Julani

Ulongozgi wa Unganu wa Umoyu Widu Wachikhristu Ndipuso Uteŵeti

Ulongozgi wa Unganu wa Umoyu Widu Wachikhristu Ndipuso Uteŵeti

Vo ve Mukati

 

Ndimi

Mazu Ngakwamba

 2

Chuma Chakutuliya mu Mazu Ngaku Chiuta

 3

Kusazgiyaku Lusu Lidu mu Uteŵeti

 4

Tichitengi Vinthu nge Akhristu

 5

Mazu Ngakumaliya

 6

Jiperekeni pa Kuŵerenga ndi Kusambiza

 7

Ulongozgi

 8

Kusunga Nyengu

 9

Asani Wakuwonere Dera Wacheze Mpingu

 10

Asani Mwe ndi Unganu Wadera pamwenga Wachigaŵa

 11

Sabata ya Chikumbusu

 12

Wakuwonere Unganu wa Umoyu Widu Wachikhristu Ndipuso Uteŵeti

 13

Cheyamani wa Unganu wa Umoyu Widu Wachikhristu Ndipuso Uteŵeti

 14

Wakukumaniska Ntchitu za Wupu wa Ŵara

 15

Wakovya Kupereka Ulongozgi

 16

Kilasi Lachiŵi

 17

Mavidiyo

 18

 1. Unganu wa Umoyu Widu Wachikhristu utenere kuchitika mwakukoliyana ndi ulongozgi uwu ndipuso Kabuku ka Unganu wa Umoyu Widu Wachikhristu Ndipuso Uteŵeti. Apharazgi wosi atenere kuchiskika kuti alembesi musukulu kuti apasikengi nkhani za akusambira. Ŵanthu anyaki wo awungana ndi mpingu nyengu zosi ndipu agwiriskiya ntchitu fundu za mu Bayibolu pa umoyu wawu, angalembesa kuti nawu apaskikengi nkhani.​—be-CN peji 282.

2. Mazu Ngakwamba: Maminiti 3 pamwenga kusikiya pasi. Sabata yeyosi, pavuli pa sumu ndi pempheru, cheyamani wa Unganu wa Umoyu Wachikhristu Ndipuso Uteŵeti wakonkhoskengi mwakudumuwa vo tisambirengi kweniso wafumbengi fumbu limoza kutuliya pa pepala la Kwamuka kwa Mafumbu Ngakuweliyamu.

 3. Chuma Chakutuliya mu Mazu Ngaku Chiuta:

  • Nkhani: Maminiti 10. Mutu wa nkhani kweniso fundu zikuluzikulu ziŵi pamwenga zitatu ziŵikika mu Kabuku ka Umoyu Wachikhristu Ndipuso Uteŵeti. Nkhani iyi yitenere kukambika ndi mura pamwenga muteŵeti wakovya wakwenere. Sabata yeyosi yo tiyambengi kusambira buku lasonu la mu Bayibolu tiwoneliyengi vidiyo. Wakukamba nkhani iyi wakambengi kukoliyana kwa vidiyo ndi mutu wa nkhani. Kweni watenere kuwonesesa kuti wakonkhoska so fundu za mu kabuku ka unganu. Asani nyengu yeche ŵaka watenere so kugwiriskiya ntchitu vithuzi ndipuso fundu za mu Malemba kuti ziwovyi kuvwisa vo tisambira.

  • Kufufuza Fundu Zakuzirwa za mu Bayibolu: Maminiti 8. Nkhani iyi nja mafumbu ndi kwamuka kweni yilivi mazu ngakwamba ndi ngakumaliya. Yitenere kukambika ndi mura pamwenga  mteŵeti wakovya wakwenere. Iyu watenere kugaŵa umampha nyengu kuti fundu zosi 4 za mu nkhani iyi zikonkhoskeki umampha mwakukoliyana ndi mpingu winu. Iyu watenere kuwonesesa kuti wafumba mafumbu ngosi pa nyengu yo wapaskika. Wangasankha so kuŵerenga malemba ngosi ngo ngalembeka pa mafumbu ngosi ngaŵi ngakwamba pamwenga cha. Wo apempheka kuti amuki, angajumphanga cha masekondi 30.

