Nthanthi 17:1-28
17 Nkhwamampha kuja ndi chiŵandi chakumira po pe chimangu+Kuluska nyumba yakuzaza vakurya* limoza ndi mphindanu.+
2 Mteŵeti yo we ndi zeru walamuliyengi mwana yo wachita vinthu vakuchitiska soni;Iyu walondiyengeku chihara limoza ndi ŵana a munyumba yo.
3 Mumphika wakuyengetuliyamu ngwakuyengetuliyamu siliva ndipu ng’anju njakuyengetuliyamu golidi,+Kweni Yehova ndiyu wasanda mitima.+
4 Munthu muheni waŵikaku maŵanaŵanu ku mazu ngakupweteka,Ndipu munthu wachinyengu wavwisiya lilimi laboza.+
5 Weyosi yo waseka mukavu, wanyoza yo wakumupanga.+Ndipu weyosi yo wakondwa chifukwa cha soka la munthu munyaki walekengi cha kulangika.+
6 Azuku* ntchisoti chaufumu ku ŵanthu akukota,Ndipu unkhankhu wa ŵana* mbawusewu.*
7 Mazu ngakunyoloka* ngatimuja cha muzereza.+
Mwakuyanana ŵaka, wakulamuliya* vitimujapu cha chinanga nkhamanavi kuti wakambengi boza!+
8 Mphasu ye nge mwa wakuzirwa* ku mweneku;+Yitimuchitiska kuti vinthu vimuyende umampha kwekosi ko wangaselere.+
9 Weyosi yo wagowoka* ubudi wapenja chanju,+Kweni yo walutirizga kukambakamba nkhani wapatuska mabwezi.+
10 Kuchenya kutimufika pamtima munthu yo wavwisa vinthu+Kuluska kuthyapuwa munthu muzereza maulendu 100.+
11 Munthu muheni wapenja ŵaka kugaruka,Kweni muthenga wankhaza watumikengi kuti wakamulangi.+
12 Nkhwamampha kukumana ndi chinyama cha biyere cho chaphangika ŵana ŵakiKuluska kukumana ndi munthu muzereza mu uzereza waki.+
13 Asani munyaki waweze viheni pa vamampha,Vinthu viheni vituwengepu cha pa nyumba yaki.+
14 Kwambisa ndewu kwe nge kujuliya maji;*Mphindanu yechendabuki, tuwapu.+
15 Weyosi yo wakamba kuti munthu muheni walivi mulandu ndipuso yo watumba mulandu munthu murunji,+Wosi ŵaŵi, Yehova waseruka nawu.
16 Kumbi pe phindu wuli asani muzereza we ndi nthowa yakusaniriya zeruPenipo walivi mtima wakuti wazisaniyi?*+
17 Bwezi chayilu litanja nyengu zosi+Ndipu ilu ndi mubali yo wakubalika kuti wakuwovyi pa nyengu ya suzgu.+
18 Munthu wambula zeru* wazomereza mwakukolana manjaKuti wawezengi ngongoli ya* munthu pa masu pa munyaki.+
19 Weyosi yo watanja mphindanu watanja mphulupulu.+
Weyosi yo wakweze khomu laki muchanya wadana pharanyiku.+
20 Munthu yo we ndi mtima wauryarya vinthu vimuyendiyengi cha,*+Ndipu yo walongoro mwachinyengu waparanyikengi.
21 Munthu yo wabala mwana muzereza wajengi ndi chitima;Ndipu awisi a mwana wambula zeru akondwa cha.+
22 Mtima walikondwa ndi munkhwala wamampha,*+Kweni mzimu wakutekenyeka utumwa nthazi za munthu.*+
23 Munthu muheni walonda chinyeda mwakubisa*Kuti wabendezgi urunji.+
24 Zeru ze pa masu pa munthu yo wavwisa vinthu,Kweni masu nga munthu muzereza ngapenjapenja mpaka ku vigoti va charu.+
25 Mwana muzereza wachitiska chitima awisiNdipuso wapwetekesa mtima yo wakumubala.*+
26 Kulanga* munthu murunji nkhwamampha cha,Ndipu kuthyapuwa ŵanthu akutumbikika kususkana ndi cho ntchakwenere.
27 Munthu yo waziŵa vinthu, watijiweza pakulongoro,+Ndipu munthu wakuwamu watiwuko mtima.*+
28 Chinanga ndi muzereza yo waja cheti, ŵanthu amuwonengi kuti ngwazeru,Kweniso munthu yo wajala milomu yaki, amuwonengi kuti ngwakuwamu.
Mazu Ngam'mphata
^ Mazu ngaki chayingu, “sembi.”
^ Pamwenga kuti, “Azuku anthulumi.”
^ Pamwenga kuti, “ŵana anthulumi.”
^ Pamwenga kuti, “mbapapi ŵawu.”
^ Pamwenga kuti, “munthu wakuzirwa.”
^ Pamwenga kuti, “ngamampha.”
^ Pamwenga kuti, “mwa wo utuza ndi vamampha.”
^ Mazu ngaki chayingu, “wabenekere.”
^ Pamwenga kuti, “kujula damu.”
^ Pamwenga kuti, “Penipo walivi zeru?”
^ Mazu ngaki chayingu, “wamtima wambula zeru.”
^ Mazu ngaki chayingu, “wajengi chikoli cha ngongoli ya.”
^ Mazu ngaki chayingu, “wasaniyengi vinthu vamampha cha.”
^ Pamwenga kuti, “ngwamampha chifukwa uchizga.”
^ Pamwenga kuti, “umizga viwanga.”
^ Mazu ngaki chayingu, “walonda chinyeda kutuliya muchifuŵa.”
^ Mazu ngaki chayingu, “Ndipuso wachitiska kuti yo wakumubala wavwi urwirwi.”
^ Pamwenga kuti, “Kulipirisa.”
^ Mazu ngaki chayingu, “waja ndi mzimu wakufwasa.”
