Masalimo 119:1-176
-
Kuwonga Chiuta chifukwa cha mazu ngaki ngakuzirwa
-
‘Kumbi achinyamata angachita wuli kuti nthowa yawu yilutirizgi kuja yakutowa?’ (9)
-
“Nditiviyanja ukongwa vikumbusu vinu” (24)
-
“Nditiliyanja ukongwa dangu linu!” (97)
-
“Nde ndi zeru ukongwa kuluska asambizi ŵangu wosi” (99)
-
“Mazu nginu ndi nyali yo yilongozga malundi ngangu” (105)
-
“Mazu nginu ngosi mbuneneska” (160)
-
Chimangu ntcha ŵanthu wo atanja dangu laku Chiuta (165)
-
א [Aleph]
119 Mbakukondwa wo alivi kafukwa* mu nthowa zawu,Wo atenda mu dangu laku Yehova.+
2 Mbakukondwa wo asunga vikumbusu vaki,+Wo atimupenjapenja ndi mitima yawu yosi.+
3 Yiwu achita cha vinthu vambula urunji;Ndipu atenda mu nthowa zaki.+
4 Yimwi mwatilamulaKuti tisungi marangu nginu mwakuphwere.+
5 Mphanyi ndingulutirizga kuja wakukho*+Kuti ndisungengi fundu zinu!
6 Ndipu ndatingi ndichitengi soni cha+Ndichiŵanaŵaniya marangu nginu ngosi.
7 Ndikuthamikeningi ndi mtima wakunyolokaNdichisambira vakukwaskana ndi vyeruzgu vinu vaurunji.
8 Ndisungengi fundu zinu.
Mungandijowoliyanga limu cha.
ב [Beth]
9 Kumbi mnyamata wangachita wuli kuti nthowa yaki yilutirizgi kuja yakutowa?
Mwakulutirizga kuchita vinthu mwakuphwere mwakukoliyana ndi mazu nginu.+
10 Nditikupenjanipenjani ndi mtima wangu wosi.
Mungazomerezanga cha kuti ndipetuki pa marangu nginu.+
11 Ndisunga mazu nginu mwakuphwere mumtima mwangu+Kuti ndileki kukubudiyani.+
12 Muthamikiki yimwi Yehova;Ndisambizeni fundu zinu.
13 Ndi milomu yangu ndipharazgaVyeruzgu vosi vo yimwi mwakamba.
14 Ndikondwa ndi vikumbusu vinu+Kuluska mo ndichitiya ndi vinthu vinyaki vosi vakuzirwa.+
15 Ndiŵanaŵaniyengi* ulongozgi winu+Ndi kuŵika masu ngangu pa nthowa yinu.+
16 Nditingayanja ukongwa marangu nginu.
Mazu nginu ndingaluwengi cha.+
ג [Gimel]
17 Chitani nani vinthu mwalisungu ndamteŵeti winu,Kuti ndije ndi umoyu kweniso ndisungi mazu nginu.+
18 Julani masu ngangu kuti ndiwonengi umamphaumamphaVinthu vakuziziswa va mu dangu linu.
19 Ini nde mulendu mucharu.+
Mungandibisanga cha marangu nginu.
20 Ini ndalopwa chifukwa cha kukhumbisiskaVyeruzgu vinu nyengu zosi.
21 Yimwi muchenya ŵanthu akujikuzga,Ŵanthu akutembeka wo apetuka pa marangu nginu.+
22 Tuzganiku kwaku ini* mazu ngakunyoza kweniso ngakuyuyuwa,Pakuti ndasunga vikumbusu vinu.
23 Chinanga mphanyengu yo alongozgi akumana ndi kulongoro vakususkana ndi ini,Ndamteŵeti winu ndiŵanaŵaniya* fundu zinu.
24 Nditiviyanja ukongwa vikumbusu vinu;+Yivu ndivu vitindipaska ulongozgi.+
ד [Daleth]
25 Ndigona pasi mufuvu.+
Ndisungeni wamoyu mwakukoliyana ndi mazu nginu.+
26 Ndingukukambiyani nthowa zangu, ndipu mungundimuka;Ndisambizeni fundu zinu.+
27 Ndiwovyeni kuti ndivwisi vo marangu nginu ngang’anamuwa,*Kuti ndiŵanaŵaniyengi* ntchitu zinu zakuziziswa.+
28 Nditondeka kugona chifukwa cha chitima.
Ndipaskeni nthazi mwakukoliyana ndi mazu nginu.
