Nthanthi 14:1-35
14 Munthukazi yo we ndi zeru nadi wazenga nyumba yaki,+Kweni muzereza watiyiwisa ndi manja ngaki.
2 Munthu yo watenda mwakunyoloka watopa Yehova,Kweni yo nthowa zaki zauryarya wanyoza Chiuta.
3 Nthonga yakujikuzga ye mumulomu mwa munthu muzereza,Kweni milomu ya ŵanthu azeru yiŵavikiliyengi.
4 Asani palivi ng’ombi, mwakuryisiyamu muja mwakutowa,Kweni nthazi za ng’ombi yinthulumi zichitiska kuti munthu wakololi vinthu vinandi.
5 Kaboni wakugomezgeka wapusika cha,Kweni kaboni waboza wapusika nyengu yeyosi yo walongoro.+
6 Munthu wakunyoza wapenja zeru kweni watizisaniya cha,Kweni munthu wakuvwisa vinthu wasuzgika cha kuziŵa vinthu.+
7 Ja kutali ndi munthu muzereza,Pakuti pamilomu yaki usaniyengepu kuziŵa vinthu cha.+
8 Chifukwa cha zeru, munthu wakuchenje wavwisa nthowa yo watendamu,Kweni ŵanthu azereza apusisika* ndi uzereza wawu.+
9 Azereza aseka asani anangisa vinthu,*+Kweni ŵanthu akunyoloka akhumbisiska kuti akoliyani.
10 Mtima ndiwu uziŵa kuŵaŵa kwa suzgu yaki,Ndipu munthu munyaki wangakondwe nawu limoza cha asani wakondwa.
11 Nyumba za ŵanthu aheni zibwangandulikengi,+Kweni hema la munthu wakunyoloka lilutirizgengi kujaku.
12 Pe nthowa yo munthu watiyiwona nge njakunyoloka,+Kweni pakumaliya yilongozge ku nyifwa.+
13 Chinanga munthu waseka, mtima ungavwa kuŵaŵa,Ndipu likondwa lingamaliya ku chitima.
14 Munthu wamtima wabwekabweka wavunengi mwakukoliyana ndi nthowa zaki,+Kweni munthu wamampha wavuna mwakukoliyana ndi vo wachita.+
15 Munthu wambula kuziŵa vinandi wagomezga mazu ngengosi,Kweni munthu wakuchenje waŵanaŵaniya mo watende.+
16 Munthu wazeru waphwere ndipu watuwaku ku uheni,Kweni muzereza waphweriyaku cha* ndipuso watijithemba ukongwa.
17 Munthu yo waswera cha kukwiya wachita vinthu mwakupusa,+Kweni munthu yo waŵanaŵaniyapu dankha* watinkhika.
18 Munthu wambula kuziŵa vinandi waharengi uzereza,Kweni ŵanthu akuchenje avwalikika kuziŵa vinthu nge chisoti chaufumu.+
19 Ŵanthu aheni ajikamengi pa masu pa ŵanthu amampha,Ndipu ŵanthu wo achita vinthu viheni ajikamengi pamageti nga munthu murunji.
20 Munthu mukavu watinkhika chinanga nkhwa anyaki,+Kweni munthu wakukhupuka waja ndi abwezi anandi.+
21 Munthu yo wayuyuwa munyaki wabuda,Kweni yo walongo lisungu munthu wakusika waja wakukondwa.+
22 Asi ŵanthu wo anozge viŵembu anyawu alandengi?
Kweni wo akhumbisiska kuchita vamampha alondiyengi chanju chambula kumala kweniso ŵanthu aŵachitiyengi vinthu mwakugomezgeka.+
23 Munthu weyosi yo wagwira ntchitu mwaphamphu wasaniya phindu,Kweni munthu yo walongoro ŵaka wakavuka.+
24 Chisoti chaufumu cha ŵanthu azeru ntchuma chawu;Kweni kupusa kwa ŵanthu azereza nkhupusa pe.+
25 Kaboni wauneneska wataska maumoyu,Kweni kaboni wakupusisa wapusika nyengu yeyosi yo walongoro.
26 Munthu yo watopa Yehova wathemba iyu pa chechosi,+Ndipu ŵana ŵaki asaniyengi malu ngakuthaŵiyaku.+
27 Kopa Yehova ndi kasupi wa umoyu,Kuti munthu waweku ku viŵana va nyifwa.
28 Unandi wa ŵanthu mbunkhankhu wa fumu,+Kweni wakulamuliya yo walivi ŵanthu wamala.
29 Munthu yo wakwiya liŵi cha ngwakuwamu ukongwa,+Kweni munthu yo waleka kuzikira walongo uzereza waki.+
30 Mtima wakuzika upereka umoyu* ku liŵavu,Kweni sanji yivundisa viwanga.+
31 Munthu yo wabiya munthu wakusika, wanyoza yo wakumupanga,+Kweni weyosi yo wachitiya lisungu munthu mukavu wakankhuska Chiuta.+
32 Munthu muheni wawisikengi chifukwa cha uheni waki,Kweni munthu murunji wasaniyengi malu ngakuthaŵiyaku chifukwa cha kugomezgeka kwaki.+
33 Zeru zijalikiskika mumtima mwa munthu yo wavwisa vinthu,+Kweni zitijiziŵikiska pakati pa ŵanthu azereza.
34 Urunji ukweza mtundu,+Kweni ubudi ulengesa mtundu wa ŵanthu.
35 Fumu yikondwa ndi mteŵeti yo wachita vinthu mwazeru,+Kweni yitimukwiyiya ukongwa mteŵeti waki yo wachita vinthu vakulengesa.+
Mazu Ngam'mphata
^ Yapa pangafwatulikiya so kuti, “ŵanthu azereza apusisa anyawu.”
^ Pamwenga kuti, “asani akhumbika kunozga vo ananga.”
^ Pamwenga kuti, “waja mukali.”
^ Pamwenga kuti, “yo waŵanaŵana umampha.”
^ Pamwenga kuti, “umoyu wamampha.”
