Numeri 25:1-18

  • Ayisirayeli achita ubudi ndi anthukazi aku Mowabu (1-5)

  • Finihasi wachitapu kanthu (6-18)

25  Pa nyengu yo Ayisirayeli ajanga ku Sitimu,+ yiwu angwamba kuchita ureŵi ndi ŵana anthukazi a ku Mowabu.+  Anthukazi wo, angudaniya Ayisirayeli ko aperekiyanga sembi kwa achiuta ŵawu,+ ndipu Ayisirayeli angwamba kurya ndi kusindamiya achiuta ŵawu.+  Mwaviyo, Ayisirayeli angwamba kusopaku* Bala wa ku Piyori+ ndipu Yehova wangukwiyiya Ayisirayeli.  Yehova wangukambiya Mozesi kuti: “Uto alongozgi wosi a ŵanthu yaŵa, uŵabayi ndi kuŵapayika lumwi le nyee,* pa masu paku Yehova, kuti ukali wakukole waku Yehova umali pa Ayisirayeli.”  Pavuli paki, Mozesi wangukambiya akweruzga ŵa Ayisirayeli kuti:+ “Weyosi waku yimwi wabayi ŵanthu ŵaki wo asopaku* Bala wa ku Piyori.”+  Kweni pa nyengu yeniyi, yumoza wa Ayisirayeli wanguza kwa abali ŵaki ndi munthukazi wa ku Midiyani,+ Mozesi ndipuso Ayisirayeli wosi achiwona.* Iyu wachiza, Ayisirayeli aliyanga pakhomu la chihema chakukumanaku.  Finihasi+ mwana munthulumi waku Eliyazara, mwana munthulumi waku Aroni wasembi, wati wawona venivi, nyengu yeniyo wangusoka kutuliya pakati pa Ayisirayeli* ndipu wangunyamuwa mkondu mujanja laki.  Pavuli paki, Finihasi wangulondo munthulumi wa ku Isirayeli mpaka muhema laki ndipu wangugwaza wosi ŵaŵi, munthulumi ndi munthukazi. Mkondu wo, unguporota pamalu ngakubisika nga munthukazi yo. Vati vaŵa viyo mulili wo unguwiya Ayisirayeli ungumala.+  Ŵanthu wo angufwa chifukwa cha mulili wenuwu, angukwana 24,000.+ 10  Pavuli paki, Yehova wangukambiya Mozesi kuti: 11  “Finihasi+ mwana munthulumi waku Eliyazara, mwana munthulumi waku Aroni wasembi, waweza ukali wangu pa Ayisirayeli chifukwa chakuti walekere cha wo alimbana ndi ini pakati pawu.+ Mwaviyo, ndaŵamala cha Ayisirayeli chinanga kuti ndikhumba kuti ŵanthu ajiperekengi kwaku ini pe.+ 12  Sonu umukambiyi kuti, ‘Nditimupaska phanganu lachimangu. 13  Iyu ndi mphapu yaki ateŵetiyengi nge asembi.+ Lenili lijengi phanganu lambula kumala chifukwa chakuti wazomereza cha kuti Ayisirayeli alimbani ndi Chiuta waki+ kweniso chifukwa chakuti wabenekere maubudi nga Ayisirayeli.’” 14  Munthulumi wa ku Isirayeli yo wangubayika limoza ndi munthukazi wa ku Midiyani wenga Zimuri mwana waku Salu, mulongozgi wa nyumba ya awisi ya fuku laku Simiyoni. 15  Munthukazi wa ku Midiyani yo wangubayika wenga Khozibi mwana munthukazi waku Zuri,+ mulongozgi wa mafuku nga nyumba ya awisi ku Midiyani.+ 16  Pavuli paki, Yehova wangukambiya Mozesi kuti: 17  “Usuzgi Amidiyani ndipuso uŵabayi,+ 18  chifukwa chakuti akusuzgani mwakukuchitiyani vinthu mwauryarya pa nkhani yakukwaskana ndi Piyori+ kweniso yakukwaskana ndi Khozibi mwana munthukazi wa mulongozgi wa ku Midiyani, mzichi wawu yo wangubayika+ pa zuŵa lo mulili unguwiya ŵanthu wo, chifukwa cha nkhani yakukwaskana ndi Piyori.”+

Mazu Ngam'mphata

Pamwenga kuti, “angwamba kujibatika kwaku.”
Mazu ngaki chayingu, “panthazi pa lumwi.”
Pamwenga kuti, “wo ajibatika kwaku.”
Mazu ngaki chayingu, “unganu wosi wa Ayisirayeli uchiwona.”
Mazu ngaki chayingu, “unganu.”