Masalimo 135:1-21
135 Thamikani Ya!*
Thamikani zina laku Yehova;Muthamikeni yimwi ateŵeti aku Yehova,+
2 Yimwi mutuma munyumba yaku Yehova,Mumabalaza nga nyumba yaku Chiuta widu.+
3 Thamikani Ya, pakuti Yehova ngwamampha.+
Mbani sumu zakuthamika* zina laki, pakuti nkhwakukondwesa.
4 Pakuti Ya wajisankhiya Yakobe,Isirayeli kuti waje chuma chaki chapade.*+
5 Pakuti ndiziŵa umampha kuti Yehova ndi mukulu;Ambuya mbakulu kuluska achiuta anyaki wosi.+
6 Yehova wachita chechosi cho wakhumba kuchita+Kuchanya kweniso pacharu chapasi, munyanja kweniso mundimba zosi.
7 Wachitiska kuti mitambu yikweri* kutuliya kuvigoti va charu chapasi;Wachitiska kuti malimphezi ngang’animi asani vuwa yituwa;*Watuzga mphepu munkhokwi zaki.+
8 Iyu wangubaya mwana weyosi wakwamba mu Ijipiti,Wa munthu kweniso wa nyama.+
9 Iyu wangutumiza visimikizu kweniso vakuziziswa pakati paku yiwi Ijipiti,+Kuti walangi Farawo ndi ateŵeti ŵaki wosi.+
10 Iyu wanguthereska mitundu yinandi+Kweniso wangubaya mafumu nganthazi+
11 Sihoni fumu ya Aamori,+Ogi fumu ya ku Bashani,+Kweniso maufumu ngosi nga ku Kanani.
12 Wangupereka charu chawu kuja chihara,Chihara cha ŵanthu ŵaki Ayisirayeli.+
13 Yimwi Yehova, zina linu liŵengeku mpaka muyaya.
Yimwi Yehova, mulutirizgengi kuziŵika* mpaka ku migonezi yosi.+
14 Pakuti Yehova wavikiliyengi* ŵanthu ŵaki,+Ndipu ateŵeti ŵaki waŵachitiyengi lisungu.*+
15 Angoza a ŵanthu amitundu mbasiliva ndi golidi,Ntchitu ya manja nga ŵanthu.+
16 Mulomu ŵe nawu, kweni angalongoro cha;+Masu ŵe nangu, kweni angalereska cha;
17 Makutu ŵe nangu, kweni angavwa cha;
Ndipu mumulomu mwawu mulivi mvuchi.+
18 Ŵanthu wo atiŵapanga ayananengi ndi angoza ŵenaŵa,+Nge mo so viŵiyengi ndi ŵanthu wo atiŵathemba.+
19 Yiwi nyumba yaku Isirayeli, thamika Yehova.
Yiwi nyumba yaku Aroni, thamika Yehova.
20 Yiwi nyumba yaku Levi, thamika Yehova.+
Yimwi mutopa Yehova, thamikani Yehova.
21 Wathamikiki Yehova kutuliya mu Ziyoni,+Yo waja mu Yerusalemu.+
Thamikani Ya!+
Mazu Ngam'mphata
^ Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
^ Pamwenga kuti, “Lipangiyeni sumu.”
^ Pamwenga kuti, “chakuzirwa.”
^ Yapa pangafwatulikiya so kuti, “Wajula mageti nga vuwa.”
^ Pamwenga kuti, “mvuchi ukweri.”
^ Pamwenga kuti, “Zina linu lilutiriyengi.” Mazu ngaki chayingu, “Chikumbusu chinu chilutiriyengi.”
^ Pamwenga kuti, “wayeruzgengi mulandu wa.”
^ Pamwenga kuti, “Ndipu wanguŵasinthiya maŵanaŵanu ateŵeti ŵaki.”
