Yeremiya 25:1-38
25 Yanga ndi mazu ngakukwaskana ndi ŵanthu wosi a ku Yuda, ngo nganguza kwaku Yeremiya mu chaka chachinayi cha ulamuliru waku Yehoyakimu+ mwana waku Yosiya, fumu ya ku Yuda, cho chenga chaka chakwamba cha ulamuliru waku Nebukadinezara,* fumu ya ku Babiloni.
2 Ivi ndivu Yeremiya mchimi wangukamba vakukwaskana ndi* ŵanthu wosi a ku Yuda kweniso ŵanthu wosi wo aja ku Yerusalemu:
3 “Kwambiya mu chaka cha 13 cha ulamuliru waku Yosiya+ mwana waku Amoni, fumu ya ku Yuda mpaka msanawale, kwa vyaka 23 venivi, Yehova waja wachilongoro nani, ndipu ndakukambiyaningi mwakuwerezawereza* kweni mwavwisiyanga cha.+
4 Ndipu Yehova wakutumiyaningi ateŵeti ŵaki wosi achimi, waŵatumanga mwakuwerezawereza,* kweni mwavwisiyanga cha pamwenga kukhazaku gutu linu kuti muvwi.+
5 Yiwu akambanga kuti, ‘Chondi, tuwaniku ku nthowa zinu ziheni ndipuso ku vinthu viheni vo muchita;+ asani muchitengi viyo mujengi kwa nyengu yitali mucharu cho Yehova wakuchipereka kali ukongwa kwaku yimwi kweniso kwa apapi ŵinu akali.
6 Mungalondonga achiuta anyaki cha, kuŵateŵete ndi kuŵasindamiya, ndipuso mungandikwiyisanga cha ndi ntchitu za manja nginu; asani muchitengi viyo, ndikuwisiyeningi soka.’
7 “‘Kweni mwandivwiyanga cha,’ Yehova ndiyu wakamba. ‘Mumalu mwaki, mwandikwiyisanga ndi ntchitu za manja nginu ndi kujidaniya soka.’+
8 “Mwaviyo, Yehova wa mizinda wakamba kuti: ‘“Chifukwa chakuti munguvwiya cha mazu ngangu,
9 ndidana mabanja ngosi nga kunkhondi,”*+ Yehova ndiyu wakamba, “ndidana Nebukadinezara fumu ya ku Babiloni, mteŵeti wangu,+ ndipu ndiŵatumengi kuti ayukiyi charu ichi,+ ŵanthu wo ajamu kweniso mitundu yosi yapafupi.+ Ndikunangeningi limoza ndi mitundu yeniyi ndipu ndikusambuseningi chinthu chakuchitiska mantha, chinthu chakuchimbiya khwelu kweniso mahami ngamuyaya.
10 Ndazamumalisa chiwawa cha kuzaya, chiwawa cha likondwa pakati pawu,+ mazu nga munthulumi mweneku wa nthengwa, mazu nga mwali,+ chiwawa cha pachakuperiyapu kweniso ndazamuzimwa ukweru wa nyali.
11 Charu chosi ichi chazamusambuka mahami kweniso chinthu chakuchitiska mantha, ndipu mitundu iyi yazamuteŵete fumu ya ku Babiloni kwa vyaka 70.”’+
12 “‘Kweni asani vyaka 70 vazikwana,+ ndazamukumba mulandu* fumu ya ku Babiloni ndipuso charu chaki chifukwa cha kunanga kwawu,’+ Yehova ndiyu wakamba, ‘ndazamuchitiska kuti charu cha Akadiya chije mahami mpaka muyaya.+
13 Ndifiskengi mazu ngangu ngosi ngo ndingukamba ngakukwaskana ndi charu chenichi, vosi vo vikulembeka mubuku ili vo Yeremiya wangukambiya limu kuti vichitikiyengi mitundu yosi.
14 Pakuti mitundu yinandi ndipuso mafumu nganthazi+ ngazakuŵasambusa akapolu+ ndipu ndazakuŵaweze mwakukoliyana ndi vakuchita vawu kweniso ntchitu za manja ngawu.’”+
15 Pakuti Yehova Chiuta waku Isirayeli wangundikambiya kuti: “Uto kapu iyi ya vinyu wa ukali ku janja langu, ndipu ukamwisi mitundu yosi yo ndikutumengeku.
16 Yiwu amukumwa ndi kumbendyambendya kweniso kuchita vinthu nge ŵanthu akufuntha chifukwa cha lipanga lo nditiŵatumiya.”+
17 Mwaviyo, ndinguto kapu ku janja laku Yehova ndipu ndingumwisa mitundu yosi yo Yehova wangunditumaku:+
18 kwambiya Yerusalemu kweniso matawuni nga Yuda,+ mafumu ngaki ndi alongozgi ŵaki akuzirwa kuti visambuki mahami, chinthu chakuchitiska mantha, chinthu chakuchimbiya khwelu kweniso kuti vitembeki+ nge mo viliri msanawale;
19 pavuli paki, Farawo fumu ya ku Ijipiti ndi ateŵeti ŵaki, alongozgi ŵaki akuzirwa ndi ŵanthu ŵaki wosi,+
20 kweniso ŵanthu akupambanapambana; mafumu ngosi nga mucharu cha Uzi; mafumu ngosi nga mucharu cha Afilisiti,+ Ashikeloni,+ Gaza, Ekironi kweniso ŵanthu a ku Ashidodi wo akujaku;
21 Edomu,+ Mowabu+ ndipuso Aamoni;+
22 mafumu ngosi nga ku Turo, mafumu ngosi nga ku Sidoni+ ndipuso mafumu nga muvirwa* va munyanja;
23 Dedani,+ Tema, Bazi kweniso ŵanthu wosi wo akucheketereza mwembi wawu wa mumbulukutu;+
24 mafumu ngosi nga ŵanthu a ku Arebiya+ ndipuso mafumu ngosi nga ŵanthu akupambanapambana wo aja muchipululu;
25 mafumu ngosi nga ku Zimuri, mafumu ngosi nga ku Elamu+ ndi mafumu ngosi nga Amedi;+
26 kweniso mafumu ngosi nga kunkhondi,* ngakutali ndipuso ngapafupi, yumozayumoza, kweniso maufumu ngosi nga pacharu chapasi; ndipu fumu ya ku Sheshaki*+ yazamukumwa pavuli pa mafumu ngosi ngenanga.
