Yeremiya 35:1-19

  • Arekabu avwiya (1-19)

35  Yehova wangulongoro ndi Yeremiya mu mazuŵa ngaku Yehoyakimu+ mwana waku Yosiya, fumu ya ku Yuda, ndipu wangukamba kuti:  “Luta kunyumba ya Arekabu + ndipu ukalongoro nawu, ukasere nawu munyumba yaku Yehova, muchipinda chakuryiyamu; ndipu ukaŵapaski vinyu kuti akamwi.”  Mwaviyo, ndinguto Yazaniya mwana waku Yeremiya, mwana waku Habaziniya, abali ŵaki, ŵana ŵaki wosi, ndipuso nyumba yosi ya Arekabu,  ndipu ndingusere nawu munyumba yaku Yehova. Ndinguluta nawu muchipinda chakuryiyamu cha ŵana aku Hanani, mwana waku Igidaliya, munthu waku Chiuta wauneneska, cho chenga pafupi ndi chipinda chakuryiyamu cha alongozgi cho chenga pachanya pa chipinda chakuryiyamu chaku Maseya mwana waku Shalumu, mulonda wa pakhomu.  Pavuli paki, ndinguto makapu ndi vakumwiyamu vinyaki vakuzaza vinyu, ndinguviŵika panthazi pa anthulumi a munyumba ya Arekabu ndipu ndinguŵakambiya kuti: “Mwani vinyu yo.”  Kweni yiwu angukamba kuti: “Timwengi cha vinyu, chifukwa Yehonadabu*+ mwana waku Rekabu, mpapi widu wakali wakutilamula kuti, ‘Yimwi ndi ŵana ŵinu mungamwanga vinyu cha.  Mungazenganga nyumba cha, mungamijanga mbewu cha, kweniso mungalimanga cha minda ya mphereska pamwenga kuja nayu. Mumalu mwaki, nyengu zosi mujengi mumahema kuti muje ndi umoyu utali mucharu cho muja nge alendu.’  Mwaviyo, tivwiya mazu ngaku Yehonadabu mwana wa mpapi widu wakali Rekabu, pa vosi vo wakutilamula. Titumwa cha vinyu, isi, awolu ŵidu, ŵana ŵidu anthulumi kweniso ŵana ŵidu anthukazi.  Tizenga cha nyumba zakuti tijengemu kweniso tilivi minda ya mphereska, minda yinyaki pamwenga mbewu. 10  Tija mumahema ndipu tivwiya vosi vo Yehonadabu* mpapi widu wakali wakutilamula. 11  Kweni Nebukadinezara* fumu yaku Babiloni wati waza kuziyukiya charu ichi,+ tingukamba kuti, ‘Tiyeni tiluti ku Yerusalemu kuti tithaŵi asilikali a Akadiya ndipuso a ku Siriya,’ ndipu sonu tija mu Yerusalemu.” 12  Ndipu Yehova wangukambiya Yeremiya kuti: 13  “Yehova wa mizinda, Chiuta waku Isirayeli wakamba kuti, ‘Luta ku ŵanthu a ku Yuda ndipuso a ku Yerusalemu ndipu ukaŵakambiyi kuti: “Asi nyengu zosi ndakuchiskaningi kuti muvwiyengi mazu ngangu?”+ Yehova ndiyu wakamba. 14  “Yehonadabu mwana waku Rekabu wangulamula ŵana ŵaki kuti angamwanga vinyu cha, ndipu avwiya mazu ngaki mwakuleka kumwa vinyu mpaka msanawale. Yiwu avwiya dangu la mpapi wawu wakali.+ Kweni ini ndalongoro namwi mwakuwerezawereza* kweni mutindivwiya cha.+ 15  Ndakutumiyaningi ateŵeti ŵangu wosi achimi, ndaŵatumanga mwakuwerezawereza,*+ ndipu akukambiyaningi kuti, ‘Chondi, tuwaniku ku nthowa zinu ziheni,+ chitani cho ntchamampha! Mungalondonga achiuta anyaki cha ndi kuŵateŵete. Ndipu mulutirizgengi kuja mucharu cho ndikuchipereka kwaku yimwi kweniso kwa apapi ŵinu akali.’+ Kweni mungukhazaku cha gutu linu pamwenga kundivwiya. 16  Ŵana aku Yehonadabu mwana waku Rekabu avwiya dangu lo mpapi wawu wakali wakuŵapaska,+ kweni ŵanthu yaŵa atindivwiya cha.”’” 17  Mwaviyo, Yehova, Chiuta wa mizinda, Chiuta waku Isirayeli wakamba kuti: ‘Ŵanthu a ku Yuda kweniso a ku Yerusalemu ndiŵawisiyengi soka lo ndinguŵatcheŵeska kuti ndazakuŵawisiya,+ pakuti ndingulongoro nawu kweni anguvwiya cha, ndipuso ndaŵadananga kweni amukanga cha.’”+ 18  Ndipu Yeremiya wangukambiya ŵanthu a munyumba ya Arekabu kuti: “Yehova wa mizinda, Chiuta waku Isirayeli wakamba kuti, ‘Chifukwa chakuti mwavwiya dangu la mpapi winu wakali Yehonadabu ndipuso mulutirizga kuvwiya marangu ngaki ngosi ndi kuchita vosi vo wakukulamulani, 19  Yehova wa mizinda, Chiuta waku Isirayeli wakamba kuti: “Vazamuchitikapu cha kuti mubanja laku Yehonadabu* mwana waku Rekabu muŵevi munthu wakuti wateŵetiyengi pa masu pangu.”’”

Mazu Ngam'mphata

Mazu ngaki chayingu, “Yonadabu,” ili ndi zina lakudumuwa lakutuliya ku zina lakuti Yehonadabu.
Mazu ngaki chayingu, “Yonadabu,” ili ndi zina lakudumuwa lakutuliya ku zina lakuti Yehonadabu.
Zina ili lilembeka so kuti, “Nebukadirezara.”
Mazu ngaki chayingu, “Kweni ini ndayukanga mlenjilenji ndi kulongoro namwi.”
Mazu ngaki chayingu, “ndayukanga mlenjilenji ndi kuŵatuma.”
Mazu ngaki chayingu, “Yonadabu,” ili ndi zina lakudumuwa lakutuliya ku zina lakuti Yehonadabu.