  • Kuŵerenga Bayibolu: Maminiti 4 pamwenga kusikiya pasi. Mubali ndiyu wakambengi nkhani iyi. Kweni watenere cha kukamba mazu ngakwamba pamwenga ngakumaliya. Cheyamani wa unganu watenere kuwovya akusambira kuti aŵerengi mwakulondo, mwakuvwika umampha, kwambula kugotagota, kudidimiza mazu mumalu ngakwenere, kusinthasintha mazu, kuma mumalu ngakwenere ndipuso kuŵerenga nge mo alongolore nyengu zosi.

  4. Kusazgiyaku Lusu Lidu mu Uteŵeti: Maminiti 15 pamwenga kusikiya pasi. Chigaŵa ichi chikunozgeka kuti chiwovyi munthu weyosi kuyesere vo wangachita mu uteŵeti ndipuso kusazgiyaku lusu laki pakupharazga ndi kusambiza. Abali ndi azichi wo apaskika nkhani pa chigaŵa ichi, atenere kukamba nkhani zawu kutuliya pa masachizgu nga mo tingakambiskiyana ndi ŵanthu, ngo nge papeji lakwamba la Kabuku ka Umoyu Wachikhristu Ndipuso Uteŵeti. Apharazgi angasankha kumupasa buku pamwenga kumulongo vidiyo yo ye pa chigaŵa chakuti Vidya vo Tigwiriskiya Ntchitu Pakusambiza. Mu Kabuku ka Umoyu Wachikhristu Ndipuso Uteŵeti mulembeka maminiti ngo wakusambira wangakambiya nkhani yaki. Ndipu nyengu zinyaki musanirikengi ulongozgi wo wangagwiriskiya ntchitu. Wo apaskika nkhani atenere cha kukamba fundu zakusazgiyaku kuti amalizi maminiti ngosi ngo apaskika. Asani wo akambengi nkhani anozgeke umampha, angakamba kwa miniti yimoza pamwenga kusikiya pasi. Nyengu zinyaki, ŵara nawu angapaskika nkhani za akusambira.

  • Mavidiyo nga mo Mungakambiskiyana ndi Ŵanthu: Mwezi wewosi tiwoneriyengi ndi kukambiskana mavidiyo nga mo tingakambiskiyana ndi ŵanthu. Mavidiyo ngenanga ngajengi nga ulendu wakwamba, ulendu wakuweriyaku wakwamba ndi ulendu wakuweriyaku wachiŵi. Cheyamani wa unganu wa Umoyu Wachikhristu Ndipuso Uteŵeti ndiyu wachitiskengi chigaŵa chenichi.

  • Ulendu Wakwamba: Nkhani iyi yingakambika ndi mubali pamwenga mzichi. Asani mubali ndiyu wapaskika nkhani iyi, mweneku wa nyumba waje so mubali pamwenga munthu munyaki wa mu banja laki. Ndipu asani yapaskika kwa mzichi, mweneku wa nyumba nayu waje so mzichi. Munthu yo wakamba nkhani ndipuso mweneku wa nyumba angaja pasi pamwenga kuma wima. Wakukamba nkhani wangasankha yija malonji mwakukoliyana ndi kuchigaŵa chinu. Pakukamba nkhani iyi, mugwiriskiyengi ntchitu masachizgu nga mo tingakambiskiyana ndi ŵanthu ngo nge papeji lakwamba la kabuku ka unganu.

