Yesaya 14:1-32
14 Pakuti Yehova wazamuchitiya lisungu Yakobe+ ndipu wazakumusankha so Isirayeli.+ Iyu wazakuŵaŵika* mucharu chawu,+ alendu azamujanga nawu ndipu azakujibatika ku nyumba yaku Yakobe.+
2 Mitundu ya ŵanthu yakuŵato ndi kuza nawu kumalu ngawu, ndipu nyumba yaku Isirayeli yazamuto mitundu yo ndi kuyisambusa akapolu anthulumi ndi akapolu anthukazi+ mucharu chaku Yehova; yiwu azamuko ukapolu ŵanthu wo anguŵako ukapolu ndipuso azamulamuliyanga ŵanthu wo aŵachichizganga kugwira ntchitu.*
3 Mu zuŵa lo Yehova wazakukupumuzgiyani ku urwirwi winu, suzgu yinu kweniso ku ntchitu yakuŵaŵa ya ukapolu yo akugwiriskaningi,+
4 mwazamukamba nthanthi yakukwaskana* ndi fumu ya ku Babiloni, yakuti:
“Yo wachichizganga anyaki kugwira ntchitu* wamala!
Kukandirizgika kwamala!+
5 Yehova wafyo nthonga ya ŵanthu aheni,Nthonga ya mafumu,+
6 Yo wapumanga mitundu ya ŵanthu ndi mafayiti mwaukali kwambula kulekeza,+Yo mwakukwiya wathereskanga mitundu ndi kuyitombozga kwambula kulekeza.+
7 Charu chosi chapasi chapumuwa sonu, palivi chakutimbanyizga.
Ŵanthu akambula chifukwa cha likondwa.+
8 Chinanga ndi vimiti va junipa vikondwa chifukwa chaku yiwi,Limoza ndi vimiti va sidara* va ku Lebanoni.
Vimiti vo vikamba kuti, ‘Kutuliya po ukuwiya pasi,Palivi wakudumuwa vimiti yo waza kuzitiyukiya.’
9 Chinanga ndi Dindi* pasi lasukunyisikaKuti likumani nawi uchiza.
Chifukwa chaku yiwi liyuska wosi wo akufwa,Alongozgi* wosi akukandirizga a pacharu chapasi.
Lichitiska kuti mafumu ngosi nga mitundu ya ŵanthu ngasoki pamipandu yawu yaufumu.
10 Ngosi ngalongoro ndipu ngatikukambiya kuti,‘Kumbi nawi walopwa nge isi?
Kumbi wayanana ndi isi?
11 Kunotha kwaku kwasisikiya ku Dindi,*Kuliya kwa vakumbiya vaku va vingwi.+
Wagona pa mphorozi nge kuti ndi bedi,Ndipu chakudika chaku ndi nyongu.’
12 Wawa kutuliya kuchanya,Yiwi wakuŵala, mwana wa matandakucha!
Wadumulikiya pacharu,Yiwi wathereskanga mitundu ya ŵanthu!+
13 Mumtima waku ungukamba kuti, ‘Ndikwerengi kuchanya.+
Mpandu wangu waufumu ndiwukwezengi pachanya pa nyenyezi zaku Chiuta,+Ndipu ndijengi pachanya pa phiri lakukumanapu,Kuvigaŵa vakutali ukongwa va kunkhondi.*+
14 Ndikwerengi pachanya pa mitambu;Ndijichitiskengi kuti ndiyanani ndi Wapachanya Limu.’
15 Mumalu mwaki, wazamusisikiya ku Dindi,*Kukumaliya chayiku kwa zenji.
16 Wo azakukuwona azamuchita dodoli paku yiwi;Azakukuwonesesa ndi kukamba kuti,‘Asi munthu uyu ndiyu wayaghayisanga charu,Yo wambwambwanthisanga maufumu,+
17 Yo wanguchitiska kuti charu chapasi chije nge chipululuNdi kuthereska matawuni ngaki,+Yo wangukana kufwatuwa akayidi ŵaki kuti aluti kwawu?’+
18 Mafumu nganyaki ngosi nga mitundu ya ŵanthu,Ngosi ngagona mu unkhankhu,Fumu yeyosi mumuwunda waki.*
19 Kweni yiwi akutaya kwambula kukuŵika mudindi,Nge mphukira* yakuseruska,Wabenekereka ndi ŵanthu akubayika wo angugwazika ndi lipanga,Wo asikiya ku mya ya zenji,Nge thupi lo lakandikakandika ndi malundi.
