Numeri 13:1-33

  • Anthulumi 12 atumika kuti akafufuzi charu cha Kanani (1-24)

  • Anthulumi 10 akamba vinthu viheni (25-33)

13  Sonu Yehova wangulongoro ndi Mozesi, ndipu wangukamba kuti:  “Tuma anthulumi kuti akafufuzi* charu cha Kanani cho ndichiperekengi kwa Ayisirayeli. Utumi munthulumi yumoza kutuliya pa fuku lelosi,* ndipu waje munthulumi yo ndi mulongozgi+ pakati pawu.”+  Mwaviyo, Mozesi wanguŵatuma kutuliya muchipululu cha Parani+ mwakukoliyana ndi vo Yehova wangulamula. Anthulumi wosi ŵenaŵa ŵenga alongozgi ŵa Ayisirayeli.  Mazina ngawu ngenga yanga: kutuliya pa fuku laku Rubeni, Shamuwa mwana munthulumi waku Zakuru;  kutuliya pa fuku laku Simiyoni, Shafati mwana munthulumi waku Hori;  kutuliya pa fuku laku Yuda, Kalebe+ mwana munthulumi waku Yefune;  kutuliya pa fuku laku Isakara, Igali mwana munthulumi waku Yosefi;  kutuliya pa fuku laku Efurayemu, Hosheya+ mwana munthulumi waku Nuni;  kutuliya pa fuku laku Benjamini, Paliti mwana munthulumi waku Rafu; 10  kutuliya pa fuku laku Zebuloni, Gadiyeli mwana munthulumi waku Sodi; 11  kutuliya pa fuku laku Yosefi,+ kumiya fuku laku Manasi,+ Gadayi mwana munthulumi waku Susi; 12  kutuliya pa fuku laku Dani, Amiyeli mwana munthulumi waku Gemali; 13  kutuliya pa fuku laku Ashere, Setura mwana munthulumi waku Mikayeli; 14  kutuliya pa fuku laku Nafutali, Nabi mwana munthulumi waku Vofisi; 15  kutuliya pa fuku laku Gadi, Geuweli mwana munthulumi waku Maki. 16  Yanga ndi mazina nga anthulumi wo Mozesi wangutuma kuti akafufuzi charu cho. Mozesi wangupaska Hosheya mwana munthulumi waku Nuni zina lakuti Yoswa.*+ 17  Mozesi wachiŵatuma kuti akafufuzi charu cha Kanani, wanguŵakambiya kuti: “Lutani kuchigaŵa cha Negebu ndipu pavuli paki muluti kuchigaŵa chamapiri.+ 18  Mukawoni mo charu cho chiliri+ ndipuso asani ŵanthu wo aja mwenimo mbanthazi pamwenga mbambula nthazi, mbamana pamwenga mbanandi, 19  mukawoni so asani charu cho ntchamampha pamwenga ntchiheni ndipuso asani ŵanthu aja mumahema pamwenga mumipanda yakukho. 20  Kweniso mukawoni asani charu cho ntchanyata* pamwenga ntchambula nyata,*+ ndipuso asani mucharu cho mwe vimiti pamwenga mulivi. Jani ndi chiganga+ ndipu mukatoku vinyaki mwa vipasu va mucharu cho.” Yeniyi yenga nyengu ya vipasu va mphereska vakwamba kucha.+ 21  Mwaviyo, anguluta ndipu angufufuza charu cho kwambiya kuchipululu cha Zini+ mpaka ku Rehobu+ kufupi ndi Lebo-hemati.*+ 22  Ŵati afika muchigaŵa cha Negebu, angufika ku Heburoni+ ko kwajanga Ahimani, Sheshayi ndi Talimayi,+ wo ŵenga Aanaki.+ Tawuni ya Heburoni yati yazengeka pangujumpha vyaka 7 kuti tawuni ya Zowani ya ku Ijipiti yizengeki. 23  Ŵati afika mu Dambu* la Eshikolo+ angudumuwa mphanda yo yenga ndi khoroza limoza la mphereska, ndipu anthulumi ŵaŵi angulipinga pachimiti limoza ndi vipasu va pomegiraneti* kweniso va mkuyu.+ 24  Malu ngo angungadana kuti Dambu* la Eshikolo*+ chifukwa cha khoroza lo Ayisirayeli angudumuwa pamalu ngenanga. 25  Pati pajumpha mazuŵa 40+ anguweku kuchifufuza charu. 26  Sonu anthulumi wo anguwere kwaku Mozesi ndi Aroni kweniso Ayisirayeli wosi* muchipululu cha Parani, ku Kadeshi.+ Yiwu angukonkhoske Ayisirayeli* wosi vo angusaniya ndipu anguŵalongo vipasu va mucharu cho. 27  Yiwu angukambiya Mozesi kuti: “Tinguluta mucharu cho mungutituma kuti tiluti, ndipu chitenda nadi mkaka ndi uchi,+ ivi ndivu vipasu vaki.+ 28  Kweni ŵanthu wo aja mucharu cho mbanthazi ndipu matawuni ngawu nge ndi mipanda yakukho ukongwa. Tinguwona so Aanaki kweniko.+ 29  Aamaleki+ aja muchigaŵa cha Negebu+ ndipu Ahiti, Ayebusi+ ndi Aamori+ aja kuchigaŵa chamapiri. Akanani+ aja mumphepeti mwa nyanja+ kweniso mumphepeti mwa msinji wa Yorodani.” 30  Pavuli paki, Kalebe wanguyesa kuŵajalika mtima pasi ŵanthu wo anguma pa masu paku Mozesi, ndipu wangukamba kuti: “Tiyeni tiluti, sonu panu, ndipu tamulonda nadi charu cho kuti chije chidu, chifukwa tingatondeka cha kuchithereska.”+ 31  Kweni ŵanthu wo anguluta nayu angukamba kuti: “Tingachilimbana nawu cha ŵanthu ŵa, chifukwa mbanthazi kuphara isi.”+ 32  Ndipu angulutirizga kukambiya Ayisirayeli vinthu viheni+ vakukwaskana ndi charu cho anguluta kuchichifufuza, ndipu akambanga kuti: “Charu cho tinguluta kuchichifufuza chimeza ŵanthu ŵaki ndipu ŵanthu wosi wo tinguwona mucharu cho ndi viŵanthu vikuluvikulu.+ 33  Ndipu kweniko tinguwona Anefilimu, ŵana anthulumi aku Anaki+ wo akutuliya mwa* Anefilimu ndipu isi tajiwonanga nge azombi kwaku yiwu, ndipu nawu atiwonanga viyo.”

Mazu Ngam'mphata

Mazu ngaki chayingu, “akaskoli.”
Mazu ngaki chayingu, “fuku la apapi ŵaki.”
Pamwenga kuti, “Yehoshuwa,” kung’anamuwa kuti “Yehova Mbutaski.”
Mazu ngaki chayingu, “ntchakututuŵa.”
Mazu ngaki chayingu, “ntchakonda.”
Pamwenga kuti, “pakuselere ku Hemati.”
Ili ndi dambu lo lija ndi maji mu nyengu ya vuwa pe.
Anyaki atividana kuti vingoma vachizungu, chifukwa chakuti nje zaki ziwoneka nge vingoma.
Ili ndi dambu lo lija ndi maji mu nyengu ya vuwa pe.
Kung’anamuwa kuti, “Khoroza la Mphereska.”
Mazu ngaki chayingu, “unganu wosi wa Ayisirayeli.”
Mazu ngaki chayingu, “unganu.”
Pamwenga kuti, “wo ndi mphapu ya.”