  • Ulendu Wakuweliyaku Wakwamba: Nkhani iyi yingakambika ndi mubali pamwenga mzichi. Asani mubali ndiyu wapaskika nkhani iyi, mweneku wa nyumba waje so mubali pamwenga munthu munyaki wa mu banja laki. (km-CN 5/97 peji 2) Munthu yo wakamba nkhani ndipuso mweneku wa nyumba angaja pasi pamwenga kuma wima. Yo wakamba nkhani watenere kuyesere mo wangakambiskiyana ndi munthu yo wangumupharazgiya ulendu wakwamba. Pakukamba nkhani iyi, mugwiriskiyengi ntchitu masachizgu nga mo tingakambiskiyana ndi ŵanthu ngo nge papeji lakwamba la Kabuku ka Umoyu Wachikhristu Ndipuso Uteŵeti.

  • Ulendu Wakuweliyaku Wachiŵi: Nkhani iyi yingakambika ndi mubali pamwenga mzichi. Asani mubali ndiyu wapaskika nkhani iyi, mweneku wa nyumba waje so mubali pamwenga munthu munyaki wa mu banja laki. (km-CN 5/97 peji 2) Munthu yo wakamba nkhani ndipuso mweneku wa nyumba angaja pasi pamwenga kuma wima. Yo wakamba nkhani watenere kuyesere mo wangakambiskiyana ndi munthu yo wangumupharazgiya pa ulendu wakuweriyaku wakwamba. Pakukamba nkhani iyi, mugwiriskiyengi ntchitu masachizgu nga mo tingakambiskiyana ndi ŵanthu ngo nge papeji lakwamba la kabuku ka unganu.

  • Sambiru la Bayibolu: Nkhani iyi yingakambika ndi mubali pamwenga mzichi. Asani mubali ndiyu wapaskika nkhani iyi, mweneku wa nyumba waje so mubali pamwenga munthu munyaki  wa mu banja laki. (km-CN 5/97 peji 2) Munthu yo wakamba nkhani ndipuso mweneku wa nyumba angaja pasi pamwenga kuma wima. Nkhani iyi yilongongi sambiru la Bayibolu lo layamba kali kuchitika. Palivi chifukwa chakukambiya mazu ngakwamba pamwenga ngakumaliya, pijapija asani mutu wa mu kabuku ka Jiperekeni wo wakusambira wapaskika ukamba viyo. Nkhwakukhumbika cha kuŵerenga ndimi zosi zo mwapaskika pa nkhani yinu chinanga kuti nyengu zinyaki mungasankha kuchita viyo. Wakukamba nkhani watenere kulongo kuti we ndi lusu lakusambiza.

  • Nkhani: Nkhani iyi yikambikengi ndi mubali.

  5. Tichitengi Vinthu Nge Akhristu: Asani sumu yamala, paja nkhani yimoza pamwenga ziŵi kwa maminiti 15, zo zitovya akuvwisiya kuti agwiriskiyengi ntchitu vo asambira mu Mazu ngaku Chiuta. Asani palivi ulongozgi wakuti nkhani iyi yikambiki ndi mura pe, ndikuti yingakambika so ndi mteŵeti wakovya wakwenere. Kweni asani ndi nkhani yakovya mpingu, yitenere kukambika ndi mura pe.

  • Sambiru la Bayibolu la Mpingu: Maminiti 30. Mura wakwenere ndiyu watenere kuchitiska Sambiru la Bayibolu la Mpingu. (Asani mpingu we ndi ŵara amana, ateŵeti akovya akwenere angachitiska sambiru la Bayibolu la mpingu asani pangakhumbika nadi kuchita viyo.) Wupu wa ŵara utenere kusankha ŵara akwenere wo angachitiska Sambiru la Bayibolu la Mpingu. Ŵara wo asankhika atenere kuchitiska sambiru lenili mwalusu kuti aleki kurya nyengu, kukonkhoska malemba ngo nge ndi fundu zikulu kweniso kuwovya akuvwisiya kuti amukengi fundu zo zingawovya abali ndi azichi kuti azigwiriskiyengi ntchitu pa umoyu wawu. Abali wo asankhika kuti achitiskengi sambiru la Bayibolu, atenere kuŵerenga ndi kugwiriskiya ntchitu ulongozgi wa mo tingachitiskiya Sambiru la Chigongwi cha Alinda. Asani vingachitika, mungasankha abali akupambanapambana sabata yeyosi kuti achitiskengi ndi kuŵerenga pa Sambiru la Bayibolu la Mpingu. Asani cheyamani wa Unganu wa Umoyu Widu Wachikhristu wakamba kuti sambiru lichitiki mwakudumuwa, mubali yo wachitiska wangasankha yija mo wangachitiskiya. Iyu wangafumba waka mafumbu kwambula kuŵerenga ndimi zinyaki.

