Yeremiya 36:1-32

  • Yeremiya wakamba mazu ngakuti ngalembeki mumpukutu (1-7)

  • Baruki waŵerenga mpukutu mwakukweza (8-19)

  • Yehoyakimu wawotcha mpukutu (20-26)

  • Uthenga ulembeka mumpukutu wufya (27-32)

36  Mu chaka chachinayi cha ulamuliru waku Yehoyakimu+ mwana waku Yosiya, fumu ya ku Yuda, Yehova wangukambiya Yeremiya kuti:  “To mpukutu ndipu ulembemu mazu ngosi ngo ndakukambiya ngakukwaskana ndi Isirayeli, Yuda+ kweniso mitundu yosi ya ŵanthu,+ kutuliya pa zuŵa lakwamba lo ndingulongoro nawi mu mazuŵa ngaku Yosiya mpaka msanawale.+  Panyaki asani ŵanthu a munyumba ya ku Yuda avwa masoka ngosi ngo ndikhumba kuŵawisiya, angatuwaku ku nthowa zawu ziheni, kuti ndiŵagowoke kunanga kwawu ndipuso ubudi wawu.”+  Pavuli paki, Yeremiya wangudana Baruki+ mwana waku Neriya, ndipu Yeremiya wangukamba mazu ngosi ngo Yehova wangumukambiya ndipu Baruki wangungalemba mumpukutu.+  Sonu Yeremiya wangukambiya Baruki kuti: “Akundijaliya ndipu ndingasere cha munyumba yaku Yehova.  Mwaviyo, yiwi ndiwi uluti kuti ukaŵerengi mwakukweza mazu ngaku Yehova kutuliya mumpukutu wo ukulemba ndati ndakukambiya. Ukangaŵerengi pa masu pa ŵanthu panyumba yaku Yehova pa zuŵa la kufunga; ukaŵerenge ŵanthu wosi a ku Yuda wo ŵaza kutuliya mumatawuni ngawu.  Panyaki Yehova wangavwa pemphu lawu lakuti waŵachitiyi lisungu, ndipu weyosi waku yiwu wangatuwaku ku nthowa zaki ziheni, pakuti Yehova wakamba kuti walongongi ŵanthu yaŵa kukwiya kwaki kweniso ukali waki ukulu.”  Mwaviyo, Baruki mwana waku Neriya wanguchita vosi vo mchimi Yeremiya wangumulamula; iyu wanguŵerenga mwakukweza mazu ngaku Yehova nga mumpukutu wo, panyumba yaku Yehova.+  Sonu mu chaka chachinkhondi cha ulamuliru waku Yehoyakimu+ mwana waku Yosiya, fumu yaku Yuda, mu mwezi wa 9, ŵanthu wosi a mu Yerusalemu kweniso ŵanthu wosi wo anguza mu Yerusalemu kutuliya mumatawuni nga ku Yuda, anguŵakambiya kuti afungi pa masu paku Yehova.+ 10  Pavuli paki, Baruki wanguŵerenga mwakukweza mazu ngaku Yeremiya kutuliya mumpukutu panyumba yaku Yehova, muchipinda* chaku Gemariya+ mwana waku Shafani+ mlembi, mubalaza lakunena, pakhomu la geti lifya la nyumba yaku Yehova,+ pa masu pa ŵanthu wosi. 11  Mikaya mwana waku Gemariya, mwana waku Shafani, wati wavwa mazu ngosi ngaku Yehova kutuliya mumpukutu, 12  wangusikiya kunyumba ya fumu ndipu wangusere muchipinda cha mlembi. Alongozgi wosi anguja* pasi mwenimo. Mwenga Elishama+ mlembi, Delaya mwana waku Shemaya, Elinatani+ mwana waku Akibori,+ Gemariya mwana waku Shafani, Zedekiya mwana waku Hananiya ndipuso alongozgi anyaki wosi. 13  Mikaya wanguŵakambiya mazu ngosi ngo wanguvwa pa nyengu yo Baruki waŵerenganga mazu nga mumpukutu pa masu pa ŵanthu. 14  Pavuli paki, alongozgi wosi angutuma Yehudi mwana waku Netaniya, mwana waku Selemiya, mwana waku Kushayi kuti waluti kwaku Baruki kuti wakamukambiyi kuti: “Uzi kunu ndipu upingi mpukutu wo unguŵerenga pa masu pa ŵanthu wosi.” Baruki mwana waku Neriya wangupinga mpukutu kujanja laki ndipu wanguluta kwaku yiwu. 15  Yiwu angumukambiya kuti: “Ja pasi, ndipu utiŵerenge mwakukweza mazu ngo nge mumpukutu.” Mwaviyo, Baruki wanguŵawerenge mazu ngo. 16  Sonu ŵati avwa mazu ngosi, angulereskana mwamantha, ndipu angukambiya Baruki kuti: “Titenere kukambiya fumu mazu ngosi ngenanga kwambula kutondeka.” 