Yeremiya 7:1-34

  • Asere munyumba yaku Yehova uku achita vinthu viheni (1-11)

  • Nyumba yakusopiyamu yijengi nge Shilo (12-15)

  • Chiuta wakana kusopa kwaboza (16-34)

    • Asopa “Fumukazi ya Kuchanya” (18)

    • Apereka sembi ŵana ku Hinomu (31)

7  Yehova wangukambiya Yeremiya kuti:  “Ima pageti la nyumba yaku Yehova ndipu pharazga uthenga wakuti, ‘Vwiyani mazu ngaku Yehova yimwi ŵanthu wosi a ku Yuda, yimwi musere pamageti yanga kuti musindamiyi Yehova.  Yehova wa mizinda, Chiuta waku Isirayeli wakamba kuti: “Sinthani nthowa zinu kweniso vakuchita vinu, ndipu ndikuzomerezeningi kuti mulutirizgi kuja mucharu ichi.+  Lekani kuthemba mazu nginu ngaboza ndi kukamba kuti, ‘Iyi ndi nyumba yakusopiyamu yaku Yehova, nyumba yakusopiyamu yaku Yehova, nyumba yakusopiyamu yaku Yehova!’+  Pakuti asani musinthengi nadi nthowa zinu ndi vakuchita vinu; asani muyeruzgengi nadi mwaurunji mulandu wa pakati pa munthu ndi yo waja nayu pafupi;+  asani mukandirizgengi cha alendu, ŵana alanda* ndi vyoko;+ asani mudirengi cha ndopa za munthu wambula kunanga mucharu ichi; ndipuso asani mulekengi kulondo achiuta anyaki, vo vingachitiska kuti mupwetekeki;+  mbwenu ndikuzomerezeningi kuti mulutirizgi kuja mucharu ichi, charu cho ndikuchipereka kwa apapi ŵinu akali kuti chije chawu mpaka muyaya.”’”  “Kweni muthemba mazu ngaboza+ ngo ngangakuwovyani cha chinanga nkhamanavi.  Kumbi mungaba,+ kubaya ŵanthu, kuchita chigololu, kulapizga vinthu vaboza,+ kupereka sembi* kwaku Bala,+ ndi kulondo achiuta wo mukuŵaziŵapu cha, 10  pavuli paki mbwenu mutuza ndi kuma pa masu pangu munyumba iyi yo yidanika ndi zina langu ndi kukamba kuti, ‘Titaskikengi,’ chinanga kuti muchita vinthu vaukazuzi vosi ivi? 11  Kumbi nyumba iyi, yo yidanika ndi zina langu yasambuka mphanji ya ankhungu mu masu mwinu?+ Ndajiwone ndija,” Yehova ndiyu wakamba. 12  “‘Chinanga kuti vingaŵa viyo, lutani kumalu ngangu ku Shilo,+ ko pakwamba ndinguchitiska kuti kuje zina langu,+ ndipu kawoneni vo ndinguchita nangu chifukwa cha uheni wa ŵanthu ŵangu Ayisirayeli.+ 13  Kweni mungulutirizga kuchita vinthu vosi venivi,’ Yehova ndiyu wakamba, ‘ndipu chinanga kuti ndalongoronga namwi mwakuwerezawereza,* mwavwanga cha.+ Ndakudananingi, kweni mwamukanga cha.+ 14  Mwaviyo, nge mo ndinguchitiya ndi Shilo,+ ndimu so ndichitiyengi ndi nyumba yo yidanika ndi zina langu,+ yo muthemba+ ndipuso ndimu ndichitiyengi ndi malu yanga ngo ndikupereka kwaku yimwi kweniso kwa apapi ŵinu akali. 15  Ndikutuzgeningipu pa masu pangu nge mo ndingutuzgiyapu abali ŵinu wosi, ŵana wosi aku Efurayemu.’+ 16  “Kweni yiwi, ungaŵapempheriyanga cha ŵanthu yaŵa. Ungaŵaliriyanga cha, ungaŵapempheriyanga cha ndipuso ungaŵaŵeyeriyanga cha kwaku ini,+ pakuti ndikuvwisiyengi cha.+ 17  Kumbi uwona cha vo yiwu achita mumatawuni nga ku Yuda kweniso mumisewu ya mu Yerusalemu? 18  Ŵana adeŵa nkhuni, ada apemba motu, ama akasa fulawu kuti apangi makeki kuti angapereki nge sembi ku Fumukazi ya Kuchanya,*+ ndipu apunguliya achiuta anyaki sembi za chakumwa kuti andikwiyisi.+ 19  ‘Kumbi yiwu apweteka ini?’* Yehova ndiyu wakamba. ‘Asi atijipweteka ŵija, ndi kujilengesa?’+ 20  Mwaviyo, Yehova Ambuya Fumu Yikulu wakamba kuti, ‘Awonani! Ukali wangu kweniso kukwiya kwangu vipungulikiyengi pacharu ichi,+ paŵanthu ndi panyama, pavimiti va mumunda kweniso pavipasu va pacharu chapasi; ukali wangu ukoliyengi ndipu wazamuzimwika cha.’