Yeremiya 20:1-18

  • Pasuri wapuma Yeremiya (1-6)

  • Yeremiya wangaleka cha kupharazga (7-13)

    • Mazu ngaku Chiuta nge nge motu (9)

    • Yehova we nge chinkhara chakofya (11)

  • Yeremiya wadandawula (14-18)

20  Sonu Pasuri mwana waku Ima, wasembi, yo so wenga wakuwonere mura wa nyumba yaku Yehova, wavwisiyanga Yeremiya wachikamba mauchimi ngenanga.  Pavuli paki, Pasuri wangupuma mchimi Yeremiya ndipu wangumumanga mumatangaza+ ngo ngenga ku Geti la Kunena Laku Benjamini, lo lenga pafupi ndi nyumba yaku Yehova.  Kweni mawa laki, Pasuri wati wafwatuwa Yeremiya mumatangaza, Yeremiya wangumukambiya kuti: “Yehova wasintha zina laku, mumalu mwakukudana kuti Pasuri, wakudana zina lakuti, Chakuchitiska Mantha Peposi.+  Pakuti Yehova wakamba kuti, ‘Ndikusambusengi chinthu chakofya kwaku wamweni, kweniso kwa abwezi ŵaku wosi, ndipu azamubayika ndi lipanga la arwani ŵawu yiwi uchilereska;+ ndazamupereka ŵanthu wosi a ku Yuda mu manja mwa fumu ya ku Babiloni, ndipu yazakuŵatole ku ukapolu ku Babiloni ndi kuŵabaya ndi lipanga.+  Ndazamupereka chuma chosi cha tawuni iyi, katundu waki yosi, vinthu vaki vosi vakuzirwa ndipuso chuma chosi cha mafumu nga ku Yuda, mu manja mwa arwani ŵawu.+ Ndipu yiwu azamuphanga vinthu vo ndi kuvito kuluta navu ku Babiloni.+  Kweni yiwi Pasuri ndi wosi wo aja munyumba yaku, mwazamutoleke ku ukapolu. Wazamuluta ku Babiloni ndi kuchifwiya kweniko ndipu wamuŵikika kweniko limoza ndi abwezi ŵaku, chifukwa chakuti waŵakambiya mauchimi ngaboza.’”+   Mwandiziziswa, yimwi Yehova, ndipu ndazizwa. Mwagwiriskiya ntchitu nthazi zinu paku ini ndipu mwaphara.+ Ndaja chinthu chakusekesa zuŵa losi;Munthu weyosi watindinyoza.+   Pakuti nyengu yeyosi yo ndilongoro, ndidaniriza kweniso kupharazga kuti,“Chiwawa ndipuso pharanyiku!” Pakuti mazu ngaku Yehova ngachitiska kuti ndinyozekengi ndi kuchomboleka zuŵa losi lamphumphu.+   Mwaviyo ndingukamba kuti: “Ndilekengi kumuzumbuwa,Ndipuso ndilongorongi so cha mu zina laki.”+ Kweni mumtima mwangu mazu ngaki ngenga nge motu wo awujaliya muviwanga vangu,Ndipu ndinguvuka kungasunga;Ndingutondeka kuzizipizga.+ 10  Pakuti ndinguvwa mphemerezu zinandi ziheni;Mantha ngangundizinga.+ Yiwu akambanga kuti: “Muchenyeni; tiyeni timuchenyi!” Munthu weyosi yo wandikhumbiyanga chimangu, wandilereskanga ŵaka ndichiwa, ndipu akambanga kuti:+ “Panyaki wachitengi vinthu mwambula zeru,Ndipu tingamuthereska ndi kumuweze nduzga.” 11  Kweni Yehova wenga ndi ini nge chinkhara chakofya.+ Ndichu chifukwa chaki wo atinditombozga azamuguŵa kweniso azakundithereska cha.+ Yiwu azamulengeseka ukongwa, pakuti vinthu vazakuŵayende umampha cha. Kulengeseka kwawu kwamuyaya kwazamuluwika cha.+ 12  Kweni yimwi, Yehova wa mizinda, musanda munthu murunji;Muwona maŵanaŵanu ngamukati* kweniso mtima.+ Ndizomerezeni kuti ndiwoni muchiŵaweze,+Pakuti mulandu wangu ndawupereka kwaku yimwi.+ 13  Mbiyani Yehova! Thamikani Yehova! Pakuti wataska munthu mukavu mu manja mwa ŵanthu wo achita vinthu viheni. 14  Litembeki zuŵa lo ndingubalikiya! Zuŵa lo ama angundibala lingatumbikikanga cha!+ 15  Watembeki munthu yo wanguza ndi uthenga wamampha kwa ada wakuti: “Muwolu winu wakubaliyani mwana munthulumi, mnyamata!” Vo vinguchitiska kuti yiwu akondwi ukongwa. 16  Munthu mwenuyu, waje nge matawuni ngo Yehova wangungabwanganduwa kwambula kungachitiya lisungu. Iyu wavwi kuliya ndi mlenji kweniso chiwawa chakutcheŵeska msana pakati. 17  Ntchifukwa wuli wanguleka kundibayiya munthumbu ya ama,Kuti ama asambuki dindi languNdipuso kuti alutirizgi kuja ndi nthumbu?+ 18  Ntchifukwa wuli ndingutuwa munthumbu ya amaKuti ndiwoni masuzgu kweniso chitima,Kuti ndimalizi mazuŵa ngangu ndi soni?+

Mazu Ngam'mphata

Pamwenga kuti, “maŵanaŵanu ngandimba.” Mazu ngaki chayingu, “sana.”