Yeremiya 19:1-15

  • Yehova wakambiya Yeremiya kuti waswi msuku (1-15)

    • Apereka sembi ŵana kwaku Bala (5)

19  Yehova wangukamba kuti: “Luta ku wakuwumba viŵiya ndipu ukaguli msuku.+ Uto anyaki mwa ŵara a ŵanthu kweniso anyaki mwa ŵara ŵa asembi,  ndipu muluti ku Dambu la Mwana Waku Hinomu,+ pakhomu la Geti la Madinga. Ndipu penipo ukapharazgi mazu ngo nditikukambiya.  Ukakambi kuti, ‘Vwani mazu ngaku Yehova, yimwi mafumu nga mu Yuda ndipuso ŵanthu wo aja mu Yerusalemu. Yehova wa mizinda, Chiuta waku Isirayeli wakamba kuti: “‘“Kwaja kamanavi kuti ndiwisi soka pamalu yanga, ndipu makutu nga munthu weyosi yo wavwengi vakukwaskana ndi soka lo, nganyenyengi.  Ndichitengi venivi chifukwa chakuti andijowo+ kweniso achitiska kuti malu yanga ngaleki kuziŵika.+ Mumalu ngenanga yiwu apereka sembi kwa achiuta anyaki, wo yiwu, apapi ŵawu akali kweniso mafumu nga ku Yuda akuŵaziŵapu cha, ndipu azaza malu ngenanga ndi ndopa za ŵanthu ambula kunanga.+  Yiwu azenge Bala malu ngapachanya kuti awotchengi ŵana ŵawu pamotu nge sembi zakupiriza zamphumphu kwaku Bala,+ chinthu cho ndikuŵalamulapu cha pamwenga kuŵakambiya kweniso cho ndikuchiŵanaŵanapu cha mumtima mwangu.”’+  “‘“Mwaviyo, awonani! mazuŵa ngatuza,” Yehova ndiyu wakamba, “penipo malu yanga ngazamudanika so kuti Tofeti cha pamwenga Dambu la Mwana Waku Hinomu, kweni ngazamudanika kuti Dambu Lakubayiyaku Ŵanthu.+  Ndazamutimbanyizga vo ŵanthu a ku Yuda kweniso ku Yerusalemu akhumba kuchita mumalu yanga, ndipu ndazakuŵabaya ndi lipanga pa masu pa arwani ŵawu kweniso azamubayika ndi ŵanthu wo akhumba kuŵabaya. Mathupi ngawu ndazakungapereka nge chakurya ku viyuni vamude kweniso ku vinyama va pacharu chapasi.+  Ndipu ndazamusambusa tawuni iyi kuja chinthu chakuchitiska mantha kweniso cho ŵanthu azakuchimbiya khwelu. Munthu weyosi yo wazamujumpha pafupi wazakuyilereseska mwamantha ndipu wazakuyimbiya khwelu chifukwa cha milili yaki yosi.+  Ndipu ndazamuchitiska kuti aryi ŵana ŵawu anthulumi kweniso ŵana ŵawu anthukazi, ndipu weyosi wazamukurya mnofu wa munyaki, chifukwa cha kuzingilizika kweniso kusoŵa chakuchita pa nyengu yo arwani ŵawu kweniso ŵanthu wo akhumba kuŵabaya azakuŵazingiliza.”’+ 10  “Pavuli paki ukaswi msuku wo, pa masu pa anthulumi wo alutengi nawi, 11  ndipu ukaŵakambiyi kuti, ‘Yehova wa mizinda wakamba kuti: “Ndimu so ndiswiyengi ŵanthu yaŵa kweniso tawuni iyi, nge munthu yo watuswa chiyaŵi cha wakuwumba kuti chileki kunozgeka so; ndipu azamuŵika ŵanthu akufwa ku Tofeti mpaka po malu ngosi ngakuti aŵikeku ŵanthu ngamaliya.”’+ 12  “Yehova wakamba kuti: ‘Venivi ndivu ndichitiyengi malu yanga kweniso ŵanthu wo ajamu, kuti tawuni iyi yije nge Tofeti. 13  Ndipu nyumba za mu Yerusalemu kweniso nyumba za mafumu nga ku Yuda zazamuja zakufipiskika nge malu yanga, nga Tofeti.+ Nyumba zosi zo pachanya paki aperekiyangapu sembi ku mzinda wakuchanya+ kweniso po apunguliyanga sembi za chakumwa kwa achiuta anyaki, zazamuja zakufipiskika.’”+ 14  Yeremiya wati waweku ku Tofeti ko Yehova wangumutuma kuti wakakambi uchimi, wanguma mubalaza la nyumba yaku Yehova ndipu wangukambiya ŵanthu wosi kuti: 15  “Yehova wa mizinda, Chiuta waku Isirayeli wakamba kuti, ‘Ndiwisengi masoka patawuni iyi kweniso pamatawuni ngosi ngapafupi. Ndiwisengi masoka ngosi ngo ndingukamba kuti ndiŵawisiyengi chifukwa chakuti anguchita mtafu ndipu angukana* kuvwiya mazu ngangu.’”+

Mazu Ngam'mphata

Mazu ngaki chayingu, “chifukwa chakuti angumizga makhosi ngawu kuti aleki.”