mwavwa mu vidiyo yachiŵi. Pavuli paki, wonesani ndi kukambiskana vo mwavwa mu vidiyo yachitatu.]