Yesaya 7:1-25
7 Sonu mu mazuŵa ngaku Ahazi+ mwana waku Yotamu, mwana waku Uziya fumu ya ku Yuda, Fumu Rezini ya ku Siriya ndi Peka+ mwana waku Remaliya fumu ya ku Isirayeli, anguza kuzichita nkhondu ndi Yerusalemu, kweni angutondeka kulonda tawuni yo.+
2 Ndipu kunyumba kwaku Davidi kunguza uthenga wakuti: “Charu cha Siriya chakoliyana ndi Efurayemu.”
Mwaviyo, mtima waku Ahazi kweniso mitima ya ŵanthu ŵaki yingwamba kunjekeme, nge vimiti vamulisuwa vo visukunyika ndi mphepu.
3 Pavuli paki, Yehova wangukambiya Yesaya kuti: “Luta kuti ukakumani ndi Ahazi, yiwi ndi mwana waku, Sheyara-yasubu,*+ kukumaliya kwa ngalandi ya damu lakunena,+ mumphepeti mwa msewu ukulu wakuluta kumalu ngo wakuchapa vakuvwala wagwiriya ntchitu yaki.
4 Ukamukambiyi kuti, ‘Jalika mtima pasi. Ungawopanga cha ndipu ungafipanga mtima cha chifukwa cha vimiti viŵi ivi vo visunkha josi ndipu vaja kamanavi kunyeke limu. Ungawopanga cha chifukwa cha ukali ukulu waku Rezini ndi Siriya kweniso mwana waku Remaliya.+
5 Pakuti Siriya limoza ndi Efurayemu kweniso mwana waku Remaliya apangana kuti akupweteki, ndipu akamba kuti:
6 “Tiyeni tiyukiyi Yuda, timupaluwi* ndi kumuthereska,* ndipu tisankhi mwana waku Tabeli kuti waje fumu yaki.”+
7 “‘Yehova, Ambuya Fumu Yikulu wakamba kuti:
“Viŵayendiyengi cha,Ndipu vichitikengi cha.
8 Pakuti mutu waku Siriya ndi Damasiko,Ndipu mutu waku Damasiko ndi Rezini.
Mu vyaka 65 pe,Efurayemu waphwanyikiyengi limu ndipu uŵengi so mtundu cha.+
9 Mutu waku Efurayemu ndi Samariya,+Ndipu mutu waku Samariya ndi mwana waku Remaliya.+
Asani muŵengevi chivwanu chakukho,Mujalikiskikengi cha.”’”
10 Yehova wangulutirizga kulongoro ndi Ahazi, ndipu wangukamba kuti:
11 “Pempha chisimikizu kutuliya kwaku Yehova Chiuta waku;+ chingaŵa chitali nge Dindi* pamwenga chingaŵa chakuthopoka mpaka kufika kuchanya.”
12 Kweni Ahazi wangukamba kuti: “Ndipemphengi cha ndipuso ndiyesengi Yehova cha.”
13 Pavuli paki, Yesaya wangukamba kuti: “Vwani yimwi a munyumba yaku Davidi. Kumbi mwakhorwa cha kukwiyisa ŵanthu? Kumbi mukhumba so kukwiyisa Chiuta?+
14 Mwaviyo, Yehova mweneku wakupaskeningi chisimikizu ichi: Awonani! Mwali wamengi nthumbu ndipu wabalengi mwana munthulumi.+ Iyu wazakumudana zina lakuti Emanuwelu.*+
15 Pa nyengu yo wazamuziŵa mo wangakaniya chiheni ndi kusankha chamampha, wazamukurya mkaka wakukhoma* ndi uchi.
16 Pakuti mwana yo wechendaziŵi mo wangakaniya chiheni ndi kusankha chamampha, charu cha mafumu ngaŵi cho utopa, chazamujowoleke limu.+
17 Yehova wachitiskengi kuti yiwi, ŵanthu ŵaku kweniso nyumba ya awusu, muzije mu nyengu yakusuzga, yo yikuŵapu cha kwambiya pa zuŵa lo Efurayemu wangutuliyaku kwaku Yuda,+ pakuti Chiuta wazengi ndi fumu ya ku Asiriya.+
18 “Mu zuŵa lenilo, Yehova wazamukumba khwelu kuti wadani nyezi kutuliya ku timisinji takutali ta msinji wa Nayelu wa ku Ijipiti ndipuso wazamudana njuchi kutuliya mucharu cha Asiriya,
19 Ndipu zazamukuza ndi kubota mumadambu* ngakusendemuka, mumphaku za majalawi, muvivwati vosi vaminga ndipuso mumalu ngosi ngakumwisiyamu maji viŵetu.
20 “Mu zuŵa lenilo, mwakugwiriskiya ntchitu lezara lakubwereka lakutuliya kuchigaŵa cha Msinji,* mwakugwiriskiya ntchitu fumu ya ku Asiriya,+ Yehova wazamumeta sisi lakumutu ndipuso cheya cha mumalundi, ndipu lezara lo lazamupala so mwembi.
21 “Mu zuŵa lenilo, munthu wazamusunga tholi* linthukazi kweniso mbereri ziŵi.
22 Ndipu chifukwa cha unandi wa mkaka, munthu yo, wazamukurya mkaka wakukhoma,* pakuti weyosi yo wazamujaku mucharu cho, wazamukurya mkaka wakukhoma ndipuso uchi.
23 “Mu zuŵa lenilo, peposi po pajanga vimiti 1,000 va mphereska vakukwana ndalama zasiliva 1,000, pazamukuŵa ŵaka vivwati vaminga kweniso dondu.
24 Ŵanthu azamuluta kweniko ndi uta kweniso muvu, chifukwa charu chosi chazamuja ndi vivwati vaminga kweniso dondu.
25 Ndipu mwazamutondeka kuluta kufupi ndi mapiri ngosi ngo mwangangweruwanga ndi jembi, chifukwa chakopa vivwati vaminga kweniso dondu. Mapiri ngo, ngazamusambuka malu ngakuliskaku ng’ombi kweniso ngakukandamu mbereri.”
Mazu Ngam'mphata
^ Kung’anamuwa kuti, “Akujaku Pe Ndiwu Awengeku.”
^ Yapa pangafwatulikiya so kuti, “timupapasuwi.”
^ Pamwenga kuti, “ndi kupankhuwa mpanda waki.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Kung’anamuwa kuti, “Chiuta We Nasi.”
^ Pamwenga kuti, “masa.”
^ Yanga ndi madambu ngo ngaja ndi maji mu nyengu ya vuwa pe.
^ Kung’anamuwa Msinji wa Yufureti.
^ Tholi ndi mwana wa ng’ombi.
^ Pamwenga kuti, “masa.”
