Masalimo 74:1-23
Masikili.* Sumu yaku Asafu.+
74 Yimwi Chiuta, ntchifukwa wuli mwatikana mpaka muyaya?+
Ntchifukwa wuli ukali winu ukole* pa mbereri za mu mskambu winu?+
2 Kumbukani ŵanthu wo mukuŵato kali ukongwa kuti aje ŵinu,*+Fuku lo munguliwombo kuti lije chihara chinu.+
Kumbukani Phiri la Ziyoni lo mwajangaku.+
3 Malundi nginu mungalongozge kumalu ngo nganangikiya limu.+
Murwani wabwanganduwa chechosi mumalu ngakupaturika.+
4 Arwani ŵinu akoroma mumalu nginu ngakuwunganamu.+
Ajiŵikiya vikwangwani vawu kuti vije visimikizu kweniko.
5 Yiwu ŵenga nge ŵanthu wo anyamuwa mbavi kuti akawisi vimiti muthundu.
6 Mwakugwiriskiya ntchitu mbavi kweniso visulu, agumuwa vinthu vosi vakujoba.+
7 Awotcha malu nginu ngakupaturika.+
Akazuzga chihema cho chiziŵika ndi zina linu, ndipu achiwisiya pasi.
8 Yiwu ndipuso mphapu yawu alongoro mumitima yawu kuti:
“Malu ngosi ngakuwunganamu ngaku Chiuta* mucharu ichi ngawotcheki.”
9 Palivi visimikizu vakuti isi tiwoni;Palivi mchimi weyosi,Ndipu pakati pidu palivi weyosi yo waziŵa nyengu yo venivi vimaliyengi.
10 Yimwi Chiuta, kumbi murwani walutirizgengi kunyoza mpaka zuŵanji?+
Kumbi murwani wayuyuwengi zina linu mpaka muyaya?+
11 Ntchifukwa wuli muweza janja linu, janja linu lamaryi?+
Lifwatuweni pa chifuŵa chinu* kuti muŵamali.
12 Kweni Chiuta ndi Fumu yangu kutuwa kali ukongwa,Iyu ndiyu wachita ntchitu za utaski pacharu chapasi.+
13 Munguvunduwa nyanja ndi nthazi zinu;+Munguvikita mitu ya vinyama va munyanja.
14 Munguphwanya mitu ya Leviyatani;*Ndipu mungumupereka nge chakurya ku ŵanthu wo aja muchipululu.
15 Mungujuliya nthowa akasupi kweniso timisinji;+Munguchitiska kuti misinji yakwenda nyengu zosi yikamuki.+
16 Msana ngwinu, usiku nawu ngwinu.
Ndimwi mukupanga ukweru* ndipuso lumwi.+
17 Mukuŵika mphaka zosi za charu chapasi;+Mukupanga chihanya kweniso chipwepwi.+
18 Yimwi Yehova, kumbukani mo murwani wanyoze,Kweniso mo ŵanthu azereza ayuyuliya zina linu.+
19 Mungawuperekanga cha umoyu wa njiŵa yinu ku vinyama vamudondu.
Lekani kuluwa mpaka muyaya umoyu wa ŵanthu ŵinu wo akandirizgika.
20 Kumbukani phanganu,Pakuti malu ngamdima nga charu chapasi ngazaza chiwawa.
21 Wo akandirizgika angaweleriyanga aguŵa cha;+Ŵanthu akusika kweniso akavu athamiki zina linu.+
22 Yukani yimwi Chiuta, ndipu yeruzgani mulandu winu.
Kumbukani mo azereza anyoze zuŵa losi lamphumphu.+
23 Mungaluwanga cha vo arwani ŵinu akamba.
Chiwawa cha ŵanthu wo atikudererani chilutirizga kukwera.
Mazu Ngam'mphata
^ Wonani Mazu ngo Ngakonkhoskeka.
^ Mazu ngaki chayingu, “usunkha.”
^ Mazu ngaki chayingu, “unganu winu wo mukuwuto kali ukongwa kuti uje winu.”
^ Pamwenga kuti, “Malu ngosi ngakusopiyamu Chiuta.”
^ Pamwenga kuti, “muthumba la malaya nginu.”
^ Wonani Mazu ngo Ngakonkhoskeka.
^ Pamwenga kuti, “vakumbulikiya.”