  6. Mazu Ngakumaliya: Maminiti 3 pamwenga kusikiya pasi. Cheyamani wa Unganu wa Umoyu Wachikhristu watenere kukamba mwakudumuwa fundu zakovya zo tasambira pa unganu, kusazgapu fumbu ndi kwamuka vo ve pa pepala la Kwamuka kwa Mafumbu Ngakuweliyamu. Iyu wangakamba so vo tazamusambira sabata yamawa, ndipu panyaki wangakamba so fumbu lo lazamumukika. Asani nyengu yeche ŵaka, wangazumbuwa mazina nga ŵanthu wo azamukamba nkhani sabata yamawa. Cheyamani ndiyu watenere kukamba vipharazgu ndipuso kuŵerenga makalata pa nyengu yo wakambiya mazu ngakumaliya. Vipharazgu va nyengu zosi vakukwaskana ndi kupharazga ndipuso kutowesa Nyumba ya Ufumu, vingapharazgikanga cha kweni viŵikikengi pa bolodi la mpingu. Asani cheyamani wawona kuti wafiskengi cha kukamba vipharazgu pamwenga kuŵerenga makalata pa nyengu yo wakambiya mazu ngakumaliya, wangapempha wo akambengi nkhani pa chigaŵa chakuti Tichitengi Vinthu Nge Akhristu kuti ayesesi kukamba nkhani zawu mwakudumuwa. (Wonani  ndimi 5 ndi  9.) Maunganu ngatenere kumala ndi sumu ndipuso pempheru.

 7. Jiperekeni pa Kuŵerenga ndi Kusambiza: Kwambiya sabata ya 7 January 2019, cheyamani wa Unganu wa Umoyu Wachikhristu Ndipuso Uteŵeti, wazamuyamba kugwiriskiya ntchitu kabuku ka Jiperekeni. Kabuku yaka wazakukagwiriskiya ntchitu pakuwonga ndi kupereka ulongozgi. Weyosi yo wapaskika nkhani watenere kugwiriskiya ntchitu sambiru lo lija kukumaliya kwa nkhani yo wapaskika mu Kabuku ka Umoyu Wachikhristu Ndipuso Uteŵeti. Sabata yeyosi ya kukwamba kwa mwezi, cheyamani wa Unganu wa Umoyu Wachikhristu Ndipuso Uteŵeti, wakambiskanengi ndi akuvwisiya sambiru limoza la mu kabuku ka Jiperekeni. Wo apaskika nkhani ndiwu atenere kugwiriskiya ntchitu chigaŵa chakuti “Lembani Mo Mulutiya Panthazi,” ndipu cheyamani watenere cha kuchongapu.

