Yeremiya 52:1-34

  • Zedekiya wagarukiya charu cha Babiloni (1-3)

  • Nebukadinezara wazingiliza Yerusalemu (4-11)

  • Tawuni kweniso nyumba yakusopiyamu vibwangandulika (12-23)

  • Ŵanthu atoleke ku ukapolu ku Babiloni (24-30)

  • Yehoyakini watuzgika mujeri (31-34)

52  Zedekiya+ wenga ndi vyaka 21 pa nyengu yo wangujaliya fumu, ndipu wangulamuliya kwa vyaka 11 ku Yerusalemu. Zina la anyina lenga Hamutali+ mwana munthukazi waku Yeremiya wa ku Libina.  Iyu wangulutirizga kuchita vinthu viheni pa masu paku Yehova, mwakukoliyana ndi vinthu vosi vo Yehoyakimu wanguchita.+  Venivi vachitikanga ku Yerusalemu ndipuso ku Yuda chifukwa cha ukali waku Yehova, mpaka po wanguŵadikisiya pa masu paki.+ Ndipu Zedekiya wangugarukiya fumu ya ku Babiloni.+  Mu chaka cha 9 cha ulamuliru waku Zedekiya, mu mwezi wa 10, pa zuŵa la 10 la mwezi wo, Nebukadinezara* fumu ya ku Babiloni wanguza limoza ndi asilikali ŵaki wosi kuzichita nkhondu ndi Yerusalemu. Yiwu angujintha msasa kweniso anguzenga mpanda wankhondu kuzunguliya tawuni yo.+  Ndipu tawuni yo, yinguzingilizika mpaka mu chaka cha 11 cha ulamuliru wa Fumu Zedekiya.  Mu mwezi wachinayi, pa zuŵa la 9 la mwezi wo,+ nja yingukuwa ukongwa mutawuni yo, ndipu mwengavi chakurya chakuti ŵanthu a mucharu cho aryi.+  Pakumaliya, mpanda wa tawuni ungutoloreka, ndipu asilikali wosi anguthaŵa mutawuni yo ndi usiku kuziya pageti lo lenga pa mipanda yiŵi, pafupi ndi munda wa fumu, yiwu anguselere kunthowa ya ku Araba. Pa nyengu iyi, Akadiya ndipu azingiliza tawuni yo.+  Kweni asilikali ŵa Akadiya angutchimbiza Fumu Zedekiya+ ndipu anguchiyisaniya muvidika* va ku Yeriko. Magulu ngosi nga asilikali ŵaki nganguyithaŵa fumu.  Pavuli paki, yiwu anguko Zedekiya ndipu anguza nayu kwa fumu ya ku Babiloni ku Ribila mucharu cha Hemati, ndipu fumu ya ku Babiloni yingumuyeruzga. 10  Ndipu fumu ya ku Babiloni yingubaya ŵana anthulumi aku Zedekiya mweneku wachiwona, ndipu yingubaya so alongozgi wosi a ku Yuda kwenuku ku Ribila. 11  Pavuli paki, fumu ya ku Babiloni yingutolo masu ngaku Zedekiya,+ yingumumanga ndi simbi zamkuŵa ndi kuluta nayu ku Babiloni, ndipu yingumujaliya mujeri mpaka pa zuŵa lo wangufwiya. 12  Mu mwezi wachinkhondi, pa zuŵa la 10 mu mwezi wenuwu, kung’anamuwa mu chaka cha 19 cha ulamuliru waku Nebukadinezara fumu ya ku Babiloni, Nebuzaradani yo wenga mura wa asilikali wo avikiliyanga fumu, kweniso yo wenga mteŵeti wa fumu ya ku Babiloni, wanguza ku Yerusalemu.+ 13  Nebuzaradani wanguwotcha nyumba yaku Yehova,+ nyumba ya fumu kweniso nyumba zosi za mu Yerusalemu. Iyu wanguwotcha so nyumba yeyosi yikulu. 14  Pavuli paki, gulu losi la asilikali ŵa Akadiya lo lenga ndi mura wa asilikali wo avikiliyanga fumu, linguwisiya pasi mpanda wosi wa Yerusalemu.+ 15  Nebuzaradani yo wenga mura wa asilikali wo avikiliyanga fumu, wangutole ku ukapolu anyaki mwa ŵanthu akusika ndipuso ŵanthu wosi wo angujaku mutawuni yo. Iyu wanguto so ŵanthu wo anguthaŵiya ko kwenga fumu ya ku Babiloni ndipuso ŵanthu wosi alusu.+ 16  Kweni Nebuzaradani, mura wa asilikali wo avikiliyanga fumu, wangusiyaku ŵanthu wo ŵenga akavu ukongwa mucharu cho, kuti aphweriyengi minda ya mphereska kweniso kuti agwirengi ntchitu ya ukapolu.+ 17  Akadiya anguphwanya vipilala vamkuŵa+ va nyumba yaku Yehova, anguphwanya so vakupingapu+ kweniso Nyanja yamkuŵa+ vo venga munyumba yaku Yehova, ndipu mkuŵa wa vinthu venivi anguluta nawu ku Babiloni.+ 18  Anguto so vakuyole vyotu, mafosholu, vakuzimwiya nyali, mbali zabakuli,+ makapu+ kweniso viyaŵi vosi vamkuŵa vo avigwiriskiyanga ntchitu pakuteŵete munyumba yakusopiyamu. 