29 Tuzganiku kwaku ini nthowa yachinyengu,+Ndipu ndilongoni lisungu mwakundipaska dangu linu.
30 Ini ndasankha nthowa yakugomezgeka.+
Ndiziŵa kuti vyeruzgu vinu vaurunji.
31 Ndikolesa vikumbusu vinu.+
Yimwi Yehova, mungazomerezanga cha kuti ndiguŵi.*+
32 Ndipenjengi ndi mtima wosi* nthowa ya marangu nginuPakuti mwanganozge malu mumtima mwangu.*
ה [He]
33 Yimwi Yehova, ndisambizeni+ nthowa ya fundu zinu,Ndipu ndiyilondongi mpaka pakumaliya.+
34 Ndiwovyeni kuti ndivwisengi vinthu,Kuti ndisungi dangu linuKweniso kuti ndilisungi ndi mtima wangu wosi.
35 Ndilongozgeni* mu nthowa ya marangu nginu,+Pakuti ndikondwa nayu.
36 Chitiskani kuti mtima wangu uyanjengi vikumbusu vinu,Mumalu mwakwanja vinthu vakuyandulisa liŵavu langu.*+
37 Wezani masu ngangu kuti ngaleki kulereska vinthu vaŵakaŵaka;+Ndisungeni wamoyu mu nthowa yinu.
38 Fiskani vo mungulayizga* mteŵeti winu,Kuti muwopekengi.*
39 Tuzganipu vinthu vakuchitiska soni vo nditopa,Pakuti vyeruzgu vinu vamampha.+
40 Wonani mo ndikhumbisiskiya marangu nginu.
Ndisungeni wamoyu mu urunji winu.
ו [Waw]
41 Yimwi Yehova, ndilongoni chanju chinu chambula kumala,+Ndipuso utaski winu mwakukoliyana ndi layizgu linu;*+
42 Pavuli paki, ndimumukengi munthu yo watindinyoza,Pakuti ndithemba mazu nginu.
43 Mungatuzgiyangamu limu cha mazu ngauneneska mumulomu mwangu,Pakuti cheruzgu chinu ndichu chilindizga changu.*
44 Ndisungengi dangu linu nyengu zosi,Muyaya mpaka muyaya.+
45 Ndipu ndiyendengiyendengi mumalu ngakuvikilirika,*+Pakuti ndipenjapenja marangu nginu.
46 Ndikambengi vakukwaskana ndi vikumbusu vinu pa masu pa mafumu,Ndipu ndichitengi soni cha.+
47 Nditingayanja ukongwa marangu nginu,Hinya nditingayanja.+
48 Marangu nginu ngo nditingayanja, ndingasoskiyengi manja ngangu,+Ndipu ndiŵanaŵaniyengi* fundu zinu.+
ז [Zayin]