  8. Ulongozgi: Kwa miniti yimoza, cheyamani wa Unganu wa Umoyu Widu Wachikhristu Ndipuso Uteŵeti wakhumbika kupereka ulongozgi kweniso kuwonga wakusambira weyosi asani wamaliza kukamba nkhani yaki mwakugwiriskiya ntchitu kabuku ka Jiperekeni. Asani cheyamani wadana wakusambira kuti  wakambi nkhani, wangakambanga cha sambiru lo wagwiriskiyengi ntchitu pakukamba nkhani yaki. Kweni asani wamaliza kukamba nkhani yaki ndipuso asani wamuwonga, cheyamani wangakamba sambiru lo wakusambira wagwiriskiya ntchitu. Ndipuso wakambi chifukwa cho wakambiya kuti wachita umampha pamwenga wangakamba mwaulemu chifukwa cho wakusambira wakhumbikiya kugwiriyapu ntchitu pa ulongozgi wo wangupaskika. Cheyamani wangakamba so vinthu vinyaki vo wakusambira wachita umampha mu nkhani yaki asani wawona kuti vingawovya wakusambira pamwenga akuvwisiya. Asani cheyamani wawona kuti wakusambira wakhumbika kupaskika ulongozgi wakusazgiyapu wa mu kabuku ka Jiperekeni pamwenga wa mu buku la Sukulu ya Utumiki, watenere kumukambiya pakuyija mwaulemu asani maunganu ngamala pamwenga nyengu yinyaki. Wangamupaska ulongozgi kutuliya pa sambiru lo wangupaskika pamwenga sambiru linyaki.—Kuti muziŵi vinandi va udindu wa mubali yo wawonere Unganu wa Umoyu Wachikhristu Ndipuso Uteŵeti kweniso udindu wa mubali wakovya kupereka ulongozgi, wonani  ndimi 13 ndi  16.

    9. Kusunga Nyengu: Wakukamba nkhani weyosi kweniso cheyamani wa Unganu wa Umoyu Wachikhristu Ndipuso Uteŵeti, atenere cha kurya nyengu. Wakusambira wakhumbika kumudumuliza nkhani yaki mwazeru asani nyengu yaki yamala. Asani akukamba nkhani anyaki arya nyengu, wakovya kupereka ulongozgi wakhumbika kuŵawovya pakuŵija. Unganu wosi kusazgiyapu sumu ndi pempheru, uchitikengi kwa ora limoza ndi maminiti 45.

 10. Asani Wakuwonere Dera Wacheze Mpingu: Asani wakuwonere dera wacheze mpingu winu, maunganu ngachitikengi mwakulondo ndondomeku ya mu Kabuku ka Umoyu Wachikhristu Ndipuso Uteŵeti. Kweni wakuwonere dera wakambengi nkhani ya uteŵeti ya maminiti 30 mumalu mwa Sambiru la Bayibolu la Mpingu. Nkhani ya uteŵeti yechendayambi, cheyamani wa Unganu wa Umoyu Wachikhristu Ndipuso Uteŵeti wakonkhoskengi mwakudumuwa fundu zo tasambira, vo tazamusambira sabata yamawa, vipharazgu asani vilipu kweniso kuŵerenga makalata. Ndipu pavuli paki wangadana wakuwonere dera. Asani wakuwonere dera wamaliza nkhani yaki, maunganu ngatenere kumala ndi sumu yo wasankha. Kilasi lachiŵi la mu chineneru cha mpingu wo litenere cha kuchitika pa sabata yo wakuwonere dera wacheze mpingu. Kweni kagulu ka chineneru chinyaki katenere kuchita maunganu ngosi chinanga mphanyengu yo wakuwonere dera wacheze mpingu wo uwonere kagulu keniko. Kweni kagulu ko pamoza ndi mpingu wosi katenere kuvwisiya nkhani ya uteŵeti ya wakuwonere dera.

 11. Asani Mwe ndi Unganu Wadera pamwenga Wachigaŵa: Mungachitanga cha maunganu nga mpingu asani mwe ndi unganu wadera pamwenga wachigaŵa. Weyosi wangasambira nkhani za sabata yo pakuyija pamwenga pakusopa kwa pabanja.

