Yeremiya 1:1-19
1 Yanga ndi mazu ngaku Yeremiya,* mwana waku Hilikiya, yumoza mwa asembi a ku Anatoti+ mucharu cha Benjamini.
2 Mazu ngaku Yehova nganguza kwaku Yeremiya mu mazuŵa ngaku Yosiya,+ mwana waku Amoni,+ fumu ya ku Yuda, mu chaka cha 13 cha ulamuliru waki.
3 Ndipu nganguza so mu mazuŵa ngaku Yehoyakimu,+ mwana waku Yosiya, fumu ya ku Yuda, mpaka kukumaliya kwa chaka cha 11 cha ulamuliru waku Zedekiya,+ mwana waku Yosiya, fumu ya ku Yuda, mpaka po Yerusalemu wangulutiya ku ukapolu mu mwezi wachinkhondi.+
4 Yehova wangulongoro nani ndipu wangukamba kuti:
5 “Ndingukuziŵa* ndechendakupangi munthumbu ya anyoku,+Ndipu ndingukutowesa* wechendaweku.*+
Ndingukusankha kuti uje mchimi ku mitundu ya ŵanthu.”
6 Kweni ini ndingukamba kuti: “A Yehova, Ambuya Fumu Yikulu!
Nde mujira kulongoro,+ pakuti nde mwana.”*+
7 Ndipu Yehova wangundikambiya kuti:
“Leka kukamba kuti, ‘Nde mwana.’
Pakuti utenere kuluta ku ŵanthu wosi wo ndikutumengeku,Ndipu utenere kuchikamba vosi vo ndikulamulengi.+
8 Ungawopanga cha chifukwa cha mo ŵanthu wo awoneke,+Pakuti Yehova wakamba kuti: ‘Ini nde nawi kuti ndikutaski.’”+
9 Sonu Yehova wangutambasuwa janja laki ndi kukwaska mulomu wangu.+ Ndipu Yehova wangundikambiya kuti: “Ndaŵika mazu ngangu mumulomu mwaku.+
10 Awona, ndakusankha msanawale kuti uje ndi mazaza pa mitundu ya ŵanthu kweniso pa maufumu, kuti uchesuwi ndi kuwisiya pasi, kuti ubwanganduwi ndi kupapasuwa, ndipuso kuti uzengi ndi kupanda.”+
11 Yehova wangulongoro nani so ndipu wangukamba kuti: “Yeremiya, uwonanji?” Ndingumuka kuti: “Ndiwona mphanda ya chimiti cha alimondi.”*
12 Yehova wangundikambiya kuti: “Vo wawona vauneneska nadi, pakuti nde masu kuti ndifiski mazu ngangu.”
13 Yehova wangulongoro nani kachiŵi, ndipu wangukamba kuti: “Uwonanji?” Sonu ndingumuka kuti: “Ndiwona mumphika* wo uŵira,* ndipu mulomu waki wasendemukiya kutali ndi kunkhondi.”*
14 Pavuli paki, Yehova wangundikambiya kuti:
“Soka lituliyengi kunkhondi,*Liwiyengi ŵanthu wosi wo aja pacharu.+
15 Pakuti Yehova wakamba kuti: ‘Ndidana mabanja ngosi nga maufumu nga kunkhondi,*+Ndipu yiwu azengi; weyosi waku yiwu wazamujalikiska mpandu waki waufumuPa mageti nga Yerusalemu,+Azamulimbana ndi mipanda yaki yosiNdipuso azamulimbana ndi matawuni ngosi nga ku Yuda.+
16 Ndipu ndazamupereka cheruzgu kwaku yiwu chifukwa cha uheni wawu wosi,Pakuti yiwu andijowo,+Kweniso apereka sembi za josi kwa achiuta anyaki+Ndipu asindamiya ntchitu za manja ngawu.’+
17 Kweni yiwi nozgeka kuchitapu kanthu,*Ndipu utenere kuluta ndi kuchiŵakambiya vinthu vosi vo ndikulamulengi.
Ungachitanga mantha cha chifukwa chaku yiwu,+Kuti ndileki kukuchitiska mantha pa masu pawu.
18 Pakuti msanawale ndakupanga kuja tawuni ya mpanda wakukho,Chipilala chachisulu kweniso mpanda wamkuŵa kuti ulimbani ndi charu chosi,+Kuti ulimbani ndi mafumu nga ku Yuda ndi alongozgi ŵaki akuzirwa,Kweniso kuti ulimbani ndi asembi ŵaki ndi ŵanthu a mucharu cho.+
19 Ndipu azamuchita nawi nkhondu,Kweni azakukuthereska cha,Pakuti Yehova wakamba kuti: ‘Ini nde nawi,+ kuti ndikutaski.’”
Mazu Ngam'mphata
^ Panyaki zina ili ling’anamuwa kuti, “Yehova Wakweza.”
^ Pamwenga kuti, “ndingukupatuwa.”
^ Mazu ngaki chayingu, “wechendatuwi munthumbu ya anyoku.”
^ Pamwenga kuti, “Ndingukusankha.”
^ Pamwenga kuti, “nde mnyamata.”
^ Mazu ngaki chayingu, “Ndiwona yo we masu.”
^ Pamwenga kuti, “mumphika wa mulomu usani.”
^ Mazu ngaki chayingu, “wo atiwuphutiriya,” kulongo motu wo atiwuphutiriya kusi.
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Mazu ngaki chayingu, “manga lamba muchiwunu chaku.”
