Yobu 23:1-17

  • Yobu wamuka (1-17)

    • Wakhumba kuti mulandu waki uluti kwaku Chiuta (1-7)

    • Wakamba kuti wangamusaniya cha Chiuta (8, 9)

    • ‘Ndingulutirizga kulondo nthowa yaki kwambula kupetuka’ (11)

23  Yobu wangumuka kuti:   “Chinanga ndi msanawale, ndidandawulengi mwamtafu;*+Nthazi zangu zamala chifukwa cha kutamantha.   Asani ndaziŵanga ko ndingasaniya Chiuta!+ Ndatingi ndilutengi kumalu ngaki ko waja.+   Ndatingi ndikambengi mulandu wangu pa masu paki,Ndipu mumulomu mwangu ndatingi ndizazengemu fundu zakujivikiliya;   Ndatingi ndivwengi vo iyu watingi wandimukengi,Kweniso ndatingi ndivwengi vo watingi wandikambiyengi.   Kumbi iyu watingi walimbanengi nani ndi nthazi zaki zikulu? Awa, nadi panu, iyu watingi wandivwisiyengi.+   Kweniko, munthu wakunyoloka watingi wakambiskanengi nayu nkhani yaki,Ndipu wakweruzga wangu watingi wandisaniyengi kuti ndilivi mulandu mpaka muyaya.   Kweni asani ndaluta kuvuma,* ndisaniya kuti iyu kulivi;Ndipu asani ndaweku nditimusaniya cha.   Asani wagwira ntchitu kumazge, ini nditimuwonaku cha;Pavuli paki waluta kumaryi, kweni ini nditimuwona mbwenu cha. 10  Kweni iyu waziŵa nthowa yo ndapitiya.+ Pavuli pakuti wandiyesa, ndijengi nge golidi chayiyu.+ 11  Maphazi ngangu ngalondo mosi mo iyu wakanda;Ndalutirizga kulondo nthowa yaki kwambula kupetuka.+ 12  Ndaleka cha kulondo dangu lakutuwa pamilomu yaki. Ndasunga mazu ngaki mwakuphwere,+ kuluska mo iyu wakhumbiyanga kuti ndichitiyi.* 13  Asani wasimikiza mtima, ndiyani wangamukaniza?+ Asani wakhumba kuchita chinthu chinyaki, watichichita nadi.+ 14  Pakuti iyu wafiskengi kuchita vosi vo wasimikiza kundichitiya,*Ndipu wasunga vinthu vinandi va viyo. 15  Ndichu chifukwa chaki watindifipiska mtima;Asani ndamuŵanaŵaniya, ndichita mantha ukongwa. 16  Chiuta wachitiska kuti mtima wangu uchitengi mantha,Ndipu Wanthazizosi wachitiska kuti ndiwopengi. 17  Kweni ndalekapu cha kulongoro chifukwa cha mdimaPamwenga chifukwa cha mdima ukulu wo wajala chisku changu.

Mazu Ngam'mphata

Pamwenga kuti, “mwakugaruka.”
Pamwenga kuti, “ko kutuliya lumwi.”
Pamwenga kuti, “mo wakundikambiya.”
Pamwenga kuti, “vo wakamba kuti wandichitiyengi.”