Masalimo 33:1-22
33 Danirizani mwakukondwa yimwi arunji, chifukwa chaku Yehova.+
Mphakwenere kuti munthu wakunyoloka wamuthamiki.
2 Wongani Yehova mwakugwiriskiya ntchitu bangu;*Mbani sumu zakumuthamika* mwakugwiriskiya ntchitu chipangizu chakumbiya cha vingwi 10.
3 Mumbiyeni sumu yifya;+Mumbi vingwi mwalusu, limoza ndi kudaniriza mwakukondwa.
4 Pakuti mazu ngaku Yehova ngakunyoloka,+Ndipu chechosi cho wachita ntchakuthembeka.
5 Iyu watanja urunji kweniso cheruzgu chambula kwanjiya.+
Charu chapasi chazaza ndi chanju chambula kumala chaku Yehova.+
6 Kuchanya kukulengeka ndi mazu ngaku Yehova,+Ndipu ndi mzimu* wakutuwa mumulomu mwaki, vosi vo ve kweniko vikulengeka.*
7 Wawunganisa maji nga munyanja nge damu;+Maji ngo ngatenda mwanthazi watingaŵika munyumba zakusungamu vinthu.
8 Charu chosi chapasi chiwopi Yehova.+
Ndipu wosi wo aja pacharu chapasi amuwopi.
9 Pakuti iyu wangulongoro ndipu vinguchitika;+Wangulamula ndipu vingukho.+
10 Yehova watimbanyizga viŵembu va* ŵanthu amitundu;+Iyu watondekesa vo ŵanthu aŵanaŵananga kuti achiti.+
11 Kweni vo Yehova wasankha kuchita, viŵengepu* mpaka muyaya;+Maŵanaŵanu nga mtima waki ngaŵapu kutuwa ku mugonezi mpaka ku mugonezi.
12 Ngwakukondwa mtundu wo Chiuta wawu ndi Yehova,+Ŵanthu wo iyu waŵasankha kuti aje chuma chaki.+
13 Yehova walereska pasi kutuliya kuchanya;Iyu wawona ŵana wosi a ŵanthu.+
14 Kutuliya kumalu ngaki ko waja,Iyu walereseska ŵanthu wo aja pacharu chapasi.
15 Iyu ndiyu wapanga mitima ya ŵanthu wosi;Ndipu wasanda ntchitu zawu zosi.+
16 Palivi fumu yo yitaskika ndi chigulu cha asilikali;+Munthu wanthazi wataskika ndi nthazi zaki zinandi cha.+
17 Hachi ntchilindizga chaboza cha utaski;+Yingataska munthu cha chifukwa cha nthazi zaki zinandi.
18 Awonani! Jisu laku Yehova lilereska ŵanthu wo atimuwopa,+Wo alindizga chanju chaki chambula kumala.
19 Kuti waŵataski ku nyifwaKweniso kuti waŵasungi amoyu pa nyengu ya nja.+
20 Isi tilindizga Yehova.
Iyu ndiyu watitiwovya kweniso ndiyu chishangu chidu.+
21 Mitima yidu yikondwa chifukwa chaku iyu,Pakuti tithemba zina laki lakupaturika.+
22 Yimwi Yehova, chanju chinu chambula kumala chije paku isi,+Tichilutirizga kulindizga yimwi.+
Mazu Ngam'mphata
^ Anyaki akamba kuti, “bangwi.”
^ Pamwenga kuti, “Pangani sumu.”
^ Pamwenga kuti, “mvuchi.”
^ Mazu ngaki chayingu, “mizinda yaki yosi yikulengeka.”
^ Pamwenga kuti, “ulongozgi wa.”
^ Pamwenga kuti, “ulongozgi waku Yehova uŵengepu.”
