Nthanthi 25:1-28
25 Izi nazu ndi nthanthi zaku Solomoni+ zo ŵanthu aku Hezekiya,+ fumu ya ku Yuda angulemba:
2 Mbunkhankhu waku Chiuta kusunga chisisi,+Ndipu mbunkhankhu wa fumu kufufuza umampha nkhani.
3 Kuchanya nkhutali ukongwa ndipu charu chapasi ntchandimba,Mtima wa mafumu nawu ungafufuzika cha.
4 Tuzgamu vinthu vabwekabweka* mu siliva,Ndipu asani wamala kuyengetulika, wajengi wakutowa.+
5 Tuzgapu muheni pa masu pa fumu,Ndipu mpandu waki waufumu ujalikiskikengi mwakukho mu urunji.+
6 Ungajitumbikanga cha pa masu pa fumu,+Ndipu ungajanga pakati pa ŵanthu akutchuka cha,+
7 Pakuti nkhanthu kuti fumu ndiyu yikukambiyi kuti, “Iza uzije pafupi yapa,”
Kuluska kuti yikulengesi pa masu pa munthu wakuzirwa.+
8 Ungathaŵiriyanga kumangala cha,Chifukwa uchitengi wuli pakumaliya asani munyaku wakuchitiska soni?+
9 Kambiskana nayu munyaku mulandu waku,+Kweni ungavumbuwanga cha vo munyaku wakukambiya mwachisisi,*+
10 Kuti yo watikuvwisiya waleki kukulengesaNdipu yiwi wawandisa nkhani yiheni* yo yingasisitika so cha.
11 Mazu ngo ngakambika pa nyengu yakwenere,Nge nge maapozi ngagolidi mumbali zasiliva.+
12 Munthu wazeru yo wachenya munthu wa gutu lakuvwisiya,We nge ndeŵereŵi yagolidi kweniso vakujitowese vagolidi wamampha ukongwa.+
13 Nge mo sinoo* waziziliya pa zuŵa lakuvunaNdimu yiliri nthumi yakugomezgeka kwaku wo ayituma,Pakuti iyu yisisipuwa mbuyaki.+
14 Munthu yo watijiŵikamu chifukwa cha mphasu yo wechendapereki*We nge mitambu ndi mphepu yambula vuwa.+
15 Ndi kuzika, munthu wanganyengere mulongozgi,Ndipu lilimi lakuzika* lingafyo chiwanga.+
16 Asani wasaniya uchi, uryepu ŵaka wakukwana,Chifukwa asani warya unandi, uwukuwengi.+
17 Lundi laku lingakandangamu kaŵikaŵi cha munyumba ya munyaku,Kuti waleki kuvuka nawi ndi kwamba kukutinkha.
18 Munthu yo wapereka ukaboni waboza wakususkana ndi munyaki,We nge nduku, lipanga kweniso muvu wakuthwa.+
19 Kuthemba munthu wambula kugomezgeka* pa nyengu ya suzgu,Kwe nge kuthemba jinu lakubonthoka pamwenga phazi lakundengandenga.
20 Nge munthu yo wazuwa vakuvwala vaki pa zuŵa lakuziziraKweniso nge viniga yo wapungulikiya pa sodaNdimu waliri munthu yo wambiya sumu munthu yo we ndi mtima wachitima.+
21 Asani murwani waku* we ndi nja, mupaski chakurya kuti waryi;Asani we ndi nyota, mupaski maji kuti wamwi,+
22 Pakuti asani uchita venivi, uwunjika maka ngamotu pamutu paki,*+Ndipu Yehova wakupaskengi mphotu.
23 Mphepu ya kunkhondi* yichitiska chivuwa chikulu,Ndipu lilimi la mwendanatu lichitiska kuti visku vikwiyi.+
24 Nkhanthu kuja pachanya pa nyumbaKuluska kuja munyumba yimoza ndi munthukazi wapamulomu.*+
25 Nkhani yamampha yakutuliya kucharu chakutali,Ye nge maji ngakuzizira ku munthu yo wavuka.+
26 Nge kasupi wavimawulambwi ndipuso chisimi chakukhatukaNdimu waliri munthu murunji yo wathera ku* munthu muheni.
27 Kurya uchi unandi nkhwamampha cha,+Kujipenje unkhankhu naku nkhwamampha cha.+
28 Munthu yo watondeka kujiko asani wakwiya,*We nge tawuni yo mpanda waki wagumulika.+
Mazu Ngam'mphata
^ Vinthu vo vijaliya asani ayengetuwa visulu.
^ Pamwenga kuti, “visisi va anyaku.”
^ Pamwenga kuti, “mphemerezu yiheni.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Mazu ngaki chayingu, “mphasu yaboza.”
^ Pamwenga kuti, “lakufwasa.”
^ Yapa pangafwatulikiya so kuti, “munthu muryarya.”
^ Mazu ngaki chayingu, “munthu yo watikutinkha.”
^ Kung’anamuwa kuchitiska kuti munthu wasinthi kweniso kusongono unononu waki.
^ Anyaki akamba kuti, “ya kumpotu.”
^ Pamwenga kuti, “wakusuzga.”
^ Mazu ngaki chayingu, “wambendyambendya pa masu pa.”
^ Pamwenga kuti, “watondeka kuwuko mzimu waki.”
