Nthanthi 18:1-24
18 Weyosi yo watijipatuwa, wachita vinthu mwakujiyanja;Iyu wakana* zeru zosi zakovya.
2 Muzereza wakondwa naku cha kuvwisa vinthu;Mumalu mwaki, iyu wangasankha kuvumbuwa vo ve mumtima mwaki.+
3 Asani munthu muheni waza, kuyuyuwa naku kutuza,Ndipu po pe chilengesku, soni nazu ze penipo.+
4 Mazu ngo ngatuwa pamulomu wa munthu, ndi maji ngandimba.+
Ndipu kasupi wazeru we nge msinji wa maji ngakupopoma.
5 Mbumampha cha kwanjiya munthu muheni+Pamwenga kunola munthu murunji cheruzgu chakunyoloka.+
6 Mazu nga munthu muzereza ngatambisa mphindanu,+Ndipu mulomu waki udana kupumika.+
7 Mulomu wa munthu muzereza ndiwu utimuparanyisa,+Ndipu milomu yaki ntchiŵana cha umoyu waki.
8 Mazu nga munthu yo wakamba vinthu viheni vakukwaskana ndi anyaki nge nge chakurya chakunowa;*+Ngamezeka mpaka mulufu.+
9 Weyosi yo ndi mulesi pa ntchitu yaki,Ndi mubali wa munthu yo watambisa pharanyiku.+
10 Zina laku Yehova nkhanyumba kakuthopoka kakukho.+
Munthu murunji wathaŵiyamu ndipu wavikilirika.*+
11 Chuma cha munthu wakukhupuka, ndi tawuni yaki ya mpanda wakukho;Ndipu mumaŵanaŵanu ngaki che nge mpanda wakumuvikiliya.+
12 Mtima wakujikuzga, uchitiska kuti munthu wawi,+Ndipu kujiyuyuwa kulongozge ku unkhankhu.+
13 Munthu yo wamuka nkhani wechendayivwisi,Ndi muzereza ndipuso wachita soni.+
14 Mzimu wa munthu ungamuwovya pa nyengu yo watama,+Kweni kumbi ndiyani yo wangakunthiyapu mzimu wakutekenyeka?*+
15 Mtima wa munthu wakuvwisa vinthu, uja wakuziŵa vinthu,+Ndipu gutu la munthu wazeru lipenja kuziŵa vinthu.
16 Mphasu ya munthu yitimujuliya nthowa;+Yitimuchitiska kuti wakumani ndi ŵanthu akuzirwa.
17 Munthu wakwamba kukonkhoska nkhani wawoneka kuti ndi murunji,+Mpaka po munyaki waziya ndi kumufumba mafumbu.*+
18 Kuchita mayeri kumalisa mphindanu+Kweniso kumalisa nkhani pakati pa* ŵanthu anthazi.
19 Mubali yo amunangiya wathera cha kuluska tawuni ya mpanda wakukho,+Ndipu pe mphindanu zo zija nge akabali a tawuni ya mpanda wakuvikilirika.+
20 Lufu la munthu lizazengi ndi chipasu cha mazu ngaki;*+Iyu wakhorwengi ndi vo milomu yaki yituzga.
21 Nyifwa ndi umoyu ve mu nthazi ya lilimi;+Wo atanja kuligwiriskiya ntchitu aryengi chipasu chaki.+
22 Munthu yo wasaniya munthukazi wamampha wasaniya chinthu chamampha,+Ndipu Yehova wakondwa nayu.+
23 Mukavu watesa kuŵeyere pakulongoro,Kweni wakukhupuka wamuka mwaganyavu.
24 Pe mabwezi ngo ngakunozgeka kupwetekana,+Kweni pe bwezi lo limatiriya kuluska mubali waku.+
Mazu Ngam'mphata
^ Pamwenga kuti, “wayuyuwa.”
^ Pamwenga kuti, “nge nge vinthu vo munthu wangameza mwauskoli.”
^ Mazu ngaki chayingu, “wakwezeke muchanya,” kung’anamuwa malu ngo munthu weyosi wangafikaku cha.
^ Pamwenga kuti, “masuzgu ngakulu?”
^ Pamwenga kuti, “ndi kumufufuza umamphaumampha.”
^ Mazu ngaki chayingu, “kupatuwa.”
^ Mazu ngaki chayingu, “cha mulomu waki.”