Masalimo 147:1-20
147 Thamikani Ya!*
Ntchinthu chamampha kumba sumu zakuthamika* Chiuta widu;Ntchinthu chakukondwesa kweniso chakwenere kumuthamika!+
2 Yehova wazenga Yerusalemu;+Iyu wawunganisa pamoza ŵanthu aku Isirayeli wo angumbininika.+
3 Wachizga wo ŵe ndi mtima wakusweka;Ndipu wamanga vilonda vawu.
4 Iyu waŵerenga nyenyezi;Ndipu zosi watizidana mazina.+
5 Ambuya mbakulu ndipu mbanthazi ukongwa;+Zeru zawu zingapimika cha.+
6 Yehova wasoska ŵanthu akufwasa,+Kweni ŵanthu aheni watiŵawisiya pasi.
7 Mbiyani Yehova limoza ndi kumuwonga;Mbani sumu zakuthamika Chiuta widu, mwakugwiriskiya ntchitu bangu,*
8 Yo wabenekere kuchanya ndi mitambu,Yo wawisiya vuwa pacharu,+Yo wachitiska kuti uteka ume+ mumapiri.
9 Wapereka chakurya ku vinyama,+Kweniso kwa achaholi amanaamana wo aliriya chakurya.+
10 Iyu watizikhumbirapu cha nthazi za hachi;+Pamwenga kukhumbira malundi nganthazi nga munthu.+
11 Yehova wakondwa ndi ŵanthu wo atimuwopa,+Kweniso ŵanthu wo alindizga chanju chaki chambula kumala.+
12 Kankhuska Yehova yiwi Yerusalemu.
Thamika Chiuta waku yiwi Ziyoni.
13 Iyu wachitiska kuti akabali a mageti nga tawuni yaku aje akukho;Ndipu watumbika ŵana wo ŵe mukati mwaku.
14 Wapereka chimangu muchigaŵa chaku;+Watikupaska tirigu wamampha ukongwa* mpaka kukhorwa.+
15 Watumiza dangu laki kucharu;Mazu ngaki ngatchimbiya liŵiliŵi.
16 Watumiza sinoo* nge weya wanyama;+Wambwerereska timaji takukhoma nge vyotu.+
17 Waponya matalala ngaki nge malivuvu nga chiŵandi.+
Ndiyani yo wangakunthiyapu kuzizira kwaki?+
18 Iyu watumiza mazu ngaki ndipu visongonoka.
Wachitiska kuti mphepu yaki yiputi,+ ndipu maji ngatenda.
19 Wakambiya Yakobe mazu ngaki,Kweniso wakambiya Isirayeli marangu ngaki ndi vyeruzgu vaki.+
20 Iyu wakuchitapu cha venivi ndi mitundu yinyaki;+Palivi cho yiwu aziŵa chakukwaskana ndi vyeruzgu vaki.
Thamikani Ya.*+
Mazu Ngam'mphata
^ Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
^ Pamwenga kuti, “kupangiya sumu.”
^ Anyaki akamba kuti, “bangwi.”
^ Mazu ngaki chayingu, “Watikupaska mafuta nga tirigu.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
