Yesaya 21:1-17
21 Uwu mbuthenga wacheruzgu wakukwaskana ndi chipululu cha nyanja:*+
Kutuza chinthu chinyaki nge chimphepu cho chipeya kumwera,Kutuliya muchipululu, kutuliya mucharu chakofya.+
2 Ini ndakambilika chiwona chakofya kuti:
Munthu muryarya wachita vinthu mwauryarya,Munthu wakubwanganduwa wabwanganduwa.
Nyamuka, yiwi Elamu! Zingiliza, yiwi Mediya!+
Ndimalisengi kusuzgika kosi ko wachitiska.+
3 Ndichu chifukwa chaki ndapwetekeka ukongwa.*+
Ndikulunthuka ndi urwirwi,Nge wo munthukazi watuŵa nawu pakubala.
Ndasuzgika ukongwa mwakuti ndituvwa cha;Ndatimbanyizgika ukongwa mwakuti ndilereska cha.
4 Mtima wangu walopwa; ndinjekeme chifukwa cha mantha.
Mazulu ngo* ndapenjanga ngachitiska kuti ndimbwambwanthiyengi.
5 Nozgani thebulu ndi kuŵika mipandu!
Ryani ndi kumwa!+
Sokani, yimwi alongozgi, punguliyani mafuta chishangu!
6 Pakuti Yehova wangundikambiya kuti:
“Luta, ukaŵiki mulonda pamalu ngaki ndipu wazindikambiyi vo wawona.”
7 Ndipu iyu wanguwona galeta la nkhondu ndi mahachi ngaki,Galeta la nkhondu lakuguzika ndi abulu,Galeta la nkhondu lakuguzika ndi ngamila.
Wanguwonesesa ndipu wenga masu ukongwa.
8 Pavuli paki, wangudaniriza nge nkharamu kuti:
“Yimwi Yehova, ndi msana ndituma pamalu ngakuthopoka nga mulonda,*Ndipu usiku wewosi ndija pamalu ngangu ngaulonda.+
9 Awonani vo vituza:
Anthulumi ŵe mugaleta la nkhondu lo liguzika ndi mahachi!”+
Pavuli paki, iyu wangulongoro ndipu wangukamba kuti:
“Wawa! Babiloni wawa!+
Vikozgu vosi vakujoba va achiuta ŵaki waviswiya pasi!”+
10 Mwaŵanthu ŵangu, yimwi mwakhwemeka nge mbewu,Chipasu cha* malu ngangu ngakukhwemiyapu mbewu,+Ndakukambiyani vo ndavwa kutuliya kwaku Yehova wa mizinda, Chiuta waku Isirayeli.
11 Uwu mbuthenga wacheruzgu wakukwaskana ndi Duma:*
Munthu munyaki wadaniriza kwaku ini kutuliya ku Seiri kuti:+
“Mulonda, kwaja nyengu yitali wuli kuti kuchi?
Mulonda, kwaja nyengu yitali wuli kuti kuchi?”
12 Mulonda wangukamba kuti:
“Mlenji utuza, ndipuso usiku utuza.
Asani mukhumba kufumba, fumbani.
Zani so!”
13 Uwu mbuthenga wakukwaskana ndi chidika:*
Ndi usiku mwazamugona mulisuwa la muchidika,Yimwi amalonda a ku Dedani.+
14 Zani ndi maji kuti mukumani ndi munthu wanyota,Yimwi akuja mucharu cha Tema,+Ndipu muzi ndi chiŵandi kuti muzipaski munthu wakuthaŵa.
15 Pakuti athaŵa lipanga, athaŵa lipanga lakusololeka,Athaŵa uta wakukunga, kweniso athaŵa nkhaza za nkhondu.
16 Pakuti Yehova wangundikambiya kuti: “Mu chaka chimoza, nge vyaka va munthu waganyu,* unkhankhu wosi wa ku Kedara+ wazamumala.
17 Asilikali akuponya uta a ku Kedara wo ajaku azamukuŵa amanavi ŵaka, pakuti Yehova Chiuta waku Isirayeli walongoro.”
Mazu Ngam'mphata
^ Viwoneka kuti akamba chigaŵa cha Babiloni wakali.
^ Mazu ngaki chayingu, “Ndichu chifukwa chaki muchiwunu mwangu mwazaza urwirwi.”
^ Mazu ngaki chayingu, “Pakati pa mazulu ngaŵi po.”
^ Pamwenga kuti, “pasonju ya mulonda.”
^ Mazu ngaki chayingu, “Mbewu ya.”
^ Kung’anamuwa kuti, “Kuja Cheti.”
^ Mazu ngaki chayingu, “chidika chachipalamba.”
^ Pamwenga kuti, “Mu chaka chimoza, cho chaŵerengeka mwakuphwere nge mo munthu waganyu waŵerenge”; kung’anamuwa chaka chimoza pe.
