Yeremiya 39:1-18

  • Kubwangandulika kwa Yerusalemu (1-10)

    • Zedekiya wathaŵa kweniso wakoleka (4-7)

  • Aphwere Yeremiya (11-14)

  • Ebedi-meleki wavikilirika (15-18)

39  Mu chaka cha 9 cha ulamuliru wa Fumu Zedekiya ya ku Yuda, mu mwezi wa 10, Fumu Nebukadinezara* ya ku Babiloni ndi asilikali ŵaki wosi, anguza ku Yerusalemu, ndipu anguzingiliza tawuni yo.+  Mu chaka cha 11 cha ulamuliru waku Zedekiya, mu mwezi wachinayi, pa zuŵa la 9 la mwezi wo, yiwu angutolo mpanda wa tawuni yo.+  Ndipu alongozgi wosi akuzirwa a fumu ya ku Babiloni angusere mutawuni yo ndi kuja pasi pa Geti Lapakati,+ ndipu mazina ngawu ngenga yanga, Nega-sharezara yo wenga Samugari, Nebo-sarisekimu yo wenga Rabisarisi,* Nega-sharezara yo wenga Rabimagi,* kweniso alongozgi anyaki wosi a fumu ya ku Babiloni.  Fumu Zedekiya ya ku Yuda ndi asilikali wosi ŵati aŵawona, anguthaŵa,+ yiwu angutuwa mutawuni ndi usiku kuziya munthowa yakuluta kumunda wa fumu, angujumpha pa geti lo lenga pa mipanda yiŵi ndipu anguselere kunthowa ya ku Araba.+  Kweni asilikali a Akadiya anguŵaskera ndipu Zedekiya angumusaniya muvidika va Yeriko.+ Angumuko ndi kuluta nayu kwaku Nebukadinezara* fumu ya ku Babiloni ku Ribila+ mucharu cha Hemati,+ ko wangumuyeruzgiya.  Fumu ya ku Babiloni yingubaya ŵana aku Zedekiya ku Ribila, iyu wachilereska, kweniso fumu yaku Babiloni yingubaya ŵanthu wosi akuzirwa a ku Yuda.+  Pavuli paki, yingutolo masu ngaku Zedekiya ndipu yingumumanga ndi simbi zamkuŵa kuti aluti nayu ku Babiloni.+  Pavuli paki, Akadiya anguwotcha nyumba ya fumu kweniso nyumba za ŵanthu+ ndipuso anguwisiya pasi mpanda wa Yerusalemu.+  Nebuzaradani+ yo wenga mura wa asilikali wo avikiliyanga fumu, wangutole ku ukapolu ku Babiloni, ŵanthu wosi wo angujaliya mutawuni yo, ŵanthu wo anguthaŵiya kwaku iyu kweniso munthu weyosi yo wangujaku. 10  Kweni Nebuzaradani yo wenga mura wa asilikali wo avikiliyanga fumu, wangusiyamu ŵanthu akavu ukongwa mucharu cha Yuda, wo ŵengavi chechosi. Pa zuŵa lenili wanguŵapaska so minda ya mphereska ndipuso minda yinyaki kuti alimengi.*+ 11  Sonu Fumu Nebukadinezara ya ku Babiloni yingukambiya Nebuzaradani, yo wenga mura wa asilikali akuvikiliya fumu, vakukwaskana ndi Yeremiya kuti: 12  “Umuto ndipu umuphweriyengi, ungamuchitiyanga nkhaza cha ndipuso umupaskengi chechosi cho wakupempha.”+ 13  Sonu Nebuzaradani yo wenga mura wa asilikali akuvikiliya fumu, Nubushazibani yo wenga Rabisarisi,* Nega-sharezara yo wenga Rabimagi* ndipuso ŵanthu wosi akuzirwa a ku Babiloni angutuma ŵanthu 14  kuti akato Yeremiya mu Balaza la Alonda+ ndi kumupereka kwaku Gedaliya+ mwana waku Ahikamu,+ mwana waku Shafani+ kuti aluti nayu kunyumba yaki. Mwaviyo, Yeremiya wajanga pakati pa ŵanthu. 15  Pa nyengu yo Yeremiya angumujaliya mu Balaza la Alonda,+ Yehova wangulongoro nayu ndipu wangumukambiya kuti: 16  “Luta kwaku Ebedi-meleki+ wa ku Ifiyopiya ndipu ukamukambiyi kuti, ‘Yehova wa mizinda, Chiuta waku Isirayeli wakamba kuti: “Awona! ndifiska vo ndingukamba vakukwaskana ndi tawuni iyi kuti ndiyiwisiyengi soka, vinthu vamampha cha, ndipu mu zuŵa lenilo, wazamuwona venivi vichichitika.”’ 17  “‘Kweni mu zuŵa lenili, ndazakukutaska,’ Yehova ndiyu wakamba, ‘ndipu wazamuperekeka cha mu manja mwa ŵanthu wo utopa.’ 18  “‘Pakuti ndazakukutaska kwambula kutondeka, ndipu wazamubayika cha ndi lipanga. Wazamulonde umoyu waku nge vinthu vakuphangika ku nkhondu,*+ chifukwa chakuti unguthemba ini,’+ Yehova ndiyu wakamba.”

Mazu Ngam'mphata

Zina ili lilembeka so kuti, “Nebukadirezara.”
Pamwenga kuti, “Nega-sharezara, Samugari-nebo, Sarisekimu, Rabisarisi, mwakukoliyana ndi nthowa yinyaki yakugaŵiya mazu mu Chiheberi.”
Pamwenga kuti, “mura wa amasenga (wakusanda nyenyezi).”
Zina ili lilembeka so kuti, “Nebukadirezara.”
Yapa pangafwatulikiya so kuti, “wanguŵapaska ntchitu zaukapolu.”
Pamwenga kuti, “yo wenga mura wa nduna.”
Pamwenga kuti, “mura wa amasenga (wakusanda nyenyezi).”
Pamwenga kuti, “Wazamuthaŵa ndi umoyu waku.”