Yesaya 6:1-13
6 Mu chaka cho fumu Uziya yingufwiya,+ ndinguwona Yehova waja pampandu waufumu wapachanya kweniso wakukwezeka,+ ndipu chakuvwala chaki chinguzaza munyumba yakusopiyamu.
2 Aserafi anguma pachanya paku iyu; weyosi wenga ndi mapapa 6. Muserafi weyosi wangubenekere chisku chaki ndi mapapa ngaŵi kweniso wangubenekere malundi ngaki ndi mapapa ngaŵi, ndipu weyosi waphululukanga ndi mapapa ngaŵi.
3 Weyosi wadanirizanga ku munyaki kuti:
“Mtuŵa, mtuŵa, mtuŵa ndi Yehova wa mizinda.+
Charu chosi chazaza ndi unkhankhu waki.”
4 Vakukholese makhomu vingusukunyika chifukwa cha kudaniriza ko, ndipu nyumba yinguzaza josi.+
5 Pavuli paki ndingukamba kuti: “Soka ini!
Ndifwengi,*Pakuti nde munthu wa milomu yakufipiskika,Ndipuso ndija pakati pa ŵanthu a milomu yakufipiskika;+Chifukwa masu ngangu ngawona Fumu, Yehova wa mizinda!”
6 Mwaviyo, yumoza mwa aserafi wanguphululukiya kwaku ini ndipu mujanja laki mwenga ga lamotu+ lo wangulito ndi chakuŵaniya paguŵa la sembi.+
7 Iyu wangukwaska mulomu wangu ndipu wangukamba kuti:
“Awona! Ga ili lakwaska milomu yaku.
Mulandu waku watuzgikapu,Ndipu ubudi waku wabenekereka.”
8 Pavuli paki, ndinguvwa mazu ngaku Yehova ngakuti: “Ndiyani yo nditumengi, ndipu ndiyani yo walutengi mumalu mwaku isi?”+ Ndipu ndingukamba kuti: “Ndini panu! Nditumeni!”+
9 Ndipu wangumuka kuti, “Luta ndipu ukakambiyi ŵanthu yaŵa kuti:
‘Muvwengi mwakuwerezawereza,Kweni muvwisengi cha;Muwonengi mwakuwerezawereza,Kweni muziŵengi chechosi cha.’+
10 Kanonopesi mitima ya ŵanthu yaŵa,+Kajali makutu ngawu,+Ndipu ukamati masu ngawu,Kuti aleki kuwona ndi masu ngawuKweniso kuti aleki kuvwa ndi makutu ngawu,Kuti mitima yawu yileki kuvwisaNdipuso kuti aleki kung’anamuka ndi kuchizgika.”+
11 Ndati ndavwa venivi, ndingufumba kuti: “Mpaka zuŵanji, yimwi Yehova?” Pavuli paki, iyu wangukamba kuti:
“Mpaka po matawuni ngabwangandulikiya ndi kuja mahami ngambula ŵanthuNdipuso mpaka po nyumba zajaliya zambula ŵanthuKweniso mpaka po charu chanangikiya ndi kuja mahami.+
12 Mpaka po Yehova wadikisiya ŵanthu kutali+Ndipuso mpaka po chigaŵa chikulu cha charu cho, chajaliya chipalamba.
13 “Kweni mwazamuja mbwenu chatchumi, ndipu nachu chazamuwotcheka, nge chimiti chikulu kweniso nge chimiti cha oku, vo asani vawisikiya pasi visiya chisina; mbewu* yakupaturika ndiyu yazamuja chisina chaki.”
