Kalata Yaku Yuda 1:1-25
1 Ini Yuda kapolu waku Yesu Khristu, kweniso mvurwa waku Yakobe,+ ndilembe akudanika,+ wo atanjika ndi Chiuta, Ada ndipuso wo asungikiya Yesu Khristu kuti:+
2 Lisungu, chimangu ndipuso chanju visazgikiyeku kwaku yimwi.
3 Akwanjiwa, chinanga kuti ndinguyesesa kukulembiyani vakukwaskana ndi utaski wo tosi te nawu,+ ndawona kuti nkhwakwenere kukuchiskani kuti muyesesi kufwiyapu kuti muvikiliyi chivwanu+ cho chikuperekeka kwa akupaturika kamoza pe mbwenu mpaka muyaya.
4 Ndakamba ivi chifukwa ŵanthu anyaki wo Malemba ngakukambiya limu kuti Chiuta wazakuŵayeruzga, asere pakati pinu mwachisisi. Ŵanthu ŵenaŵa atopa Chiuta cha ndipu asaniriyapu mwaŵi pa wezi ukulu waku Chiuta widu kuti achitengi jalidu liheni mwambula soni*+ ndipuso akana yo wakutigula kweniso Mbuyafwi, Yesu Khristu.+
5 Chinanga kuti mutiviziŵa umampha vosi ivi, kweni ndikhumba kukukumbusani kuti Yehova* wati wataska ŵanthu ŵaki mucharu cha Ijipiti,+ pavuli paki wangunanga ŵanthu wo ŵengavi chivwanu.+
6 Ndipu angelu wo anguleka kusunga malu ngawu ngakwamba, kweni akusiya malu ngawu ngakwenere ngo ajangaku,+ wakuŵamanga ndi simbi ndi kuŵajaliya kwamuyaya mu mdima wakuti bii* kuti aziyeruzgiki pa zuŵa likulu.+
7 Mwakuyanana ŵaka, ŵanthu a ku Sodomu ndi Gomora kweniso ŵanthu a mumatawuni ngo ngenga pafupi nawu, achitanga ureŵi* mwakujumphisa ndipu afiskanga makhumbiru ngawu ngaheni mu nthowa yachilendu.+ Yiwu akulonde cheruzgu cha motu wamuyaya ndipu ŵe nge chakuwoniyapu chakutitcheŵeska.+
8 Chinanga kuti ve viyo, ŵanthu yaŵa nawu atanja kulota malotu, afipiska liŵavu,* adelera ŵanthu wo ŵe ndi mazaza ndipuso anyoza ŵanthu aunkhankhu.+
9 Kweni Mikayeli,+ mura wa angelu+ wati wapambana maŵanaŵanu ndi Dyaboli kweniso kupindana nayu pa nkhani yakukwaskana ndi thupi laku Mozesi,+ wangumuyeruzga cha pamwenga kumunyoza,+ kweni wangukamba kuti: “Yehova* wakuchenyi.”+
10 Kweni ŵanthu yaŵa alongoro mwakunyoza vinthu vosi vo aleka kuvivwisa.+ Ndipu atijinanga ndi vinthu vosi vo ativivwisa mwakawi, nge vinyama vo viŵanaŵana cha.+
11 Soka kwaku yiwu, chifukwa chakuti alondo nthowa yaku Kayini+ ndipu atchimbiriya mu nthowa yakulandizga yaku Balamu+ kuti asaniyi mphotu, ndipuso ataya maumoyu ngawu chifukwa cha kulongoro mwakugaruka+ nge mo wanguchitiya Kora!+
12 Yiwu ŵe nge mya yakubisika pasi pa maji asani aturya namwi pa maphwandu nginu ngakulongo kuti mutanjana;+ mbaliska wo atijiliska kwambula mantha,+ ŵe nge mitambu yambula maji yo yipingikapingika ndi mphepu;+ ŵe nge vimiti vo vileka kupasa pa nyengu yaki, vo vafwiya limu* ndipu vachesulika.
