Yeremiya 10:1-25

  • Yehova wayanana cha ndi achiuta a mitundu ya ŵanthu (1-16)

  • Ŵe pafupi kubwangandulika ndi kutoleke ku ukapolu (17, 18)

  • Yeremiya waliya (19-22)

  • Pempheru la mchimi (23-25)

    • Munthu wanganyoloska cha maphazi ngaki (23)

10  Yimwi a munyumba yaku Isirayeli, vwani mazu ngo Yehova wakamba ngakususkana namwi.  Yehova wakamba kuti: “Lekani kusambira nthowa za mitundu ya ŵanthu,+Ndipu lekani kuchita mantha chifukwa cha visimikizu vakuchanyaChifukwa mitundu ya ŵanthu yichita navu mantha.+   Pakuti midawuku ya ŵanthu njambula ntchitu. Munthu walusu wadumuwa ŵaka chimiti mulisuwa,Ndipu watichisema ndi chidya* chaki.+   Atichidyoŵa ndi siliva kweniso golidi+Ndipu atichikhoma ndi mizumali mwakugwiriskiya ntchitu nyundu kuti chileki kuwa.+   Nge chakuwofye vinyama mumunda wa vinkhaka, yivu vingalongoro cha;+Atesa kuvinyamuwa, pakuti vingayenda cha.+ Mungaviwopanga cha pakuti vingapweteka munthu cha,Ndipuso vingachita chamampha chechosi cha.”+   Palivi yo wayanana ndi yimwi, yimwi Yehova.+ Ndimwi wapachanya ndipu zina linu ndikulu kweniso ndanthazi.   Ndiyani yo wangaleka kukuwopani, yimwi Fumu ya mitundu ya ŵanthu,+ pakuti ndimwi akwenere kuwopeka?Chifukwa pa ŵanthu wosi azeru wo ŵe pakati pa mitundu ya ŵanthu kweniso pakati pa maufumu ngawu ngosi,Palivi yo wayanana ndi yimwi.+   Wosi mbambula zeru kweniso mbazereza.+ Ulongozgi wakutuliya kuvimiti ngwambula ntchitu.+   Siliva wakupapatika wagulika kutuliya ku Tashishi+ ndipuso golidi wagulika kutuliya ku Ufazi,Ntchitu ya munthu walusu, ntchitu ya manja nga munthu wakusula visulu. Ativivwalika vakuvwala va wuzu wabuluu kweniso vaweya wa mbereri wapepo. Vosi vikupangika ndi ŵanthu alusu. 10  Kweni Yehova ndi Chiuta nadi. Iyu ndi Chiuta wamoyu+ kweniso Fumu yamuyaya.+ Chifukwa cha ukali waki charu chazamusukunyika,Ndipu palivi mitundu ya ŵanthu yo yazamuzizipizga kuchenya kwaki.+ 11  * Uŵakambiyi kuti: “Achiuta wo akupangapu cha kuchanya kweniso charu chapasiAzamumala pacharu chapasi ndipuso kusi kwa mitambu.”+ 12  Iyu ndiyu wakupanga charu chapasi ndi nthazi zaki,Ndiyu wakujalikiska charu ndi zeru zaki+Ndipuso ndiyu wakutambasuwa kuchanya ndi zeru zaki.+ 13  Asani mazu ngaki ngavwika,Maji nga kuchanya ngapoma,+Ndipu wachitiska kuti mitambu yikweri* kutuliya kuvigoti va charu chapasi.+ Wachitiska kuti malimphezi ngang’animi asani vuwa yituwa,*Ndipu watuzga mphepu munkhokwi zaki.+ 14  Munthu weyosi wachita vinthu mwambula zeru kweniso wakulongo kuti waziŵa vinthu cha. Munthu weyosi wakusula visulu wazamulengeseka chifukwa cha chikozgu chaki chakujoba;+Pakuti chikozgu chaki chachisulu,* ndi boza,Ndipu yivu vilivi mzimu.*+ 15  Yivu vaŵaka, ndi ntchitu yakwenere kunyozeka.+ Asani zuŵa lawu la chilangu laza, vazamumala. 16  Chigaŵa chaku Yakobe chiyanana cha ndi vinthu venivi,Pakuti iyu Ndiyu wakupanga vinthu vosi,Ndipu Isirayeli ndi nthonga ya chihara chaki.+ Zina laki ndi Yehova wa mizinda.+ 17  Wunjika katundu waku yo we pasi,Yiwi munthukazi yo wazingilizika. 18  Pakuti Yehova wakamba kuti: “Pa nyengu iyi, ndiponya kubwalu ŵanthu akuja mucharu ichi,+Ndipu ndichitiskengi kuti asuzgiki.” 19  Soka kwaku ini chifukwa cha kupwetekeka kwangu!+ Chilonda changu ntchakuti chingapo cha. Ndingukamba kuti: “Uwu mbutenda wangu nadi, ndipu nditenere kuwuzizipizga. 20  Hema langu labwangandulika, ndipu vingwi vosi va hema langu vadumulika.+ Ŵana ŵangu andileka ndipu kulivi.+ Palivi yo wajaku kuti watambasuwi hema langu pamwenga kusoska salu za hema langu. 21  Pakuti aliska achita vinthu mwambula kuŵanaŵana umampha,+Ndipuso afumba cha kwaku Yehova.+ Ndichu chifukwa chaki achita vinthu mwambula zeru,Ndipu miskambu yawu yosi yambininika.”+ 22  Avwani! Uthenga! Utuza! Kutuza chimtimbaheka chikulu kutuliya kucharu cha kunkhondi,*+Kuzisambusa matawuni nga ku Yuda kuja mahami, mphanji ya akambwi.+ 23  Ini ndiziŵa umampha, yimwi Yehova, kuti nthowa ya munthu ye mwaku iyu mweneku cha. Munthu yo watenda walivi nthazi zakunyoloske maphazi ngaki.+ 24  Ndichenyeni yimwi Yehova ndi cheruzgu chinu,Kweni kundichenya mu ukali winu cha,+ kuti ndileki kumaliya limu.+ 25  Punguliyani ukali winu pa mitundu ya ŵanthu yo yitikutoliyaniku kanthu cha+Kweniso pa mabanja ngo ngadaniya pa zina linu cha. Pakuti yiwu ameza Yakobe,+Amumeza mpaka kumumaliya limu,+Ndipu charu chaki achisambusa mahami.+

Mazu Ngam'mphata

Pamwenga kuti, “chipula.”
Pakwamba, vesi 11 lingulembeka mu Chiaramu.
Pamwenga kuti, “wachitiska kuti mvuchi ukweri.”
Yapa pangafwatulikiya so kuti, “Wajula mageti nga vuwa.”
Pamwenga kuti, “chachisulu chakusongono.”
Pamwenga kuti, “mvuchi.”
Anyaki akamba kuti, “kumpotu.”