Yesaya 66:1-24
66 Yehova wakamba kuti:
“Kuchanya ndi mpandu wangu waufumu, ndipu charu chapasi ntchakukandapu maphazi ngangu.+
Sonu ndi nunkhu ko mungandizenge nyumba,+Ndipuso nge pani malu ngangu ngakupumuliyapu?”+
2 “Janja langu ndilu lapanga vinthu vosi venivi,Ndipu vosi venivi vikupangika viyo,” Yehova ndiyu wakamba.+
“Ndazamulereska ku munthu uyu,Ku munthu wakujiyuyuwa kweniso wakusweka mtima yo wambwambwanthiya chifukwa cha* mazu ngangu.+
3 Munthu yo wabaya ng’ombi yinthulumi wayanana ndi yo wabaya munthu.+
Yo wapereka sembi mbereri wayanana ndi yo wafyo khosi la galu.+
Yo wapereka mphasu wayanana ndi yo wapereka ndopa za nkhumba!+
Yo wapereka sembi yachikumbusu ya libani+ wayanana ndi yo watumbika ŵanthu mwakugwiriskiya ntchitu mazu nga masenga.*+
Yiwu asankha nthowa zawu,Ndipu akondwa ndi vinthu vakuseruska.
4 Mwaviyo, ndazamusankha nthowa zakuŵalangiya,+Ndipuso ndazamukuza kwaku yiwu ndi vinthu vo vitiŵachitiska mantha.
Chifukwa chakuti ndati ndadana, pengavi yo wangumuka;Ndati ndalongoro, pengavi yo wanguvwisiya.+
Yiwu angulutirizga kuchita vinthu viheni pa masu pangu,Ndipuso angusankha kuchita vinthu vo vileka kundikondwesa.”+
5 Vwani mazu ngaku Yehova, yimwi mumbwambwanthiya chifukwa cha* mazu ngaki:
“Abali ŵinu wo atikutinkhani kweniso wo atikupatuwani chifukwa cha zina langu angukamba kuti, ‘Yehova wakankhuskiki!’+
Kweni Iyu wazamuwoneke ndipuso wazamukuza ndi likondwa kwaku yimwi,Ndipu yiwu ndiwu azamulengeseka.”+
6 Mutawuni muvwika chiwawa, munyumba yakusopiyamu muvwika chiwawa!
Ntchiwawa chaku Yehova yo waweze arwani ŵaki mwakuŵapaska chilangu cho atenere kulonde.
7 Nthumbu yechendayuki, wangubala.+
Urwirwi wa pakubala wechendamuziyi, wangubala mwana munthulumi.
8 Ndiyani yo wakuvwapu chinthu cha viyo?
Ndiyani yo wakuwonapu vinthu va viyo?
Kumbi charu chingabalika mu zuŵa limoza?
Pamwenga kumbi mtundu ungabalika pa nyengu yimoza?
Kweni nthumbu yaku Ziyoni yati yayuka ŵaka, wangubala ŵana anthulumi.
9 “Kumbi ndimufikiskengi pa nyengu yakubala, ndi kuleka kumubalisa?” Yehova ndiyu wakamba.
“Pamwenga kumbi ndingachitiska kuti wayambi kubala, pavuli paki ndi kujala chibaliru?” Chiuta waku ndiyu wakamba.
10 Sekeriyani ndi Yerusalemu ndipu kondwani nayu,+ mosi yimwi mutimuyanja.+
Zayani nayu ukongwa, yimwi mosi mutimuliriya,
11 Pakuti mwazamuwonkha be laki lakupembuzga ndi kuguta,Ndipu mwazamukumwa ndi kusaniya likondwa mu unkhankhu waki ukulu.
12 Pakuti Yehova wakamba kuti:
“Awonani, nditimupaska chimangu nge msinji+Kweniso unkhankhu wa mitundu ya ŵanthu nge msinji wakututuma.+
Mwazamuwonkha ndipuso mwazamupingika muchiwunu,Kweniso mwazamupembelezeke* pamakongonu.