19  Mura wa asilikali wo avikiliyanga fumu, wanguto mabeseni,+ vakupaliya motu, mbali zabakuli, vakuyole vyotu, vakuŵikapu nyali,+ makapu ndipuso mbali zabakuli zo zenga zagolidi chayiyu ndipuso siliva chayiyu.+ 20  Kweni uzitu wa mkuŵa wa vipilala viŵi, Nyanja, ng’ombi 12 zamkuŵa+ zo zenga pasi pa Nyanja, ndipuso vakupingapu vo Fumu Solomoni yingupanga pa nyumba yaku Yehova, wenga ukulu ukongwa wakuti ungapimika cha. 21  Chipilala chechosi chenga chitali mamita pafufupi 8,* asani achizunguliza ndi chingwi chakupimiya, chakwananga mamita pafufupi ngankhondi;*+ ukhomi wa mkuŵa waki wenga masentimita pafufupi 7* ndipu chenga ndi zenji mukati. 22  Ndipu pachanya paki penga mutu wamkuŵa. Mutu wenuwu wenga utali mamita pafufupi ngaŵi,*+ ndipu vilepa kweniso vipasu va pomegiraneti* vo vinguzunguliya mutu wenuwu venga vamkuŵa. Chipilala chachiŵi chayanananga ndi chakwamba, ndipu nachu chenga ndi vipasu va pomegiraneti. 23  Mumphepeti mwa mutu wa chipilala chechosi mwenga vipasu 96 va pomegiraneti; ndipu vipasu vosi va pomegiraneti vo venga pavilepa vo, vengapu 100.+ 24  Mura wa asilikali wo avikiliyanga fumu wanguto so Seraya+ wasembi mura, Zefaniya+ yo wenga wasembi wachiŵi, kweniso alonda atatu a pakhomu.+ 25  Mu tawuni yo, wangutomu so nduna yimoza yo yawoneriyanga asilikali, abwezi a fumu akukwana 7 wo wanguŵasaniya mutawuni, mlembi wa mura wa asilikali yo wawunganisanga pamoza ŵanthu mucharu cho, kweniso anthulumi 60, kutuliya pa ŵanthu bweka wo ŵenga ŵeche mutawuni yo. 26  Nebuzaradani yo wenga mura wa asilikali wo avikiliyanga fumu, wanguto ŵanthu ŵenaŵa ndipu wanguluta nawu kwa fumu ya ku Babiloni ku Ribila. 27  Fumu ya ku Babiloni yingukhata ŵanthu ŵenaŵa ndipu yinguŵabayiya ku Ribila+ mucharu cha Hemati. Mwaviyo, Yuda wangutuwa mucharu chaki ndi kuluta ku ukapolu.+ 28  Yaŵa mbanthu wo Nebukadinezara wanguŵatole ku ukapolu: mu chaka cha 7, Ayuda 3,023.+ 29  Mu chaka cha 18 cha ulamuliru waku Nebukadinezara,+ ŵanthu 832 angutoleka ku Yerusalemu. 30  Mu chaka cha 23 cha ulamuliru waku Nebukadinezara, Nebuzaradani yo wenga mura wa asilikali wo avikiliyanga fumu, wangutole Ayuda ku ukapolu, wanguto ŵanthu 745.+ Ŵanthu wo angutoleke ku ukapolu angukwana 4,600 wosi pamoza. 31  Mu chaka cho Fumu Evili-merodaki ya ku Babiloni yingujaliya fumu, yingufwatuwa* Yehoyakini+ fumu ya ku Yuda ndipu yingumutuzga mujeri. Ivi vinguchitika mu chaka cha 37 cha ukapolu waku Yehoyakini fumu ya ku Yuda, mu mwezi wa 12, pa zuŵa la 25 la mwezi wo.+ 32  Evili-merodaki walongoronga nayu umampha Yehoyakini, ndipu mpandu waki waufumu wanguwukweza pachanya pa mipandu ya mafumu nganyaki ngosi ngo ngenga ndi iyu ku Babiloni. 33  Sonu Yehoyakini wanguzuwa vakuvwala vaki vamujeri, ndipu mu mazuŵa ngosi nga umoyu waki waryanga pa masu pa fumu. 34  Mu mazuŵa ngosi nga umoyu waki, Yehoyakini wapaskikanga chakurya kutuliya kwa fumu zuŵa lelosi, mpaka pa zuŵa lo wangufwiya.

Mazu Ngam'mphata

Zina ili lilembeka so kuti, “Nebukadirezara.”
Mazu ngaki chayingu, “muvidika vachipalamba.”
Mazu ngaki chayingu, “manja 18.” Janja limoza layanananga ndi masentimita 44.5. Wonani Fundu Zakukumaliya B14.
Mazu ngaki chayingu, “manja 12.” Wonani Fundu Zakukumaliya B14.
Mazu ngaki chayingu, “wenga nge usani wa vikumbu vinayi kuvisazga pamoza.” Usani wa chikumbu chimoza uyanana ndi masentimita 1.85. Wonani Fundu Zakukumaliya B14.
Mazu ngaki chayingu, “manja ngankhondi.” Wonani Fundu Zakukumaliya B14.
Anyaki atividana kuti vingoma vachizungu, chifukwa chakuti nje zaki ziwoneka nge vingoma.
Mazu ngaki chayingu, “yingutumphuska mutu waku.”