Yesaya 42:1-25
42 Awonani! Mteŵeti wangu+ yo nditimuwovya!
Wakusankhika wangu+ yo watindikondwesa!+
Ndaŵika mzimu wangu mwaku iyu;+Wazengi ndi urunji ku mitundu ya ŵanthu.+
2 Iyu wazamudaniriza cha pamwenga kukweza mazu ngaki,Ndipu mazu ngaki ngazamuvwika cha mumsewu.+
3 Deti lakuphwanyika wazakulivikita cha,Ndipu chisunda chakusiwiliya wazakuchizimwa cha.+
Iyu wazengi ndi urunji mwakugomezgeka.+
4 Iyu wazamusiwiliya cha pamwenga kuvikitika mpaka po wajalikiskiya urunji mucharu;+Ndipu virwa* vilutirizga kulindizga dangu laki.*
5 Ivi ndivu Yehova, Chiuta wauneneska, wakamba,Mlengi wa kuchanya ndipuso Mura yo wakutambasuwa kuchanya,+Yo wakupanga charu chapasi kweniso vinthu vo ve mwenimo,+Yo wapereka mvuchi ku ŵanthu wo ŵe mwenimo+Ndipuso yo wapereka mzimu ku ŵanthu wo atenda mwenimo:+
6 “Ini Yehova, ndakudana mu urunji;Ndako janja laku.
Ndikuvikiliyengi ndipuso ndikuperekengi ku ŵanthu nge phanganu+Kweniso nge ukweru wa mitundu ya ŵanthu,+
7 Kuti ujuli masu ngambula kuwona,+Kuti utuzgi mukayidi mujeri*Kweniso kuti utuzgi mujeri ŵanthu wo aja mu mdima.+
8 Ini ndini Yehova. Lenili ndilu zina langu;Unkhankhu wangu nditiwupereka ku munthu weyosi cha,*Ndipu ndikhumba cha kuti ŵanthu athamikengi vikozgu vakujoba mumalu mwakuthamika ini.+
9 Awonani, vinthu vakwamba vafiskika;Sonu ndipharazga vinthu vifya.
Vechendawoneki, nditikukambiyani vakukwaskana ndi vinthu vo.”+
10 Mbiyani Yehova sumu yifya,+Mumbiyeni sumu zakuthamika kutuliya kuvigoti va charu chapasi,+Yimwi musikiya kunyanja ndipuso vosi vo ve mwenimo,Yimwi virwa* kweniso akuja mwenimo.+
11 Chipululu ndi matawuni ngaki vikwezi mazu,+Kweniso mizi yo kuja Kedara.+
Akuja mumajalawi adanirizi mwalikondwa;Yiwu adanirizi kutuliya pachanya pa mapiri.
12 Yiwu apereki unkhankhu kwaku YehovaNdipu apharazgi muvirwa* kuti ngwakwenere kuthamikika.+
13 Yehova wazamuluta nge chinkhara.+
Iyu wazamuyuska phamphu laki nge msilikali.+
Wazamudaniriza, wazamudaniriza ndi kudaniriza kwa nkhondu;Wazamulongo kuti ngwanthazi ukongwa kuluska arwani ŵaki.+
14 “Ndaja cheti kwa nyengu yitali.
Ndaja chisisi kweniso ndajiko.
Nge munthukazi yo wabala,Ndazamutamantha, kuŵeŵefuka kweniso kututiya muchanya pa nyengu yimoza.
15 Ndazamuparanya mapiri ndi mitunthuNdazamumizga vakume vawu vosi.
Misinji ndazakuyisambusa virwa*Ndipuso ndazamukamuska mathaŵali nga mateti.+
16 Achibulumutiya ndazakuŵalongozga munthowa yo atiyiziŵa cha+Ndazakuŵachitiska kuti ayendi munthowa zo akwendamu kali cha.+
Mdima wo we panthazi pawu ndazakuwusambusa ukweru+Ndipu malu ngavibokuboku ndazakungasambusa malu ngachinyeti.*+
Venivi ndivu ndazakuŵachitiya, ndipu ndazakuŵajowo cha.”
17 Wo athemba vikozgu vakusema,Wo akambiya vikozgu vachisulu* kuti: “Ndimwi achiuta ŵidu,”+Azamuwezeke vuli ndipuso azamulengeseka ukongwa.
18 Vwisiyani, yimwi ŵanthu akunyota makutu;Lereskani ndi kuwona, yimwi achibulumutiya.+
19 Ndiyani yo ngwachibulumutiya nge mteŵeti wangu,Yo ngwakunyota makutu nge muthenga yo ndatumiza?
Ndiyani yo ngwachibulumutiya nge munthu yo wapaskika mphotu,Yo ngwachibulumutiya nge mteŵeti waku Yehova?+
20 Uwona vinthu vinandi kweni uja masu cha.
Ujula makutu ngaku kweni utuvwa cha.+
21 Chifukwa cha urunji waki,Yehova wakondwa kukuzga dangu ndi kulikankhuska.
22 Yaŵa mbanthu wo akoleka ndi kutoleka;+Wosi abira mumbuna ndipuso abisika mujeri.+
Yiwu akoleka kwambula wakuŵataska,+Ndipu atoleka kwambula munthu wakukamba kuti: “Weriyani nawu kunu!”
23 Ndiyani pakati pinu yo wazamukuvwa vinthu venivi?
Ndiyani yo wazamuvwisiya ndi kuvwa vinthu vo vazakumuwovya mu nyengu yo yituza?
24 Ndiyani yo wapereka Yakobe kuti watolekiNdipuso yo wapereka Isirayeli kuti wakoleki?
Kumbi ndi Yehova cha, Yo tingumubudiya?
Yiwu angukana kwenda munthowa zaki,Ndipu anguvwiya cha dangu Laki.*+
25 Mwaviyo Iyu wamupunguliyanga ukali waki,Kukwiya kwaki kweniso ukali wa nkhondu.+
Ungupiriza chechosi cho chingumuzunguliya, kweni wanguchitapu kanthu cha.+
Ungumuwotcha, kweni wanguviŵanaŵana cha mumtima waki.+
Mazu Ngam'mphata
^ Anyaki akamba kuti, “vilumba.”
^ Pamwenga kuti, “kulindizga ulongozgi waki.”
^ Mazu ngaki chayingu, “mumalu ngamdima.”
^ Pamwenga kuti, “Unkhankhu wangu ndigaŵana ndi munthu weyosi cha.”
^ Anyaki akamba kuti, “vilumba.”
^ Anyaki akamba kuti, “vilumba.”
^ Anyaki akamba kuti, “vilumba.”
^ Pamwenga kuti, “ngafulati.”
^ Pamwenga kuti, “vachisulu chakusongono.”
^ Pamwenga kuti, “anguvwiya cha ulongozgi waki.”