 12. Sabata ya Chikumbusu: Asani mupanga maunganu mukati mwa sabata ndipuso asani Chikumbusu chichitikengi so mukati mwa sabata, mungachitanga cha Unganu wa Umoyu Widu Wachikhristu Ndipuso Uteŵeti. Kweni mungachita unganu wakunozgeke upharazgi pa zuŵa la Chikumbusu.

  13. Wakuwonere Unganu wa Umoyu Widu Wachikhristu Ndipuso Uteŵeti: Wupu wa ŵara utenere kusankha mura yo wajengi wakuwonere Unganu wa Umoyu Widu Wachikhristu Ndipuso Uteŵeti. Iyu wakhumbika kuwonesesa kuti unganu uwu uchitika mwandondomeku kweniso mwakukoliyana ndi ulongozgi uwu. Watenere kukambiskana kaŵikaŵi ndi wakovya kupereka ulongozgi. Asani Kabuku ka Umoyu Wachikhristu Ndipuso Uteŵeti kaza waka, wakuwonere Unganu wa Umoyu Wachikhristu Ndipuso Uteŵeti watenere kugaŵiya limu nkhani za mwezi wo. (Wonani  ndimi 4.) Asani kwaja masabata ngatatu kuti munthu wakambi nkhani, wakuwonere watenere kugaŵa nkhani mwakugwiriskiya ntchitu Fomu Yakugaŵiya Nkhani za Unganu wa Umoyu Widu Wachikhristu Ndipuso Uteŵeti (S-89).

 14. Cheyamani wa Unganu wa Umoyu Widu Wachikhristu Ndipuso Uteŵeti: Sabata yeyosi, mura yumoza watenere kuja cheyamani wa Unganu wa Umoyu Widu Wachikhristu Ndipuso Uteŵeti. (Asani mpingu we ndi ŵara amana, mungagwiriskiya ntchitu ateŵeti akovya akwenere.) Cheyamani ndiyu wakambengi  mazu ngakwamba ndi ngakumaliya ndipuso kukambiskana vidiyo yeyosi yo yilongo mo tingakambiskiyana ndi ŵanthu kweniso vidiyo yo yikonkhoska sambiru la mu kabuku ka Jiperekeni. Iyu ndiyu wadanengi wakukamba nkhani weyosi ndipu wangakamba so nkhani zinyaki asani ŵara mbamana. Wangakambanga mazu nganandi cha asani tituwa pa chigaŵa chinyaki kuluta pa chigaŵa chinyaki. Wupu wa ŵara ndiwu usankhengi ŵara akwenere wo angaja macheyamani. Ŵara wo asankhika akhumbika kusinthana pakuchita ucheyamani sabata yeyosi. Mwakukoliyana ndi mo vinthu viliri mu mpingu winu, wakuwonere Unganu wa Umoyu Wachikhristu Ndipuso Uteŵeti wangagwiriskikiya ntchitu nge cheyamani pafupipafupi kuphara ŵara anyaki. Asani mura wakuzomerezeka kuti wachitiskengi Sambiru la Bayibolu la Mpingu ndikuti wangaja so cheyamani wa unganu uwu. Kweni ziŵani kuti mura yo wajengi cheyamani wakhumbika kuwonga kweniso kupereka ulongozgi mwachanju kwa abali pamwenga azichi wo apaskika nkhani za akusambira. Cheyamani wakhumbika so kuwonesesa kuti unganu wamala pa nyengu yaki. (Wonani  ndimi 6 ndi  9.) Asani cheyamani wangayanja kweniso asani pa pulatifomu pe malu ngakukwana, mayikulofoni yinyaki yingamikika pamphepeti pa pulatifomu kuti wayigwiriskiyengi ntchitu pakudana wakukamba nkhani weyosi. Ndipu yo wakambengi nkhani watenere kuma pa mayikulofoni yinyaki. Kweniso, asani cheyamani wangayanja, wangaja ku pulatifomu ndi thebulu laki pa nyengu yo wakusambira waŵerenga Bayibolu kweniso asani akamba nkhani pa chigaŵa cha Kusazgiyaku Lusu Lidu mu Uteŵeti. Ivi vingawovya kuti asungi nyengu.

