Wakutawula 8:1-17

  • Asani munthu wambula kufikapu walamuliya (1-17)

    • Vwiya marangu nga fumu (2-4)

    • Munthu wapweteka munthu munyaki pakumulamuliya (9)

    • Asani cheruzgu chaswera kuperekeka (11)

    • Munthu waryi, wamwi ndi kukondwa (15)

8  Ndiyani yo we nge munthu wazeru? Ndiyani yo waziŵa mo wangamalisiya suzgu?* Zeru za munthu zingweruska chisku chaki kweniso zilimbwitisa chisku chaki chaukali.  Ini ndititi: “Vwiya marangu nga fumu+ chifukwa cha vo ukulapizga pa masu paku Chiuta.+  Ungathaŵiriyanga cha kutuwapu pa masu paki.+ Ungachitiyanga ukaboni cha chinthu chechosi chiheni;+ pakuti fumu yo yingachita chechosi cho yakhumba,  chifukwa mazu nga fumu nganthazi.+ Ndiyani yo wangayifumba kuti, ‘Kumbi muchitanji?’”  Munthu yo wasunga dangu wapwetekekengi cha,+ ndipu mtima wazeru uziŵengi nyengu yakwenere kweniso ndondomeku yakuchitiya vinthu.*+  Pakuti chinthu chechosi che ndi nyengu yaki kweniso ndondomeku,*+ chifukwa masuzgu nga ŵanthu nganandi.  Palivi yo waziŵa vo vichitikengi, sonu kumbi ndiyani yo wangamukambiya mo vichitikiyengi?  Munthu walivi mazaza pa mzimu* kweniso wangawukaniza cha mzimu, mwakuyanana ŵaka, palivi munthu yo we ndi nthazi kuluska zuŵa la nyifwa.+ Palivi msilikali yo waleka kuchitaku nkhondu pa zuŵa la nkhondu, mwakuyanana ŵaka, uheni uzomerezengi cha kuti wo atiwuchita athaŵi.*  Vosi venivi ndaviwona, ndipu ndinguŵikapu mtima pa ntchitu yosi yo yachitika panu pacharu chapasi, pa nyengu yo munthu wapweteka munthu munyaki pakumulamuliya.+ 10  Sonu ndinguwona ŵanthu aheni achiwundika mudindi, ŵanthu wo aserenga ndi kutuwa mumalu ngakupaturika, kweni mu kanyengu kamanavi anguluwika mutawuni yo achitangamu venivi.+ Ivi navu vambula phindu. 11  Chifukwa chakuti cheruzgu chaswera kuperekeka pa ntchitu yiheni,+ mitima ya ŵanthu yajalikiskika pakuchita vinthu viheni.+ 12  Chinanga munthu wakubuda wangachita vinthu viheni maulendu 100 ndi kulutirizga kuja ndi umoyu kwa nyengu yitali, kweni ini ndiziŵa kuti ŵanthu wo atopa Chiuta wauneneska vinthu viŵayendiyengi umampha, chifukwa atimuwopa.+ 13  Kweni munthu muheni vinthu vimuyendiyengi umampha cha,+ kweniso wasazgiyengeku cha mazuŵa ngaki ngo nge nge chithuthuzi,+ chifukwa watimuwopa cha Chiuta. 14  Pe so chinthu chinyaki ichi chambula phindu* cho chichitika pacharu chapasi: Pe ŵanthu arunji wo ŵanthu atiŵachitiya vinthu nge kuti achita vinthu viheni,+ kweniso pe ŵanthu aheni wo ŵanthu atiŵachitiya vinthu nge kuti achita vinthu mwaurunji.+ Ini ndititi, venivi navu vambula phindu. 15  Mwaviyo, ndinguwona kuti nkhanthu kukondwa,+ pakuti palivi chinthu chamampha ku munthu panu pacharu chapasi kuluska kuti waryi, wamwi ndi kukondwa; venivi ndivu vitenere kumuchitikiya po wagwira ntchitu mwaphamphu mu mazuŵa nga umoyu waki,+ ngo Chiuta wauneneska wamupaska pacharu chapasi. 16  Ini ndinguŵikapu mtima kuti ndisaniyi zeru kweniso kuti ndiwoni ntchitu yosi yo yichitika pacharu chapasi,+ ndipu ndagonanga cha msana ndi usiku.* 17  Sonu ndinguŵanaŵaniya ntchitu yosi yaku Chiuta wauneneska, ndipu ndinguwona kuti ŵanthu angavivwisa cha vo vichitika pacharu chapasi.+ Chinanga ŵanthu angayesesa wuli, angavivwisa mbwenu cha. Chinanga angakamba kuti mbazeru ukongwa ndipu angaviziŵa, kweni yiwu angavivwisa nadi cha.+

Mazu Ngam'mphata

Pamwenga kuti, “yo wavwisa nkhani.”
Pamwenga kuti, “cheruzgu.”
Pamwenga kuti, “cheruzgu.”
Pamwenga kuti, “mvuchi; mphepu.”
Yapa pangafwatulikiya so kuti, “mwakuyanana ŵaka, uheni wawu ungaŵataska cha ŵanthu aheni.”
Pamwenga kuti, “chakukwiyisa.”
Yapa pangafwatulikiya so kuti, “ndipu ŵanthu atitiwona cha tulu msana pamwenga usiku.”