49 Kumbukani mazu nginu ngo* mungundikambiya ndamteŵeti winu,Ngo mungugwiriskiya ntchitu kuti mundipaski chilindizga.
50 Venivi vitindipembuzga mu masuzgu ngangu,+Pakuti mazu nginu ngandisunga wamoyu.
51 Ŵanthu akujikuzga atindinyoza,Kweni ini ndituwapu cha pa dangu linu.+
52 Yimwi Yehova, ndikumbuka vyeruzgu vinu vakali ukongwa,+Ndipu vitindipembuzga.+
53 Nde ndi ukali wakukole chifukwa cha ŵanthu aheni,Wo ajowo dangu linu.+
54 Fundu zinu ze nge sumu kwaku iniKwekosi ko ndija.*
55 Ndi usiku ndikumbuka zina linu yimwi Yehova,+Kuti ndisungi dangu linu.
56 Venivi ndivu ndaja ndichichitaChifukwa ndasunga marangu nginu.
ח [Heth]
57 Yehova ntchigaŵa changu;+Ndalayizga kuti ndisungengi mazu nginu.+
58 Nditikupemphani* ndi mtima wangu wosi;+Ndichitiyeni lisungu+ mwakukoliyana ndi layizgu linu.*
59 Ndasanda nthowa zangu,Kuti ndiweze maphazi ngangu ku vikumbusu vinu.+
60 Ndichita vinthu mwaliŵi ndipu ndiswera chaKuti ndisungi marangu nginu.+
61 Vingwi va ŵanthu aheni vandizingiliza,Kweni dangu linu nditililuwa cha.+
62 Pakati pa usiku ndiyuka kuti ndikuwongeni+Chifukwa cha vyeruzgu vinu vaurunji.
63 Nde mubwezi wa ŵanthu wosi wo atikuwopaniKweniso wa ŵanthu wo asunga marangu nginu.+
64 Yimwi Yehova, chanju chinu chambula kumala chizaza charu chapasi;+Ndisambizeni fundu zinu.
ט [Teth]
65 Mwachita nani vinthu umampha ini ndamteŵeti winu,Yimwi Yehova, mwachita nani vinthu mwakukoliyana ndi mazu nginu.
66 Ndisambizeni zeru kweniso kuziŵa vinthu,+Pakuti ini ndithemba marangu nginu.
67 Ndechendakumani ndi masuzgu, ndalandanga kaŵikaŵi,*Kweni sonu ndisunga mazu nginu.+
68 Yimwi ndimwi amampha+ ndipu ntchitu zinu zamampha.
Ndisambizeni fundu zinu.+
69 Ŵanthu akujikuzga atindikuluŵa ndi maboza,Kweni ini ndisunga ulongozgi winu ndi mtima wangu wosi.
70 Mitima yawu njakukulungundiya,+Kweni ini nditiliyanja ukongwa dangu linu.+
71 Vaja umampha kuti ndakumana ndi masuzgu,+Kuti ndisambiri fundu zinu.
72 Dangu lo mwapereka ndamampha kwaku ini,+Ndamampha kuluska golidi ndi siliva masawuzandi nganandi.+
י [Yod]
73 Manja nginu ndingu ngakundipanga kweniso kundiwumba.
Ndiwovyeni kuti ndije wakuvwisa vinthu,Ndi chilatu chakuti ndisambiri marangu nginu.+
74 Wo atikuwopani atindiwona ndipu akondwa,Pakuti mazu nginu ntchilindizga changu.*+
75 Yimwi Yehova, ndiziŵa kuti vyeruzgu vinu vaurunji+Kweniso kuti mwachitiska kuti ndisuzgiki chifukwa cha kugomezgeka kwinu.+
76 Chanju chinu chambula kumala+ chindipembuzgi,Mwakukoliyana ndi layizgu lo* mungundikambiya ndamteŵeti winu.
77 Ndichitiyeni lisungu kuti ndilutirizgi kuja wamoyu,+Pakuti nditiliyanja ukongwa dangu linu.+
78 Ŵanthu akujikuzga alengeseki,Pakuti atindibudiya kwambula chifukwa.*
Kweni ini ndiŵanaŵaniyengi* ulongozgi winu.+
79 Ŵanthu wo atikuwopani awere kwaku ini,Ŵanthu wo aziŵa vikumbusu vinu.
80 Mtima wangu uje wambula kafukwa pakulondo fundu zinu,+Kuti ndileki kulengeseka.+
כ [Kaph]
81 Ndikhumbisiska utaski winu,+Pakuti mazu nginu ntchilindizga changu.*
82 Masu ngangu ngakhumbisiska mazu nginu+Ndichikamba kuti: “Mundipembuzgengi zuŵanji?”+
83 Pakuti nde nge botolu lachikopa lo lanikika mujosi,Kweni fundu zinu nditiziluwa cha.+
84 Kumbi ini ndamteŵeti winu ndilindizgengi kwa mazuŵa ngalinga?
Kumbi muŵayeruzgengi zuŵanji ŵanthu wo atinditombozga?+
85 Ŵanthu akujikuzga atindikumbiya mazenji,Ŵanthu wo akana dangu linu.