+ 21  “Yehova wa mizinda, Chiuta waku Isirayeli wakamba kuti, ‘Lutirizgani, pa sembi zinu zinyaki, sazganipu sembi zinu zakupiriza zamphumphu, ndipu ryani nyama yaki.+ 22  Pakuti pa zuŵa lo ndingutuzgiya apapi ŵinu akali mucharu cha Ijipiti, ndinguŵakambiya cha pamwenga kuŵalamula vakukwaskana ndi sembi zakupiriza zamphumphu kweniso sembi zinyaki.+ 23  Kweni ndinguŵalamula kuti: “Muvwiyengi mazu ngangu ndipu ndijengi Chiuta winu, ndipu yimwi mujengi ŵanthu ŵangu.+ Muyendengi munthowa zosi zo nditikulamulani kuti vinthu vikuyendiyeni umampha.”’+ 24  Kweni yiwu anguvwisiya cha pamwenga kukhazaku gutu lawu;+ mumalu mwaki, angwenda mwakukoliyana ndi maŵanaŵanu ngawu,+ anguchita mtafu ndi kulondo mtima wawu uheni, ndipu anguwere vuli, anguluta kunthazi cha, 25  kutuliya pa zuŵa lo apapi ŵinu akali angutuliya mucharu cha Ijipiti mpaka msanawale.+ Mwaviyo, ndakutumiyaningi ateŵeti ŵangu wosi achimi, ndaŵatumanga zuŵa lelosi, mwakuwerezawereza.*+ 26  Kweni ŵanthu ŵangu angukana kundivwisiya ndipu angukhazaku cha gutu lawu.+ Mumalu mwaki anguchita mtafu,* ndipu anguchita vinthu viheni ukongwa kuluska vo apapi ŵawu akali anguchita! 27  “Wazakuŵakambiya mazu ngosi ngenanga,+ kweni azakukuvwisiya cha; wazakuŵadana, kweni azakukumuka cha. 28  Ndipu wazakuŵakambiya kuti, ‘Uwu ndi mtundu wo unguvwisiya cha mazu ngaku Yehova Chiuta wawu ndipuso ungukana kulonde chilangu. Kugomezgeka kwamala, ndipu kuzumbulika ndi kuzumbulika so cha pakati pawu.’*+ 29  “Meta sisi laku lambula kumeta* ndi kulitaya ndipu pamitunthu yambula kanthu umbi mwakukweza sumu yakumba pakuliya, pakuti Yehova wakana ndipuso wajowongi mugonezi uwu chifukwa chakuti wamukwiyisa. 30  ‘Pakuti ŵanthu a ku Yuda achita vinthu viheni pa masu pangu,’ Yehova ndiyu wakamba. ‘Yiwu amika angoza ŵawu akuseruska munyumba yo yidanika ndi zina langu kuti ayifipiski.+ 31  Yiwu azenga malu ngapachanya nga Tofeti, mu Dambu la Mwana Waku Hinomu*+ kuti awotchengi ŵana ŵawu anthulumi kweniso ŵana ŵawu anthukazi pamotu,+ chinthu cho ndikuŵalamulapu cha kweniso cho ndikuchiŵanaŵanapu cha mumtima mwangu.’+ 32  “‘Mwaviyo, awonani! mazuŵa ngatuza,’ Yehova ndiyu wakamba, ‘penipo malu ngo ngazamudanika so kuti Tofeti cha pamwenga Dambu la Mwana Waku Hinomu,* kweni ngazamudanika kuti Dambu Lakubayiyaku Ŵanthu. Yiwu azamuŵika ŵanthu akufwa ku Tofeti mpaka po malu ngosi ngamaliya.+ 33  Ndipu mathupi nga ŵanthu yaŵa ngazamuja chakurya cha viyuni vamude kweniso vinyama va pacharu chapasi ndipu palivi munthu yo wazakuvidikisa.+ 34  Mumatawuni nga ku Yuda kweniso mumisewu ya mu Yerusalemu, ndazamumalisa chiwawa cha kuzaya, chiwawa cha likondwa, mazu nga munthulumi mweneku wa nthengwa kweniso mazu nga mwali,+ pakuti charu cho chazamubwangandulika ndi kusambuka mahami.’”+

Mazu Ngam'mphata

Mazu ngaki chayingu, “ŵana ambula awusewu.”
Pamwenga kuti, “sembi za josi.”
Mazu ngaki chayingu, “chinanga kuti ndayukanga mlenjilenji zuŵa lelosi ndi kuŵatuma.”
Zina laulemu la chiuta munthukazi yo Ayisirayeli akugaruka asopanga; panyaki wenga chiuta munthukazi wamwandanu.
Pamwenga kuti, “akwiyisa ini; ayambiya dala ini?”
Mazu ngaki chayingu, “ndayukanga mlenjilenji zuŵa lelosi ndi kuŵatuma.”
Mazu ngaki chayingu, “angumizga khosi lawu.”
Mazu ngaki chayingu, “ndipu kwadumulika pamulomu pawu.”
Pamwenga kuti, “sisi laku lakupaturika.”
Wonani Mazu ngo Ngakonkhoskeka, “Gehena.”
Wonani Mazu ngo Ngakonkhoskeka, “Gehena.”