Wakutawula 11:1-10
11 Ponya* chiŵandi chaku pamaji,+ pakuti asani pajumpha mazuŵa nganandi uchisaniyengi so.+
2 Gaŵiyaku ŵanthu 7 pamwenga 8 vinthu vo we navu,+ pakuti uziŵa cha soka* lo lichitikengi pacharu chapasi.
3 Asani mitambu yazaza maji, yipunguliya vuwa pacharu chapasi; ndipu asani chimiti chawiya kumwera pamwenga kunkhondi,* pamalu po chimiti chawiya, ndipu chigonengi.
4 Munthu yo wawona mphepu wapandengi cha mbewu, ndipu yo walereska mitambu wavunengi cha.+
5 Nge mo uleke kuziŵa mo mzimu ugwiriya ntchitu muviwanga va mwana yo we* mukati mwa munthukazi wanthumbu,+ ndimu so uleke kuziŵa ntchitu yaku Chiuta wauneneska, yo wachita vinthu vosi.+
6 Mija mbewu zaku ndi mlenji ndipu janja laku lingapumuwanga cha mpaka mazulu;+ pakuti uziŵa cha yo yichitengi umampha, kwali ndi iyi pamwenga yiya, kweniso asani zosi zichitengi umampha.
7 Ukweru ngwakunozga, ndipu ntchinthu chamampha kuti masu ngawoni lumwi.
8 Pakuti asani munthu wangaja ndi umoyu vyaka vinandi, mulekeni wakondwi navu vosi.+ Kweni watenere kukumbuka kuti mazuŵa nga mdima ngangaŵa nganandi; vosi vo vizengi vambula phindu.+
9 Yiwi mnyamata, kondwa pa nyengu yo weche mnyamata, ndipu mtima waku ukondwi mu mazuŵa nga unyamata waku. Londo nthowa za mtima waku ndipu luta ko masu ngaku ngakulongozge; kweni ziŵa kuti Chiuta wauneneska wazakukuyeruzga* pa vinthu vosi venivi.+
10 Mwaviyo, tuzgamu vinthu vakusuzga mumtima mwaku, ndipu vinthu viheni vije kutali ndi liŵavu laku,* pakuti unyamata ndi unamana vilivi phindu.+
Mazu Ngam'mphata
^ Pamwenga kuti, “Tumiza.”
^ Pamwenga kuti, “suzgu.”
^ Anyaki akamba kuti, “kumpotu.”
^ Mazu ngaki chayingu, “muviwanga vo ve.”
^ Pamwenga kuti, “wazakukufumba.”
^ Mazu ngaki chayingu, “mnofu waku.”
