Nthanthi 1:1-33
1 Nthanthi zaku Solomoni,+ mwana waku Davidi,+ fumu ya ku Isirayeli;+
2 Zo zitovya munthu kuti wasambiri* zeru+ kweniso ulongozgi;Kuti wavwisi mazu ngazeru;
3 Kuti wasaniyi ulongozgi+ wo upereka zeru,Urunji,+ cheruzgu chamampha*+ kweniso kunyoloka.
4 Zitovya munthu yo waleka kuziŵa vinandi kuti waje wakuchenje;+Mnyamata zitimuwovya kuti waziŵengi vinthu kweniso kuti waje ndi lusu la kuŵanaŵana.+
5 Munthu wazeru wavwisiya ndipu wasambira vinandi;+Munthu wakuvwisa vinthu, wasaniya ulongozgi wazeru+
6 Kuti wavwisi nthanthi kweniso ntharika,Mazu nga ŵanthu azeru ndipuso vindapi vawu.+
7 Kopa Yehova ndichu chiyambi cha kuziŵa vinthu.+
Ŵanthu azereza pe ndiwu akana zeru kweniso ulongozgi.+
8 Wamwana wangu, vwiya ulongozgi wa awusu,+Ndipu ungawujowonga cha ulongozgi wa* anyoku.+
9 Pakuti venivi ndi nkhata yamaluŵa ngakutowa ya pamutu waku+Kweniso nekelesi yamampha ukongwa ya mukhosi laku.+
10 Wamwana wangu, asani ŵanthu akubuda atikunyengere, ungazomeranga cha.+
11 Asani yiwu akamba kuti: “Tiyi tilutiyi limoza.
Tiyi tikabisamiyi ŵanthu kuti tiŵabayi.
Tamubisama, ndi kukhaza ŵanthu ambula kunanga.
12 Takuŵameza amoyu nge mo Dindi* lichitiya,Takuŵameza amoyu nge wo asikiya kuzenji.
13 Tikaphangi vinthu vawu vosi vakuzirwa;Tizazengi nyumba zidu ndi vinthu vo taphanga.
14 Tiyi tilutiyi limoza,Ndipu tosi tazamugaŵana mwakuyanana vinthu vo tamukuba.”*
15 Wamwana wangu, ungaŵalondonga cha.
Ndipu phazi laku lingakandangapu cha panthowa yawu.+
16 Pakuti malundi ngawu ngatchimbiriya kuchichita vinthu viheni;Yiwu atchimbiya kuti akadiri ndopa.+
17 Munthu wafyoke paŵaka asani watuthya chilepa kayuni kachiwona.
18 Ndichu chifukwa chaki ŵanthu yaŵa abisama kuti adiri ndopa;Yiwu abisama kuti abayi anyawu.
19 Zenizi ndizu nthowa za ŵanthu wo akhumba phindu lachinyengu,Lo libayengi ŵanthu wo atilisaniya.+
20 Zeru chayizu+ zidaniriza mumsewu.+
Zilutirizga kudaniriza ukongwa mumabalaza nga tawuni.+
21 Zidaniriza pamakona nga* misewu yo mutenda ŵanthu anandi.
Zilongoro pamageti nga tawuni kuti:+
22 “Yimwi mwaŵanthu ambula kuziŵa vinandi, kumbi muyanjengi kuleka kuziŵa vinandi mpaka zuŵanji?
Yimwi munyoza anyinu, kumbi mukondwengi ndi kunyoza mpaka zuŵanji?
Ndipu yimwi azereza, kumbi mutinkhengi kuziŵa vinthu mpaka zuŵanji?+
23 Vwani kuchenya kwangu.*+
Ndipu ndikupunguliyeningi mzimu wangu;Kweniso ndikuziŵiseningi mazu ngangu.+
24 Chifukwa chakuti ndingudana, kweni yimwi mwakananga,Ndingutambasuwa janja langu, kweni pengavi yo wanguŵikaku maŵanaŵanu,+
25 Mungulutirizga kukana ulongozgi wangu wosiNdipuso kukana kuchenya kwangu,
26 Nani so ndikusekeningi asani soka lakuwiyani;Ndikuneneningi asani cho mutopa chaza,+
27 Asani cho mutopa chaza nge chivuwa chachimphepu,Kweniso asani soka lakuwiyani nge chimphepu,Asani soka ndipuso masuzgu ngakuwiyani.
28 Pa nyengu yeniyi, yiwu andidanengi kweni ini ndiŵamukengi cha;Yiwu andipenjengi mwakukhumbisiska kweni andisaniyengi cha,+
29 Chifukwa angutinkha kuziŵa vinthu,+Kweniso angukana kopa Yehova.+
30 Yiwu angukana ulongozgi wangu;Ndipuso anguyuyuwa kuchenya kwangu.
31 Sonu akumanengi ndi masuzgu chifukwa* cha nthowa yawu,+Ndipu agutengi ulongozgi wawu.*
32 Ŵanthu ambula kuziŵa vinandi afwengi chifukwa cha nkharu yawu yabwekabweka,Ndipu azereza anangikengi chifukwa cha kudemwera kwawu.
33 Kweni munthu yo watindivwisiya wajengi mwakuvikilirika+Ndipu watimbanyizgikengi cha chifukwa chakopa soka.”+
Mazu Ngam'mphata
^ Mazu ngaki chayingu, “waziŵi.”
^ Pamwenga kuti, “kusankha umampha.”
^ Pamwenga kuti, “ungalijowonga cha dangu la anyoku.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Mazu ngo Ngakonkhoskeka.
^ Pamwenga kuti, “tazamugaŵana thumba.”
^ Mazu ngaki chayingu, “pamitu ya.”
^ Pamwenga kuti, “Ng’anamukani asani ndakuchenyani.”
^ Mazu ngaki chayingu, “aryengi chipasu.”
^ Pamwenga kuti, “mauryarya ngawu.”