 15. Wakukumaniska Ntchitu za Wupu wa Ŵara: Iyu ndiyu wagaŵa nkhani zosi kupatuwaku nkhani za akusambira. Ivi visazgapu kusankha yo wajengi cheyamani sabata yeyosi ndipu wasankha mura yumoza pa ŵara wo akusankhika ndi wupu. Wakukumaniska ntchitu za wupu wa ŵara kweniso wakuwonere Unganu wa Umoyu Widu Wachikhristu Ndipuso Uteŵeti, atenere kuwonesesa kuti ndondomeku ya maunganu yaŵikika pa bolodi la mpingu.

  16. Wakovya Kupereka Ulongozgi: Asani vingachitika, mura yo wakamba umampha nkhani ndiyu watenere kuja wakovya kupereka ulongozgi. Iyu wakhumbika kupaska munthu ulongozgi kwakuyija asani mphakwenere. Wangapereka ulongozgi ku mteŵeti wakovya pamwenga mura pa nkhani yeyosi yo wangakamba nge, nkhani za Unganu wa Umoyu Wachikhristu Ndipuso Uteŵeti, nkhani zachisanisani, kuchitiska pamwenga kuŵerenga Chigongwi cha Alinda ndi Sambiru la Bayibolu la Mpingu. (Wonani  ndimi 9.) Asani mpingu winu we ndi ŵara anandi wo akamba nkhani ndi kusambiza umampha, mutenere kusintha wakovya kupereka ulongozgi chaka chechosi. Iyu watenere cha kupereka ulongozgi pa nkhani yeyosi yo abali akamba, kweni wangachita viyo pijapija asani wawona kuti mphakwenere nadi.

 17. Kilasi Lachiŵi: Mpingu ungaja ndi kilasi lachiŵi asani ŵanthu wo alembesa mu sukulu mbanandi. Vingaja umampha kuti kilasi lelosi lije ndi mura wakwenere wakovya kupereka ulongozgi. Asani mphakwenere, mteŵeti wakovya wakwenere wangaja wakupereka ulongozgi. Wupu wa ŵara ndiwu utenere kusankha yo wangaja wakupereka ulongozgi ndipuso ukhumbika kuwona asani pangakhumbika kusinthasintha. Wakupereka ulongozgi watenere kulondo fundu zo ze mu  ndimi 8. Asani muŵengi ndi makilasi nganyaki, mukhumbika kupempha akusambira kuti aluti ku makilasi ngawu pavuli pa nkhani ya Kufufuza Fundu Zakuzirwa za mu Bayibolu. Asani chigaŵa chakuti Kusazgiyaku Lusu Lidu mu Uteŵeti chamala, atenere kuwere mu Nyumba ya Ufumu. Ndipu asani mukambiskana vidiyo ya mo tingakambiskiyana ndi ŵanthu, abali ndi azichi wo ŵe mu kilasi lachiŵi akhumbika kuvwisiya ŵe ku kilasi lawu asani vingachitika. Asani ivi vingachitika cha, wakovya kupereka ulongozgi ku kilasi lachiŵi, wawonesi ndi kukambiskana vidiyo mwakugwiriskiya ntchitu foni, tabuleti pamwenga laputopu.

 18. Mavidiyo: Mavidiyo ngo ngasankhika ndingu tiwoneriyengi pa unganu wenuwu. Mavidiyo yanga ngasanirikengi pa JW Library ndipu mungapanga dawunilodi pa vipangizu vakupambanapambana. Nyengu zinyaki, mungawonere mavidiyo nga mo tingakambiskiyana ndi ŵanthu, pa unganu wakunozgeke uteŵeti wakumunda asani ngawoneseka kali pa Unganu wa Umoyu Wachikhristu Ndipuso Uteŵeti.