Nthanthi 6:1-35
6 Wamwana wangu, asani wazomera kuti uwezengi ngongoli mumalu mwa munyaku,*+Asani wakolana manja* ndi mulendu,+
2 Asani wawira chifukwa cha layizgu laku,Asani wakoleka ndi mazu nga pamulomu waku,+
3 Uchiti ivi wamwana wangu kuti ujitaski,Pakuti wawiya mu manja mwa munyaku:
Luta ndipu ukajiyuyuwi ndi kumuŵeyere mwaliŵi munyaku.+
4 Ungazomerezanga cha kuti masu ngaku ngagoni,Pamwenga kuti vikolongu vaku visiwi.
5 Ujitaski nge mbaŵa mu manja mwa wakuŵinga,Nge kayuni mu manja mwa munthu yo watuthya tiyuni.
6 Yiwi wa munthu mulesi, luta ukawoni nyere;+Ukawonesesi mo zichitiya vinthu kuti uje wazeru.
7 Chinanga kuti zilivi mulongozgi, yo watiziwonere pamwenga yo watizilamuliya,
8 Zinozga vakurya vawu mu chihanya,+Ndipu ziwunjika chakurya pa nyengu yakuvuna.
9 Yiwi wamunthu mulesi, kumbi ulutirizgengi kugona mpaka zuŵanji?
Kumbi uyukengi nyengu wuli?
10 Asani ulutirizgengi kugona kamanavi, asani usiwengepu kamanavi,Asani upetengi manja kamanavi kuti upumuwi,+
11 Ukavu waku uzengi nge munkhungu,Ndipu kusoŵa vinthu vakukhumbika kukuziyengi nge munthu yo we ndi vidya.+
12 Munthu waŵakaŵaka kweniso muheni watendatenda ndi mazu ngauryarya;+
13 Waphayiya jisu laki,+ watendesatendesa phazi laki kweniso walongoro mwakugwiriskiya ntchitu vikumbu vaki vakumanja.
14 Ndi mtima wachinyengu,Nyengu zosi wanozga viŵembu+ kweniso watambisa mphindanu.+
15 Mwaviyo, soka limuwiyengi mwamabuchibuchi;Mu kanyengu kamanavi, iyu wavikitikengi ndipu wachirengi cha.+
16 Pe vinthu 6 vo Yehova wativitinkha;Hinya, pe vinthu 7 vo iyu waseruka navu:
17 Masu ngakujikuzga,+ lilimi laboza,+ manja ngo ngadira ndopa zambula mulandu,+
18 Mtima wakunozga viŵembu,+ maphazi ngo ngatchimbiriya vinthu viheni,
19 Kaboni waboza yo wapusika nyengu yeyosi yo walongoro,+Kweniso weyosi yo wamija mphindanu pakati pa abali.+
20 Wamwana wangu, usungi dangu la awusu,Ndipu ungawujowonga cha ulongozgi wa* anyoku.+
21 Nyengu zosi uvimangiriyi mumtima mwaku;Ndipuso uvimangiriyi mukhosi mwaku.
22 Asani utenda, vikulongozgengi;Asani wagona, vikuvikiliyengi;Ndipu asani wayuka, vilongorongi nawi.*
23 Pakuti ulongozgi ndi nyali,+Dangu mbukweru,+Ndipu ulongozgi wo uperekeka pakuchenya ndi nthowa ya umoyu.+
24 Vikuvikiliyengi ku munthukazi muheni,+Kweniso ku lilimi lakukopa la munthukazi muyaya.*+
25 Mumtima mwaku, ungakhumbiranga kutowa kwaki cha+Pamwenga kuzomereza kuti wakukopi ndi masu ngaki ngakukopa,
26 Pakuti chifukwa cha huli, munthu wamala mpaka kuja ndi chiŵandi pe,+Kweni muwolu wa munthu munyaki, ntchiŵana cha umoyu waku wakuzirwa.
27 Kumbi munthu wangapinga motu pachifuŵa chaki kwambula kotcha vakuvwala vaki?+
28 Kumbi munthu wangayenda pamaka ngamotu kwambula kufya kuphazi?
29 Venivi viyanana ŵaka ndi munthu yo wagonana ndi muwolu wa munyaki;Palivi yo wako munthukazi mwenuyu yo walekengi kulangika.+
30 Ŵanthu atimunyoza cha munkhunguAsani wabanga chifukwa chakuti we ndi nja.
31 Kweni asani wakoleka, walipirengi maulendu 7;Waperekengi vinthu vosi vakuzirwa va munyumba yaki.+
32 Weyosi yo wachita chigololu ndi munthukazi, ngwambula zeru;*Munthu mweniyo wachita venivi, wananga umoyu waki.+
33 Wasaniyengi ŵaka mabamba ndipu walengesekengi,+Soni zaki zisisitikengi cha.+
34 Pakuti sanji yichitiska kuti mulumu waki waje mukali;Iyu wachitengi lisungu cha pakuweze.+
35 Wazomerengi cha kulonde chechosi chakumupepese;*Mtima waki utunengi cha, chinanga ungapereka mphasu yikulu wuli.
Mazu Ngam'mphata
^ Kung’anamuwa pakuchita phanganu.
^ Mazu ngaki chayingu, “asani waja chikoli cha ngongoli ya munyaku.”
^ Pamwenga kuti, “ungalijowonga cha dangu la.”
^ Pamwenga kuti, “vikupaskengi ulongozgi.”
^ Mazu ngaki chayingu, “wa mtima wambula zeru.”
^ Pamwenga kuti, “chechosi kuti ujiwombo.”
