Nthanthi 16:1-33
16 Munthu wanozga maŵanaŵanu nga mumtima mwaki,*Kweni vo wamuka vituliya* kwaku Yehova.+
2 Nthowa zosi za munthu ziwoneka kuti zakunyoloka* kwaku iyu,+Kweni Yehova wasanda vilatu.*+
3 Pereka kwaku Yehova chechosi cho uchita,*+Ndipu vo ukhumba kuchita vifiskikengi.
4 Yehova wachitiska kuti chechosi chichitiki mwakukoliyana ndi khumbu laki,Chinanga ndi munthu muheni nayu wamusungiya zuŵa lasoka.+
5 Munthu weyosi wa mtima wakunyada, Yehova waseruka nayu.+
Ziŵani kuti* iyu walekengi cha kulangika.
6 Chifukwa cha chanju chambula kumala kweniso kugomezgeka, ubudi ubenekereka,+Ndipu chifukwa cha kopa Yehova, munthu waweku ku uheni.+
7 Asani Yehova wakondwa ndi nthowa za munthu,Wachitiska kuti chinanga mbarwani ŵaki aje nayu pa chimangu.+
8 Nkhanthu kuja ndi vinthu vimanavi mwaurunji+Kuluska kuja ndi vinthu vinandi mwambula urunji.+
9 Munthu wanganozga nthowa yaki mumtima,Kweni Yehova ndiyu walongozga menderu ngaki.+
10 Cheruzgu chakutuliya kwaku Chiuta chitenere kuja pamilomu ya fumu;+Iyu yitenere cha kuyeruzga mwambula urunji.+
11 Mwesu wauneneska kweniso sikelu zauneneska vituliya kwaku Yehova;Ndipu vakupimiya uzitu vosi vo vija muthumba ndi ntchitu zaki.+
12 Ntchitu ziheni mafumu ngaseruka nazu,+Pakuti mpandu waufumu ujalikiskika mwakukho chifukwa cha urunji.+
13 Kulongoro mwaurunji kukondwesa mafumu.
Yingu ngatanja munthu yo wakamba uneneska.+
14 Ukali wa fumu we nge muthenga wa nyifwa,+Kweni munthu wazeru ndiyu watiwuzikisa.*+
15 Mu ukweru wa chisku cha fumu mwe umoyu;Lisungu laki le nge mtambu wa vuwa yakumaliya.+
16 Kusaniya zeru nkhwamampha ukongwa kuluska kusaniya golidi!+
Kuja wakuvwisa vinthu kuluska kuja ndi siliva.+
17 Msewu wa ŵanthu akunyoloka ukhwecha cho ntchiheni.
Weyosi yo wavikiliya nthowa yaki wavikiliya umoyu waki.+
18 Kunyada kuchitiska kuti munthu waparanyiki,Ndipu mzimu wakujikuzga uchitiska kuti munthu waguŵi.+
19 Nkhanthu kuja wakujiyuyuwa* pakati pa ŵanthu akufwasa+Kuluska kugaŵana vinthu vo ŵanthu akujikuzga aphanga.
20 Munthu yo walongo zeru pa chinthu chechosi vinthu vimuyendiyengi umampha,*Ndipu ngwakukondwa munthu yo wathemba Yehova.
21 Munthu wamtima wazeru wadanikengi kuti ngwakuvwisa vinthu,+Ndipu yo walongoro mwalisungu wasazgiyaku* kukopa.+
22 Zeru ndi kasupi wa umoyu kwaku wo ŵe nazu,Kweni azereza achenyeka ndi uzereza wawu.
23 Mtima wa munthu wazeru upaska zeru mulomu waki+Ndipuso usazgiyaku kukopa ku mazu ngaki.
24 Mazu ngamampha nge nge chisa cha uchi,Ngachitiska kuti munthu wavwi kunowa* kweniso ngachizga viwanga.+
25 Pe nthowa yo munthu watiyiwona nge njakunyoloka,Kweni pakumaliya yilongozge ku nyifwa.+
26 Chifukwa cha kukhumbisiska chakurya, waganyu wagwira ntchitu mwaphamphuPakuti nja yaki ndiyu yitimuchiska.*+
27 Munthu waŵakaŵaka wakumba cho ntchiheni;+Vo walongoro ve nge motu wakupiriza.+
28 Munthu wakwanja viwawa* watambisa mphindanu,+Ndipu yo wakamba vinthu viheni vakukwaskana ndi anyaki, wapatuska mabwezi.+
29 Munthu wachiwawa wanyenga munyakiNdipu watimulongozge kunthowa yiheni.
30 Waphayiya jisu laki wachinozga chiŵembu.
Walumiya milomu yaki wachifiska viŵembu vaki.
31 Nyivu* ntchisoti chakutowa*+Asani zasanirika mu nthowa yaurunji.+
32 Munthu yo waleka kukwiya liŵi+ ngwamampha kuluska munthu wanthazi,Ndipu munthu yo walamuliya ukali* waki waluska yo wathereska tawuni.+
33 Mayeri ngachitikiya pachipakatu,+Kweni chechosi cho ngalongo, chituliya kwaku Yehova.+
Mazu Ngam'mphata
^ Pamwenga kuti, “kumuka mwauneneska kutuliya.” Mazu ngaki chayingu, “Vo lilimi limuka vituliya.”
^ Mazu ngaki chayingu, “Ndondomeku ya mtima njamunthu.”
^ Mazu ngaki chayingu, “zakutowa.”
^ Mazu ngaki chayingu, “mizimu.”
^ Mazu ngaki chayingu, “Kunkhuzgiya Yehova ntchitu zaku.”
^ Mazu ngaki chayingu, “Janja ku janja.”
^ Pamwenga kuti, “watiwukhwecha.”
^ Mazu ngaki chayingu, “kuja wamzimu wakujiyuyuwa.”
^ Mazu ngaki chayingu, “wasaniyengi vamampha.”
^ Pamwenga kuti, “yo walongoro umampha wasazgiyaku.” Mazu ngaki chayingu, “kunowa kwa milomu kusazgiyaku.”
^ Pamwenga kuti, “Nganowa.”
^ Mazu ngaki chayingu, “Pakuti mulomu waki ndiwu utimuchiska.”
^ Pamwenga kuti, “yo wanozga viŵembu.”
^ Anyaki akamba kuti, “mbuha.”
^ Pamwenga kuti, “chaunkhankhu.”
^ Mazu ngaki chayingu, “mzimu.”
