Yesaya 13:1-22
13 Uwu mbuthenga wacheruzgu wakukwaskana ndi Babiloni,+ wo Yesaya+ mwana waku Amozi wanguwona mu chiwona:
2 “Soskani chiziŵisu*+ paphiri la majalawi pe.
Adaneni, akonozgeni ndi* janja linu,Kuti azisere pamakhomu nga ŵanthu akuzirwa.
3 Ndapereka dangu ku ŵanthu wo ndasankha.*+
Ndadana asilikali ŵangu kuti alongo ukali wangu,Asilikali ŵangu wo anotha kweniso azaya.
4 Avwani! Chigulu cha ŵanthu mumapiri;Chichita chiwawa nge ŵanthu anandi!+
Avwani! Chiwawa cha maufumu,Chiwawa cha mitundu ya ŵanthu yo yawungana pamoza!
Yehova wa mizinda wawunganisa asilikali kuti achiti nkhondu.+
5 Yiwu atuwa kucharu chakutali,+Kuvigoti va kuchanya,Yehova watuza ndi vidya va ukali waki,Kuti wazinangi charu chosi chapasi.+
6 Liyani, pakuti zuŵa laku Yehova le pafupi!
Lizengi nge pharanyiku lakutuliya kwa Wanthazizosi.+
7 Ndichu chifukwa chaki manja ngosi ngalombotokengi,Ndipu mtima wa munthu weyosi usongonokengi chifukwa cha mantha.+
8 Ŵanthu atimbanyizgika.+
Yiwu akulunthuka ndi urwirwi,Nge munthukazi yo nthumbu yayuka.
Yiwu alereskana mwakuzizwa,Alereskana ndi visku vo vatchesama chifukwa cha kusuzgika maŵanaŵanu.
9 Awonani! Zuŵa laku Yehova lituza,Zuŵa lankhaza, la kukwiya ndipuso la ukali wakukole,Lituza kuti lichitiski charu kuja chinthu chakuchitiska mantha,+Kweniso kuti limali ŵanthu akubuda mucharu cho.
10 Pakuti nyenyezi zakuchanya kweniso magulu ngaki nga nyenyezi*+Vazamupereka cha ukweru wawu;Lumwi lazamuchita mdima asani lituwa,Ndipu mwezi wazamupereka cha ukweru waki.
11 Ndazamukumba mulandu wosi wo aja pacharu chapasi chifukwa cha uheni wawu,+Ndipuso aheni chifukwa cha kunanga kwawu.
Ndazamumalisa kujiŵikamu kwa ŵanthu akujikuzga,Ndipu ndazamuyuyuwa kujikuzga kwa alongozgi ankhaza.+
12 Ndazamuchitiska kuti munthu wazisoŵengi kuluska golidi wakuyengetulika umampha ukongwa,+Ndipuso ndazamuchitiska kuti ŵanthu azisoŵengi kuluska golidi wa ku Ofiri.+
13 Ndichu chifukwa chaki ndazamuchitiska kuti machanya ngazimbwambwanthiyi,Ndipuso kuti charu chapasi chizisukunyiki ndi kutuwamu mumalu mwaki+Chifukwa cha ukali waku Yehova wa mizinda mu zuŵa la ukali waki wakukole.
14 Nge mbaŵa yo atiyiŵinga kweniso nge mskambu wambula munthu wakuwuwunganisa,Weyosi wazamuwere ku ŵanthu ŵaki;Weyosi wazamuthaŵiya kucharu chaki.+
15 Weyosi yo wazamusanirika wazamugwazika,Ndipu weyosi yo wazamukoleka wazamubayika ndi lipanga.+
16 Ŵana ŵawu azamumbofyoleka pasi ndi kuvikitika yiwu achiwona,+Vinthu va munyumba zawu vazamutoleka,Ndipu ŵanthu anyaki azamukolere awolu ŵawu.
17 Ndiŵayuskiyengi Amedi kuti aziŵayukiyi,+Yiwu alivi nayu ntchitu silivaNdipuso akondwa cha ndi golidi.
18 Mauta ngawu ngazamubaya anyamata;+Yiwu azakuchichitiya chitima cha chipasu cha nthumbuPamwenga kuchitiya lisungu ŵana.
19 Ndipu Babiloni, yo we ndi unkhankhu ukulu ukongwa pa maufumu,*+Yo nkhutowa kweniso kujikuzga kwa Akadiya,+Wazamuja nge matawuni nga Sodomu ndi Gomora, pa nyengu yo Chiuta wangungabwanganduwa.+
20 Mu Babiloni mwazamuja so ŵanthu cha,Ndipu iyu wazamuja malu ngakujamu ŵanthu cha mu migonezi yosi.+
Muarabu wazamujinthamu cha hema laki,Ndipu aliska azamupumuzgamu cha miskambu yawu.
21 Vamoyu va muchipalamba vazamugonanga mwenimo;Nyumba zawu zazamuzaza ndi amantchichi.
Nthiŵatiŵa zazamujanga mwenimo,+Ndipu mbuzi zamudondu zazamundwikangandwikanga* mwenimo.
22 Vamoyu vakukambula vazamuliyanga mutinyumba taki takuthopoka,Ndipu akambwi azamuliyanga munyumba zaki zachifumu zakutowa.
Nyengu yaki ye pafupi, ndipu mazuŵa ngaki ngasazgikiyengeku cha.”+
Mazu Ngam'mphata
^ Pamwenga kuti, “polu lachiziŵisu.”
^ Mazu ngaki chayingu, “asoskiyeni.”
^ Mazu ngaki chayingu, “wo ndatowesa.”
^ Mazu ngaki chayingu, “kweniso magulu ngaki nga nyenyezi nga Kesili,” panyaki ang’anamuwa gulu la nyenyezi la Oriyoni pamwenga magulu nga nyenyezi ngapafupi.
^ Pamwenga kuti, “yo nkhutowa kwa maufumu.”
^ Yapa pangafwatulikiya so kuti, “Ndipu viŵanda vakukozgana ndi mbuzi vazamundwikangandwikanga.”