86 Marangu nginu ngosi ngakugomezgeka.
Ŵanthu atinditombozga kwambula chifukwa; ndiwovyeni!+
87 Yiwu anguja kamanavi kundituzgapu pacharu,Kweni ulongozgi winu ndinguwujowo cha.
88 Ndisungeni wamoyu chifukwa cha chanju chinu chambula kumala,Kuti ndisungi vikumbusu vinu vo mwakamba.
ל [Lamed]
89 Mazu nginu ngalutirizgengi kuŵaku kuchanya,Mpaka muyaya yimwi Yehova.+
90 Kugomezgeka kwinu kuŵengepu mpaka ku migonezi yosi.+
Charu chapasi mwachijalikiska mwakukho, kuti chilutirizgi kuŵaku.+
91 Chifukwa cha vyeruzgu vinu, vilutirizga* kuŵaku mpaka msanawale,Pakuti vosi vitikuteŵetiyani.
92 Asani dangu linu ndaliyanjanga cha,Ndatingi ndimalengi pa nyengu yo ndakumananga ndi masuzgu.+
93 Ndingaluwengi cha marangu nginu,Chifukwa mwasunga umoyu wangu mwakugwiriskiya ntchitu marangu ngenanga.+
94 Ini nde winu; nditaskeni,+Chifukwa ndapenjapenja marangu nginu.+
95 Ŵanthu aheni alindizga kuti andinangi,Kweni ndiŵanaŵaniya ukongwa vikumbusu vinu.
96 Ini ndawona kuti vinthu vosi vakufikapu ve ndi pakumaliya,Kweni dangu linu lilivi pakumaliya.*
מ [Mem]
97 Nditiliyanja ukongwa dangu linu!+
Nditiliŵanaŵaniya* zuŵa losi lamphumphu.+
98 Dangu linu litindichitiska kuŵa wazeru kuluska arwani ŵangu,+Chifukwa nde nalu mpaka muyaya.
99 Nde ndi zeru ukongwa kuluska asambizi ŵangu wosi,+Pakuti ndiŵanaŵaniya* vikumbusu vinu.
100 Ndichita vinthu mwazeru ukongwa kuluska arara,Pakuti ndisunga marangu nginu.
101 Ndikana kwenda pa nthowa yeyosi yiheni,+Kuti ndisungi mazu nginu.
102 Ndipetuka cha pa vyeruzgu vinu,Pakuti yimwi mwandisambiza.
103 Mazu nginu nganowa ukongwa mumulomu mwangu,Kuluska mo uchi unowe mumulomu mwangu!+
104 Ndichita vinthu mwazeru chifukwa cha marangu nginu.+
Ndichu chifukwa chaki nditinkha nthowa yeyosi yaboza.+
נ [Nun]
105 Mazu nginu ndi nyali yo yilongozga malundi ngangu,Kweniso mbukweru wo uŵalisa nthowa yangu.+
106 Ini ndalapizga ndipu ndifiskengi vo ndalapizga,Kuti ndisungengi vyeruzgu vinu vaurunji.
107 Ndasuzgika ukongwa.+
Yimwi Yehova, ndisungeni wamoyu mwakukoliyana ndi mazu nginu.+
108 Yimwi Yehova, kondwani ndi sembi zangu zawanangwa zakukuthamikani,*+Ndipu ndisambizeni vyeruzgu vinu.+
109 Umoyu wangu uja pa ngozi kaŵikaŵi,*Kweni dangu linu ndaliluwa cha.+
110 Ŵanthu aheni andithyiya chiŵana,Kweni ndapetukapu cha pa marangu nginu.+
111 Vikumbusu vinu nditiviwona nge chuma* changu chamuyaya,Pakuti vikondwesa mtima wangu.+
112 Ndasimikiza* kuti ndilondongi fundu zinuNyengu zosi mpaka muyaya.
ס [Samekh]
113 Nditinkha ŵanthu a mtima wapaŵipaŵi,*+Kweni nditanja dangu linu.+
114 Ndimwi mduzi wangu kweniso chishangu changu,+Pakuti mazu nginu ntchilindizga changu.*+
115 Ndilekeni yimwi mwaŵanthu aheni,+Kuti ndisungi marangu ngaku Chiuta wangu.
116 Ndiwovyeni nge mo mukulayizgiya,*+Kuti ndilutirizgi kuja ndi umoyu;Mungazomerezanga cha kuti vo ndilindizga vileki kufiskika.*+
117 Ndiwovyeni kuti nditaskiki;+Ndipu pavuli paki, nyengu zosi ndiŵikengi maŵanaŵanu ngangu ngosi pa fundu zinu.+
118 Yimwi mukana ŵanthu wosi wo apetuka pa fundu zinu,+Pakuti yiwu mbaboza kweniso mbachinyengu.
119 Mutaya ŵanthu wosi aheni a pacharu chapasi nge kuti ŵenga vinthu vabwekabweka.*+
Ndichu chifukwa chaki nditanja vikumbusu vinu.
