Masalimo 5:1-12
Kwaku yo walongozga sumu za Nehiloti.* Sumu yaku Davidi.
5 Vwisiyani mazu ngangu, yimwi Yehova;+Vwisani kutamantha kwangu.
2 Vwisiyani kuliya kwangu kwakupempha chovyu,Yimwi Fumu yangu kweniso Chiuta wangu, chifukwa ndipemphera kwaku yimwi.
3 Yimwi Yehova, muvwengi mazu ngangu ndi mlenji;+Ndi mlenji ndikukambiyeningi vo vitindifipiska mtima,+ ndipu ndilindizgengi mwalinweka.
4 Pakuti yimwi ndimwi Chiuta yo wakondwa ndi vinthu viheni cha;+Palivi munthu muheni yo wangaja ndi imwi.+
5 Palivi munthu wakujikuzga yo wangama pa masu pinu.
Yimwi mutinkha ŵanthu wosi wo achita vinthu viheni.+
6 Muparanyengi ŵanthu wo akamba maboza.+
Yehova waseruka ndi ŵanthu ankhaza kweniso aryarya.*+
7 Kweni ini ndiserengi munyumba yinu+ chifukwa cha chanju chinu chikulu chambula kumala;+Ndijikamengi ndalazgiya kunyumba yinu yakupaturika* pakuti nditopa yimwi.+
8 Yimwi Yehova, ndilongozgeni mu urunji winu chifukwa cha arwani ŵangu;Ndingweruskiyeni nthowa yinu.+
9 Pakuti pa chechosi cho akamba, palivi cho ungagomezga;Mwaku yiwu mulivi chechosi kweni uheni pe;Khosi lawu ndi dindi lakujulika;Ndipu alongoro mwakunyengere ndi lilimi lawu.*+
10 Kweni Chiuta waŵakambengi kuti ŵe ndi mulandu;Nthowa zawu za uryarya ndizu ziŵawisengi.+
Yiwu adikisiki chifukwa cha mphulupulu zawu zinandi,Pakuti yiwu akugarukiyani.
11 Kweni wosi wo abisama mwaku yimwi akondwengi;+Nyengu zosi yiwu adanirizengi mwakukondwa.
Yimwi muŵajalizengi kuti muŵavikiliyi,Ndipu wo atanja zina linu akondwengi mwaku yimwi.
12 Pakuti yimwi Yehova, mutumbikengi munthu weyosi murunji;Yimwi muzingilizengi ŵanthu wo mukondwa nawu, ndipu mujengi nge chishangu chikulu.+
Mazu Ngam'mphata
^ Wonani Mazu ngo Ngakonkhoskeka.
^ Pamwenga kuti, “munthu wa mulandu wa ndopa kweniso muryarya.”
^ Pamwenga kuti, “malu nginu ngakupaturika.”
^ Pamwenga kuti, “Ndipu ŵe ndi lilimi lakusilirika.”
