Yoswa 9:1-27

  • Agibiyoni akuchenje apempha chimangu (1-15)

  • Uryarya wa Agibiyoni uziŵika (16-21)

  • Agibiyoni adeŵengi nkhuni ndi kuneŵa maji (22-27)

9  Mafumu ngosi ngo ngenga kuzambwi* kwa Msinji wa Yorodani+ kung’anamuwa kuchigaŵa cha mapiri, ku Shefela, mumphepeti mwa Nyanja Yikulu,*+ ndipuso kumasu kwa Lebanoni, ngo ngenga mafumu nga Ahiti, Aamori, Akanani, Aperezi, Ahivi ndi Ayebusi,+ ngati ngavwa vo vinguchitika,  ngangukoliyana kuti ngachiti nkhondu ndi Yoswa kweniso Ayisirayeli.+  Ŵanthu wo ajanga ku Gibiyoni,+ nawu so anguvwa vo Yoswa wanguchitiya Yeriko+ ndi Ai.+  Yiwu anguchita vinthu mwakuchenje, angupanganya vakurya mumasaka ngakumala ndi kuviŵika pa abulu ndipuso anguŵika vinyu mumathumba ngachikopa ngakuphumuka ngo angungagambika;  yiwu anguvwala so sapatu zakugambikagambika kweniso malaya ngakumala. Viŵandi vosi vo angupinga venga vakumira ndipuso vakumukutuka.  Pavuli paki, anguluta kwaku Yoswa kumsasa ku Giligala,+ ndipu angukambiya Yoswa ndi anthulumi a ku Isirayeli kuti: “Tatuwa kucharu chakutali ukongwa. Sonu muchiti nasi phanganu.”  Kweni anthulumi a ku Isirayeli angukambiya Ahivi+ wo kuti: “Panyaki muja nasi pafupi. Sonu tingachita namwi wuli phanganu?”+  Yiwu angumuka Yoswa kuti: “Te ateŵeti* ŵinu.” Pavuli paki Yoswa wanguŵakambiya kuti: “Ndimwi ayani, ndipu mwatuwa pani?”  Yiwu angumuka kuti: “Isi ateŵeti ŵinu tatuwa kucharu chakutali ukongwa+ chifukwa cha zina laku Yehova Chiuta winu, pakuti tikuvwa mbiri yaki kweniso vosi vo wakuchita ku Ijipiti.+ 10  Tikuvwa so vosi vo wakuchitiya mafumu ngaŵi nga Aamori ngo ngenga kusirya* kwa Yorodani, Fumu Sihoni+ ya Heshiboni ndi Fumu Ogi+ ya Bashani yo yajanga ku Ashitaroti. 11  Sonu ŵara ŵidu ndipuso ŵanthu wosi a mucharu chidu angutikambiya kuti, ‘Toni chakurya cha pa ulendu, ndipu muluti mukakumani nawu. Mukaŵakambiyi kuti: “Tiŵengi ateŵeti ŵinu;+ sonu muchiti nasi phanganu.”’+ 12  Viŵandi ivi vo tingupinga nge chakurya cha pa ulendu, venga vakufunda pa zuŵa lo tasokiyanga munyumba zidu kuza kunu. Kweni sonu awonani, vamira ndipuso vimukutuka ŵaka.+ 13  Mathumba ngachikopa yanga nangu ngenga ngafya po taŵikangamu vinyu, kweni sonu ngaphumuka.+ Vakuvwala vidu ndi sapatu zidu navu vakeruka chifukwa cha utali wa ulendu.” 14  Ŵati avwa ivi, anthulumi a ku Isirayeli anguto* vakurya va ŵanthu wo, kweni angufumba cha ulongozgi kwaku Yehova.+ 15  Sonu Yoswa wangupangana nawu chimangu+ ndipuso wanguchita nawu phanganu kuti abayikengi cha, ndipu alongozgi a ŵanthu* nawu so anguŵalapizgiya.+ 16  Pati pajumpha mazuŵa ngatatu, ŵati achita nawu kali phanganu, Ayisirayeli anguvwa kuti ŵanthu wo anguchita nawu phanganu ajanga nawu pafupi, muchigaŵa chenicho. 17  Pavuli paki, Ayisirayeli angusoka ndi kuluta kumatawuni nga ŵanthu wo pa zuŵa lachitatu; matawuni ngawu ngenga Gibiyoni,+ Kefira, Beroti ndi Kiriyati-yearimu.+ 18  Kweni Ayisirayeli anguŵayukiya cha, chifukwa alongozgi a ŵanthu anguŵalapizgiya mu zina laku Yehova+ Chiuta waku Isirayeli. Mwaviyo ŵanthu wosi angwamba kudinginyika mwakususkana ndi alongozgi. 19  Alongozgi angukambiya ŵanthu wosi kuti: “Pakuti tikuŵalapizgiya mu zina laku Yehova Chiuta waku Isirayeli, tizomerezeka cha kuŵapweteka. 20  Ivi ndivu tichitengi: Chifukwa chakuti tikuŵalapizgiya, tiŵasiyengi amoyu kuti Chiuta waleki kutikwiyiya.”+ 21  Alongozgi angukamba so kuti: “Tiŵaleki ndi umoyu, kweni ajengi akudeŵa nkhuni kweniso akuneŵa maji nga Ayisirayeli wosi.” Venivi ndivu alongozgi angulayizga Agibiyoni. 22  Sonu Yoswa wanguŵadana ndi kuŵafumba kuti: “Ntchifukwa wuli mungutipusisa mwakukamba kuti, ‘Tatuwa kucharu chakutali ukongwa ndi yimwi,’ penipo muja pakati pidu?+ 23  Kutuwa sonu ndimwi akutembeka,+ ndipu nyengu zosi mujengi akapolu akudeŵa nkhuni ndi kuneŵa maji nga panyumba yaku Chiuta wangu.” 24  Yiwu angumuka Yoswa kuti: “Tinguchita viyo pakuti tikuvwa uneneska wosi kuti Yehova Chiuta winu wangulamula Mozesi mteŵeti waki kuti wakupaskeni charu chosi ndipuso kuti wabayi ŵanthu wosi a mucharu ichi yimwi muchiwona.+ Mwaviyo tinguchita mantha kuti mungatibaya+ lekani tinguchita viyo.+ 25  Sonu te mu manja mwinu. Muchiti nasi chechosi cho yimwi muwona kuti ntchamampha ndipuso ntchakwenere.” 26  Ndipu venivi ndivu wanguŵachitiya; wanguŵataska mu manja mwa Ayisirayeli ndipu anguŵabaya cha. 27  Kweni pa zuŵa lenili, Yoswa wanguŵasambusa akudeŵa nkhuni kweniso akuneŵa maji nga Ayisirayeli wosi,+ kweniso nga paguŵa la sembi laku Yehova pamalu ngo Iyu wangasankha,+ ndipu venivi ndivu achita mpaka msanawale.+

Mazu Ngam'mphata

Pamwenga kuti, “ko kuselere lumwi.”
Kung’anamuwa Nyanja ya Meditereniyani.
Pamwenga kuti, “akapolu.”
Kung’anamuwa kuvuma.
Pamwenga kuti, “anguwonesesa.”
Mazu ngaki chayingu, “unganu.”