Yobu 6:1-30
6 Sonu Yobu wangumuka kuti:
2 “Mphanyi urwirwi wangu+ ungupimika umamphaumamphaNdipuso unguŵikika pamasikelu limoza ndi masoka ngangu!
3 Pakuti sonu nguzitu kuluska mchenga wa munyanja.
Ndichu chifukwa chaki ndilongoro bweka.*+
4 Pakuti mivi ya Wanthazizosi yandihoma,Ndipu ini nditumwa ukali waki;+Vinthu vakofya vakutuliya kwaku Chiuta vandanda kuti vilimbani nani.
5 Kumbi bulu wamudondu+ wangaliya asani uteka ulipu,Pamwenga kumbi ng’ombi yinthulumi yingaliya asani ye ndi chakurya?
6 Kumbi chakurya chambula kunowa chingaryika chambula mche,Pamwenga kumbi maji nga vipasu vambula kunowa ngangamwika?
7 Ndakana kuko vinthu va viyo.
Pakuti ve nge poyizoni muchakurya changu.
8 Mphanyi cho ndapempha chinguvwikaKweniso mphanyi Chiuta wangundipaska cho ndikhumba!
9 Mphanyi Chiuta wangundiphwanya ŵaka,Kweniso mphanyi wangutambasuwa ŵaka janja laki kuti wandibayi!+
10 Pakuti venivi vatingi vindipembuzgengi;Ndatingi ndikondwengi ukongwa chinanga kuti nde ndi urwirwi wambula kumala,Pakuti mazu nga Mtuŵa ndangakana cha.+
11 Kumbi nde ndi nthazi zakulutirizgiya kulindizga?+
Kumbi ntchinthu wuli cho ndilindizga, kuti ndilutirizgi kuja ndi umoyu?*
12 Kumbi nthazi zangu ziyanana ndi za mwa?
Pamwenga kumbi mnofu wangu ngwamkuŵa?
13 Kumbi yilipu nthowa yo ndingasaniriya chovyuPenipo vinthu vosi vakuti vingandiwovya vatuwaku kwaku ini?
14 Munthu weyosi yo waleka kulongo munyaki chanju chambula kumala+Watimuwopa cha Wanthazizosi.+
15 Abali ŵangu chayiwu asambuka aryarya+ nge msinji wa mu chipwepwi,Nge mo maji nga msinji wa mu chipwepwi ngamiriya.
16 Misinji yeniyi yifipa chifukwa cha ayisi,Ndipu mwaku iyu mubisama sinoo* wakusongonoka.
17 Asani pajumpha nyengu, yiŵavi maji ndipu yimala;Asani kufunda, yimira.
18 Yitenda mwakunyongorokanyongoroka;Yisere muchipululu ndipu yimaliya mwenimo.
19 Ŵanthu akupinga katundu a ku Tema+ atiyipenjapenja;Ŵanthu a pa ulendu akutuliya ku Sheba*+ atiyilindizga.
20 Yiwu achita soni chifukwa chakuti angugomezga vaŵaka;Ndipu asani aluta kumalu ngo, aguŵa.
21 Viyo ndimu namwi mwajaliya kwaku ini;+Yimwi mwawona kofya kwa soka langu, ndipu mutopa.+
22 Kumbi ndakambapu kuti, ‘Ndipaskeniku chinthu,’
Pamwenga ndapemphapu kuti mundipaski mphasu kutuliya pa chuma chinu?
23 Kumbi ndapemphapu kuti nditaskiki ku janja la murwaniPamwenga kuti nditaskiki* ku ŵanthu akukandirizga?
24 Ndisambizeni, ndipu ndijengi cheti;+Ndiwovyeni kuti ndivwisi cho ndananga.
25 Mazu ngauneneska ngaŵaŵa cha!+
Kweni kumbi munthu wangayanduwanji ndi kuchenya kwinu?+
26 Kumbi mupangana kuti muchenyi mazu ngangu,Mazu nga munthu wambula chilindizga,+ ngo mphepu yitingaputisa?
27 Mwaŵanthu yimwi mungachitiya mayeri mwana mulanda+Kweniso mungagulisa* munyinu chayiyu!+
28 Sonu ng’anamukani ndipu ndilereskeni,Pakuti ndingapusika cha pa masu pinu.
29 Chondi, ŵanaŵanani umampha, mungandiyeruzganga uheni cha,Nadi panu, ŵanaŵanani umampha, pakuti urunji wangu weche wosi.
30 Kumbi lilimi langu lilongoro mwambula urunji?
Kumbi mulomu wangu uziŵa cha kuti chinthu chinyaki ntchiheni?
Mazu Ngam'mphata
^ Pamwenga kuti, “ndilongolore mu liŵi, ndilongoro mwambula kuphwere.”
^ Pamwenga kuti, “kuti ndisazgiyeku umoyu wangu.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Pamwenga kuti, “Asabiya wo ŵe pa ulendu.”
^ Mazu ngaki chayingu, “ndiwomboleki.”
^ Pamwenga kuti, “mungasinthisa chinthu chinyaki ndi.”