27 “Ndipu uŵakambiyi kuti, ‘Yehova wa mizinda, Chiuta waku Isirayeli wakamba kuti: “Mwani ndi kuloŵe, wukuwani ndi kuwa pasi kuti muleki kuyuka+ chifukwa cha lipanga lo nditikutumiyani.”’
28 Ndipu asani akana kuto kapu ku janja laku, uŵakambiyi kuti, ‘Yehova wa mizinda wakamba kuti: “Mutenere kumwa!
29 Pakuti awonani! Asani ndiyambengi kuwisiya soka pa tawuni yo yidanika ndi zina langu,+ kumbi yimwi mutenere cha kulangika?”’+
“‘Mulekengi cha kulangika pakuti ndidana lipanga kuti liyukiyi ŵanthu wosi wo aja pacharu chapasi,’ Yehova wa mizinda ndiyu wakamba.
30 “Ukaŵakambiyi mazu ngosi nga uchimi ngenanga ndipu ukakambi kuti,‘Yehova wabangulengi kutuliya kuchanya,Ndipu mazu ngaki ngavwikengi kutuliya kumalu ngaki ngakujaku ngakupaturika.
Iyu wabanguliyengi malu ngaki ngakujaku.
Wadanirizengi nge ŵanthu wo akanda mphereska pamalu ngakukandiyapu mphereska,Wambengi mwakukondwa wachichita nkhondu ndi ŵanthu wo aja pacharu chapasi.’
31 ‘Chiwawa chivwikengi kuvigoti va charu chapasi,Pakuti Yehova watumba mulandu mitundu ya ŵanthu.
Iyu wayeruzgengi ŵanthu wosi.+
Ndipu ŵanthu aheni waŵabayengi ndi lipanga,’ Yehova ndiyu wakamba.
32 Yehova wa mizinda wakamba kuti:
‘Awonani! Soka lituwa ku mtundu unyaki kuluta ku mtundu unyaki,+Ndipu chimphunga chikulu chituwengi kuvigaŵa vakutali ukongwa va charu chapasi.+
33 “‘Ndipu mu zuŵa lo, mathupi nga ŵanthu wo azamubayika ndi Yehova ngazamutuwa kuchigoti chinyaki kufika kuchigoti chinyaki cha charu chapasi. Ŵanthu azakuŵaliya cha ndipu mathupi ngawu ngazamuwunjikika cha pamwenga kuŵikika mudindi. Ngazamuja nge manyowa pacharu chapasi.’
34 Liyani, yimwi aliska, liyani ukongwa!
Kunkhulukani, yimwi ŵanthu akuzirwa a mumskambu,Chifukwa nyengu yakuti mubayiki kweniso kuti mumbininiskiki yafika,Ndipu muwengi pasi nge chiyaŵi chakuzirwa!
35 Aliska alivi malu ngakuthaŵiyaku,Ndipu ŵanthu akuzirwa a mumskambu athaŵengi cha.
36 Avwani kuliya kwa aliskaKweniso chitenje cha ŵanthu akuzirwa a mumskambu,Pakuti Yehova wananga malu ngawu ngakuliskaku viŵetu,
37 Ndipu malu ngakujamu ngachimangu ngasambuka malu ngambula chamoyu chechosiChifukwa cha ukali wakukole waku Yehova.
38 Iyu waleka mphanji yaki nge nkharamu yimana,*+Pakuti charu chawu chasambuka chinthu chakuchitiska manthaChifukwa cha lipanga lankhazaNdipuso chifukwa cha ukali waki wakukole.”
Mazu Ngam'mphata
^ Zina ili lilembeka so kuti, “Nebukadirezara.”
^ Pamwenga kuti, “wangukambiya.”
^ Mazu ngaki chayingu, “ndipu ndayukanga mlenjilenji ndi kulongoro namwi.”
^ Mazu ngaki chayingu, “wayukanga mlenjilenji ndi kuŵatuma.”
^ Anyaki akamba kuti, “kumpotu.”
^ Pamwenga kuti, “ndazamulanga.”
^ Anyaki akamba kuti, “muvilumba.”
^ Anyaki akamba kuti, “kumpotu.”
^ Viwoneka kuti ili ndi zina linyaki la Babele (Babiloni) kweni lalembeka mu nthowa yinyaki.
^ Pamwenga kuti, “nkharamu yimana yanthazi.”