120 Liŵavu langu linjekeme* chifukwa cha kopa yimwi;Ini nditopa vyeruzgu vinu.
ע [Ayin]
121 Ini ndachita chinthu cho ntchakwenere kweniso chaurunji.
Mungandiperekanga ku ŵanthu wo atindikandirizga cha!
122 Ndisimikiziyeni ndamteŵeti winu kuti vinthu vindiyendiyengi umampha;Ŵanthu akujikuzga angandikandirizganga cha.
123 Masu ngangu ngavuka chifukwa cha kulindizga utaski winu+Kweniso layizgu linu laurunji.*+
124 Ndilongoni chanju chinu chambula kumala ndamteŵeti winu,+Ndipu ndisambizeni fundu zinu.+
125 Ini nde mteŵeti winu; ndiwovyeni kuti ndivwisengi vinthu,+Kuti ndiziŵi vikumbusu vinu.
126 Nyengu yakwana yakuti Yehova wachitepu kanthu,+Pakuti yiwu aswa dangu linu.
127 Ndichu chifukwa chaki ini nditanja marangu nginuKuluska golidi, hinya chinanga ndi golidi wamampha ukongwa.*+
128 Mwaviyo ndiwona kuti ulongozgi wosi wakutuliya kwaku yimwi ngwakwenere;+Nditinkha nthowa yeyosi yaboza.+
פ [Pe]
129 Vikumbusu vinu vamampha ukongwa.
Ndichu chifukwa chaki nditivisunga.
130 Kuvumbulika kwa mazu nginu kupereka ukweru,+Ŵanthu ambula kuziŵa vinandi kutiŵapaska zeru.+
131 Ndiyasamuwa ukongwa mulomu wangu ndi kusisiya mtima,Chifukwa ndikhumbisiska marangu nginu.+
132 Ng’anamukiyani kwaku ini ndipu ndichitiyeni lisungu,+Mwakukoliyana ndi cheruzgu chinu cho mukujalikiskiya ŵanthu wo atanja zina linu.+
133 Longozgani maphazi ngangu umamphaumampha* mwakukoliyana ndi mazu nginu;Chinthu chechosi chiheni chingandilamuliyanga cha.+
134 Nditaskeni* ku ŵanthu akukandirizga,Ndipu ini ndisungengi marangu nginu.
135 Ndiŵalisiyeni chisku chinu* ndamteŵeti winu,+Ndipu ndisambizeni fundu zinu.
136 Masozi ngasika mumasu mwanguChifukwa ŵanthu atilisunga cha dangu linu.+
צ [Tsade]
137 Ndimwi arunji yimwi Yehova,+Ndipu vyeruzgu vinu vakunyoloka.+
138 Vikumbusu vo mupereka vaurunjiNdipu vakuthembeka nyengu zosi.
139 Phamphu langu litindimeza,+Chifukwa arwani ŵangu angaluwa mazu nginu.
140 Mazu nginu ngakuyengetulika umampha,+Ndipu ini ndamteŵeti winu nditingayanja.+
141 Ini nde wambula ntchitu kweniso nde wakuyuyulika;+Kweni marangu nginu ndangaluwa cha.
142 Urunji winu mburunji wamuyaya,+Ndipu dangu linu mbuneneska.+
143 Chinanga urwirwi kweniso masuzgu vindiwiyi,Nditingayanja mbwenu marangu nginu.
144 Urunji wa vikumbusu vinu ngwamuyaya.
Ndiwovyeni kuti ndivwisengi vinthu,+ ndi chilatu chakuti ndilutirizgi kuja wamoyu.
ק [Qoph]
145 Ndidana ndi mtima wangu wosi. Ndimukeni yimwi Yehova.
Ini ndisungengi fundu zinu.
146 Nditikudanani; nditaskeni!
Ini ndisungengi vikumbusu vinu.