13 Nge mo ama apembuzgiya mwana wawu,Nani ndazamulutirizga kukupembuzgani;+Ndipu mwazamupembuzgika chifukwa cha Yerusalemu.+
14 Mwazamuwona venivi, ndipu mtima winu wazamukondwa,Viwanga vinu vazamutipitiya nge vipozwa.*
Ndipu janja laku Yehova lazamuziŵika* kwa ateŵeti ŵaki,Kweni wazamususka arwani ŵaki.”+
15 “Pakuti Yehova wazamukuza nge motu,+Ndipu magaleta ngaki nge nge chimphunga,+Kuti waweze ndi ukali ukulu,Kuti wachenyi ndi milipu ya motu.+
16 Pakuti Yehova wazamupereka cheruzgu ndi motu,Wazamupereka cheruzgu ku ŵanthu wosi ndi lipanga laki;Ndipu ŵanthu wo azamubayika ndi Yehova azamuja anandi.
17 “Wo atijipatuwa ndi kujitowesa kuti asere muminda*+ kulondo yo we pakati, wo aturya nyama ya nkhumba,+ vinthu vaukazuzi kweniso mbeŵa,+ wosi azamumaliya limoza,” Yehova ndiyu wakamba.
18 “Pakuti ndiziŵa ntchitu zawu ndipuso maŵanaŵanu ngawu, ndituza kuziwunganisa ŵanthu amitundu yosi kweniso vineneru vosi, ndipu azamukuza ndi kuwona unkhankhu wangu.”
19 “Ndazamuŵika chisimikizu pakati pawu, ndipu anyaki mwa ŵanthu wo apona ndazakuŵatuma ku mitundu ya ŵanthu, ŵanthu akuziŵa kuponya uta, a ku Tashishi,+ Puli ndi Ludi.+ Kweniso ndazakuŵatuma ku ŵanthu a ku Tubala ndi Yavani+ kweniso kuvirwa vakutali, ku ŵanthu wo ŵechendavwepu vakukwaskana ndi ini kweniso wo ŵechendawonepu unkhankhu wangu; ndipu azamupharazga unkhankhu wangu pakati pa mitundu ya ŵanthu.+
20 Yiwu azamukuza ndi abali ŵinu wosi nge mphasu kwaku Yehova kutuliya ku mitundu yosi ya ŵanthu.+ Azamukuza nawu pamahachi, mumagaleta, mungolu zakujala pachanya, panyama za nyulu* kweniso pangamila zakutchimbiya ukongwa. Azamukwere nawu kuphiri langu lakupaturika, Yerusalemu,” Yehova ndiyu wakamba, “nge mo Ayisirayeli alutiya kunyumba yaku Yehova ndi mphasu zawu muchiyaŵi chakutowa.”
21 “Ndazamutopu anyaki kuti aje asembi kweniso Alevi,” Yehova ndiyu wakamba.
22 Yehova wakamba kuti: “Pakuti nge mo kuchanya kufya ndi charu chapasi chifya+ vo ndilenga vijaliriyengi pa masu pangu, ndimu so mphapu* yaku kweniso zina laku vijaliyengi.”+
23 “Kutuwa pa mwezi wufya kufika pa mwezi wufya unyaki, ndipuso kutuwa pa zuŵa la sabata kufika pa zuŵa la sabata linyaki,Ŵanthu wosi azamusere kuti asindami pa masu pangu,”*+ Yehova ndiyu wakamba.
24 “Ndipu azamutuliya kubwalu ndi kuwona mathupi nga ŵanthu wo angundigarukiya;Pakuti mpholozi pamathupi ngo zazamukufwa cha,Motu wawu wazamuzimwika cha,+Ndipu azamuja chinthu chakuseruska ku ŵanthu wosi.”
Mazu Ngam'mphata
^ Pamwenga kuti, “yo wafipa mtima ndi.”
^ Yapa pangafwatulikiya so kuti, “yo wathamika ngoza.”
^ Pamwenga kuti, “yimwi mufipa mtima ndi.”
^ Pamwenga kuti, “mwazamususutizikiya.”
^ Kung’anamuwa uteka wo wame sonu.
^ Pamwenga kuti, “Ndipu nthazi zaku Yehova zazamuziŵika.”
^ Kung’anamuwa minda yapade yo asopiyangamu angoza.
^ Zina ili mu Chiheberi, ling’anamuwa mwana yo wabalika asani bulu munthulumi wakwera hachi yinthukazi.
^ Mazu ngaki chayingu, “mbewu.”
^ Pamwenga kuti, “kuti andisopi.”