13 Yiwu ndi mayiŵa ngakofya nga munyanja ngo ngachita phovu la vinthu vawu vakuchitiska soni,+ ŵe nge nyenyezi zo zalanda ndipu azamuŵikika mu mdima wakuti bii* kwamuyaya.+
14 Kweniso Enoki+ wamugonezi wa 7 kutuliya paku Adamu, wangukambiya limu vakukwaskana ndi yiwu kuti: “Awonani! Yehova* wanguza ndi masawuzandi nganandi nga akupaturika ŵaki+
15 kuti waziyeruzgi ŵanthu wosi+ ndi kuŵasaniya ndi mulandu wosi wo aleka kopa Chiuta chifukwa cha vinthu vosi viheni vo anguchita mwambula kopa Chiuta, kweniso chifukwa cha vinthu vosi viheni vo ŵanthu akubuda amukambanga.”+
16 Ŵanthu ŵenaŵa atanja kudinginyika+ kweniso kudandawula vakukwaskana ndi umoyu wawu, alondo makhumbiru ngawu+ ndipu alongoro mwakujikuzga ukongwa, alumba ŵanthu ndi chilatu chakuti asaniriyepu kanthu kanyaki.+
17 Kweni yimwi akwanjiwa, kumbukani vo vikukambika kali* ndi akutumika ŵa Ambuyafwi Yesu Khristu.
18 Yiwu ayanjanga kukukambiyani kuti: “Mu mazuŵa ngakumaliya kwazamukuŵa ŵanthu akunyoza, wo azamuchitanga vinthu vakunyoza Chiuta mwakulondo makhumbiru ngawu.”+
19 Ŵanthu yaŵa ndiwu agawuska ŵanthu,+ mbanthu wo achita vinthu nge vinyama* ndipu alivi mzimu waku Chiuta.
20 Kweni yimwi akwanjiwa, jizengeni pa chivwanu chinu chakupaturika ukongwa ndipu mupempherengi mwakukoliyana ndi mzimu wakupaturika,*+
21 kuti muchitengi vinthu vo vingawovya kuti Chiuta walutirizgi kukuyanjani,+ muchilindizga lisungu la Ambuyafwi Yesu Khristu kuti muzilonde umoyu wamuyaya.+
22 Kweniso lutirizgani kuŵalongo lisungu+ ŵanthu wo akayikakayika;+
23 ataskeni+ mwakuŵakwamphuwa pamotu. Kweni lutirizgani kuchitiya lisungu ŵanthu ndipu muchitengi viyo mwakuphwere, mutinkhengi so vakuvwala vawu vo vabikiliya ndi ntchitu zawu ziheni.+
24 Sonu, kwaku Chiuta yo wangakuvikiliyani kuti muleki kuguŵa kweniso yo wangakuwovyani kuti muje ambula kalema+ pa masu pa unkhankhu waki* kweniso kuti musaniyi likondwa likulu,
25 kwaku Chiuta yija Mtaski widu kuporote mwaku Yesu Khristu Ambuyafwi, kuŵi unkhankhu, thumbiku, nthazi ndipuso mazaza, kutuwa muyaya, kufika sonu kweniso mpaka muyaya. Ame.
Mazu Ngam'mphata
^ Mu Chigiriki, a·sel′gei·a. Wonani Mazu ngo Ngakonkhoskeka.
^ Wonani Fundu Zakukumaliya A5.
^ Pamwenga kuti, “mu mdima wamunkhorwi.”
^ Wonani Mazu ngo Ngakonkhoskeka.
^ Kung’anamuwa maliŵavu ngawu kweniso nga anyawu.
^ Wonani Fundu Zakukumaliya A5.
^ Mazu ngaki chayingu, “vafwa kaŵi.”
^ Pamwenga kuti, “mu mdima wamunkhorwi.”
^ Wonani Fundu Zakukumaliya A5.
^ Pamwenga kuti, “vo vikukambikiya limu.”
^ Pamwenga kuti, “mbanthu akuliŵavu.”
^ Mazu ngaki chayingu, “mzimu.”
^ Pamwenga kuti, “pakuwoneke kwaki mu unkhankhu.”