20 Wazamuja nawu limoza cha mudindi,Pakuti ungunanga charu chaku,Ungubaya ŵanthu ŵaku.
Mazina nga mphapu ya ŵanthu wo achita vinthu viheni ngazamuzumbulika so cha.
21 Nozgani chakubayiyapu ŵana ŵakiChifukwa cha mulandu wa apapi ŵawu akali,Kuti aleki kuja so ndi nthazi ndi kulonda charu chapasiKweniso kuchizaza ndi matawuni ngawu.”
22 “Yehova wa mizinda wakamba kuti: “Ndazakuŵayukiya.”+
Yehova wakamba so kuti: “Mu Babiloni ndisisitengemu zina, munthu wakujaku, ŵana ndipuso mphapu.”+
23 Yehova wa mizinda wakamba kuti, “Ndazamuchitiska kuti mu Babiloni muzijengi vinungu ndi kumusambusa chigaŵa cha mathaŵali ndipuso ndazakumupeya ndi mweyu wa pharanyiku.”+
24 Yehova wa mizinda walapizga kuti:
“Vichitikengi nge mo ndakhumbiya,Ndipu vo ndaŵanaŵana ndivu vichitikengi.
25 Ndazamuvikita munthu wa ku Asiriya mucharu changu,Ndipu ndazakumukandakanda pamapiri ngangu.+
Goli laki ndazakulituzgaku kwaku yiwu,Ndipu katundu waki ndazakumutuzgapu paphewa lawu.”+
26 Venivi ndivu ndasimikiza kuti ndichitiyi* charu chosi chapasi,Ndipu lenili ndi janja lo latambasukiya* mitundu yosi ya ŵanthu.
27 Pakuti Yehova wa mizinda waŵanaŵana venivi,Ndiyani yo wangavitimbanyizga?+
Janja laki latambasuka,Ndiyani yo wangaliweza?+
28 Mu chaka cho Fumu Ahazi yingufwiya,+ uthenga wacheruzgu wo unguperekeka wenga wakuti:
29 “Ungakondwanga cha, yiwi Filisitiya, weyosi waku yimwi,Chifukwa chakuti nthonga ya munthu yo wakupumanga yafyoleka.
Pakuti ku msisi wa njoka+ kwazamutuwa njoka ya poyizoni,+Ndipu mphapu yaki yazamuja njoka ya motu yakuphululuka.
30 Mwana wakwamba wa munthu wakusika wachirya chakuryaKweniso mukavu wachigona pasi mwakuvikilirika,Ndazamubaya msisi waku ndi nja.Ndipu wo ajaku mwaku yiwi azamubayika.+
31 Liya, yiwi geti! Kolomoka, yiwi tawuni!
Mosi mwazamusongonoka mtima, yimwi ŵanthu a ku Filisitiya!
Pakuti josi lituza kutuliya kunkhondi,*Ndipu mu magulu ngaki nga asilikali mulivi wo aguguzika.”
32 Kumbi angamukengi wuli mathenga nga mitundu ya ŵanthu?*
Angamukengi kuti, Yehova waŵika fawundeshoni ya Ziyoni,+Kweniso kuti akusika a ŵanthu ŵaki azamubisama mwaku iyu.
Mazu Ngam'mphata
^ Pamwenga kuti, “wazakuŵapumuzga.”
^ Pamwenga kuti, “ŵanthu wo ŵenga akapitawu ŵawu.”
^ Pamwenga kuti, “mazu ngakunyoza ngakukwaskana.”
^ Pamwenga kuti, “Yo wenga kapitawu.”
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Mazu ngaki chayingu, “Aphongu.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Anyaki akamba kuti, “kumpotu.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Mazu ngaki chayingu, “munyumba yaki.”
^ Pamwenga kuti, “mphanda.”
^ Mazu ngaki chayingu, “Wenuwu mbulongozgi wo ndapereka wakususkana ndi.”
^ Pamwenga kuti, “janja lo lanozgeka kuti lipumi.”
^ Anyaki akamba kuti, “kumpotu.”
^ Mazu ngaki chayingu, “mathenga nga mtundu wo.”