17  Pavuli paki, angukambiya Baruki kuti: “Tikambiyi mo walembe mazu ngosi ngenanga. Kumbi Yeremiya ndiyu wakukambiya?” 18  Baruki wanguŵamuka kuti: “Iyu ndiyu wandikambiya mazu ngosi ngenanga ndipu ini ndangalemba ndi inki mumpukutu uwu.” 19  Alongozgi angukambiya Baruki kuti: “Yiwi ndi Yeremiya lutani kuti mukabisami ndipu munthu weyosi wangaziŵanga cha ko muli.”+ 20  Pavuli paki, yiwu angusere munyumba ya fumu, mubalaza, ndipu anguŵika mpukutu muchipinda chaku Elishama mlembi. Yiwu angukambiya fumu vosi vo anguvwa. 21  Mwaviyo, fumu yingutuma Yehudi+ kuti wakato mpukutu, ndipu iyu wanguchiwuto muchipinda chaku Elishama mlembi. Yehudi wangwamba kuŵerenga mpukutu wo pa masu pa fumu kweniso alongozgi wosi wo anguma pafupi ndi fumu. 22  Mwenga mu mwezi wa 9,* ndipu fumu yinguja munyumba yaki yakujamu mu nyengu yakuzizira, panthazi paki penga mbawula ya motu. 23  Asani Yehudi waŵerenga vigaŵa vitatu pamwenga vinayi va mpukutu wo, fumu yadumuwanga vigaŵa vo ndi chimayi cha mlembi ndipu yaviponyanga pamotu wo wakolenga mumbawula, mpaka mpukutu wosi ungumaliya pamotu wo wenga mumbawula. 24  Yiwu anguchita mantha cha; ndipu fumu kweniso ateŵeti ŵaki wosi wo anguvwa mazu ngo, angukeruwa cha vakuvwala vawu. 25  Chinanga kuti Elinatani,+ Delaya+ ndi Gemariya+ anguŵeyere fumu kuti yileki kuwotcha mpukutu wo, kweni fumu yinguŵavwiya cha. 26  Kweniso, fumu yingulamula Yerameli mwana wa fumu, Seraya mwana waku Aziriyeli ndipuso Selemiya mwana waku Abideli kuti akako Baruki mlembi ndi mchimi Yeremiya, kweni Yehova wanguŵabisa.+ 27  Fumu yati yawotcha mpukutu wo wenga ndi mazu ngo Baruki wangulemba ngakutuliya kwaku Yeremiya,+ Yehova wangukambiya so Yeremiya kuti: 28  “To mpukutu unyaki ndipu ulembemu mazu ngosi ngakuyanana ndi ngo ngenga mumpukutu wakwamba wo Yehoyakimu fumu ya ku Yuda yikuwotcha.+ 29  Ndipu ukakambiyi Yehoyakimu fumu ya ku Yuda kuti, ‘Yehova wakamba kuti: “Wawotcha mpukutu uwu ndi kukamba kuti, ‘Ntchifukwa wuli walembamu kuti: “Kwambula kutondeka, fumu ya ku Babiloni yizengi ndi kunanga charu ichi ndipu muŵengevi ŵanthu kweniso vinyama”?’+ 30  Mwaviyo, ivi ndivu Yehova wakamba vakukwaskana ndi Yehoyakimu fumu ya ku Yuda, ‘Pazamuŵavi munthu wa mubanja laki yo wazamuja pampandu waufumu waku Davidi,+ ndipu thupi laki lazamulekeka pa lumwi ndi msana kweniso pamalu ngakuzizira ndi usiku.+ 31  Iyu, ŵana ŵaki* ndi ateŵeti ŵaki ndazakuŵamba mulandu chifukwa cha kunanga kwawu, ndipu ndazamuwisiya paku yiwu, pa ŵanthu akuja mu Yerusalemu kweniso pa ŵanthu a ku Yuda masoka ngosi ngo ndinguŵakambiya kuti ngaŵawiyengi,+ kweni anguvwa cha.’”’”+ 32  Pavuli paki, Yeremiya wanguto mpukutu unyaki, wanguwupereka kwaku Baruki mwana waku Neriya, mlembi,+ ndipu wangulembamu mazu ngosi ngo Yeremiya wangumukambiya, ngo ngenga mumpukutu wo Yehoyakimu fumu ya ku Yuda wanguwotcha pamotu.+ Ndipu wangusazgiyamu so mazu nganyaki nganandi ngakuyanana ndi ngo ngenga mumpukutu wakwamba.

Mazu Ngam'mphata

Pamwenga kuti, “muchipinda chakuryiyamu.”
Pamwenga kuti, “Nduna zosi zinguja.”
Kwambiya pakati pa mwezi wa November mpaka pakati pa mwezi wa December. Wonani Fundu Zakukumaliya B15.
Mazu ngaki chayingu, “mbewu yaki.”