147 Ndayuka lumwi lechendatuwi* kuti ndipemphi chovyu,+Pakuti mazu nginu ntchilindizga changu.*
148 Masu ngangu ngajulika maulinda nga usiku ngechendayambi,Kuti ndiŵanaŵaniyi* mazu nginu.+
149 Vwisiyani mazu ngangu chifukwa cha chanju chinu chambula kumala.+
Yimwi Yehova, ndisungeni wamoyu mwakukoliyana ndi urunji winu.
150 Ŵanthu wo achita jalidu lakuchitiska soni* atuza kufupi;Yiwu ŵe kutali ukongwa ndi dangu linu.
151 Mwe pafupi yimwi Yehova,+Ndipu marangu nginu ngosi ngauneneska.+
152 Ndikusambira vakukwaskana ndi vikumbusu vinu kali ukongwa,Kuti mukuvijalikiska kuti viŵeku mpaka muyaya.+
ר [Resh]
153 Wonani masuzgu ngangu ndipu nditaskeni,+Pakuti ndaliluwa cha dangu linu.
154 Ndivikiliyeni* ndipu nditaskeni;+Ndisungeni wamoyu mwakukoliyana ndi layizgu linu.*
155 Utaski we kutali ndi ŵanthu aheni,Pakuti yiwu atizipenjapenja cha fundu zinu.+
156 Lisungu linu ndikulu yimwi Yehova.+
Ndisungeni wamoyu mwakukoliyana ndi urunji winu.
157 Wo atinditombozga kweniso arwani ŵangu mbanandi;+Kweni ndapetuka cha pa vikumbusu vinu.
158 Ŵanthu aryarya nditiŵalereska mwakuŵatinkha,Chifukwa chakuti asunga cha mazu nginu.+
159 Wonani mo nditanjiya marangu nginu!
Yimwi Yehova, ndisungeni wamoyu chifukwa cha chanju chinu chambula kumala.+
160 Mazu nginu ngosi mbuneneska,+Ndipu vyeruzgu vinu vosi vaurunji viŵengeku mpaka muyaya.
ש [Sin] pamwenga [Shin]
161 Alongozgi atinditombozga+ kwambula chifukwa,Kweni mtima wangu utopa mazu nginu.+
162 Ndikondwa chifukwa cha mazu nginu+Nge munthu yo wasaniya vinthu vinandi vakuti wayoli.
163 Nditinkha boza ndipu litindiseruska+Kweni nditanja dangu linu.+
164 Nditikuthamikani maulendu 7 pa zuŵaChifukwa cha vyeruzgu vinu vaurunji.
165 Chimangu chikulu ntcha ŵanthu wo atanja dangu linu;+Ndipu palivi cho chingaŵaguŵiska*
166 Ndilindizga ntchitu zinu za utaski yimwi Yehova,Ndipu ndisunga marangu nginu.
167 Ndisunga vikumbusu vinu,Ndipu nditiviyanja ukongwa.+
168 Ndisunga marangu nginu kweniso vikumbusu vinu,Pakuti yimwi muziŵa vosi vo ndichita.+
ת [Taw]
169 Kuliya kwangu kwakupempha chovyu kukufikeni yimwi Yehova.+
Ndiwovyeni kuti ndivwisengi vinthu mwakukoliyana ndi mazu nginu.+
170 Pemphu langu lakuti mundichitiyi lisungu lifiki kwaku yimwi.
Nditaskeni nge mo mukulayizgiya.*
171 Milomu yangu yizazi ndi mazu ngakuthamika,+Pakuti yimwi mutindisambiza fundu zinu.
172 Lilimi langu limbi vakukwaskana ndi mazu nginu,+Pakuti marangu nginu ngosi ngaurunji.
173 Janja linu lije lakunozgeka kundiwovya,+Chifukwa ndasankha kuvwiya ulongozgi winu.+
174 Ndikhumbisiska utaski winu yimwi Yehova,Ndipu nditiliyanja ukongwa dangu linu.+
175 Ndisungeni wamoyu kuti ndikuthamikeni;+Vyeruzgu vinu vindiwovyi.
176 Ndalanda nge mbereri yo yasoŵa.+ Ndipenjenipenjeni ndamteŵeti winu,Pakuti ndangaluwa cha marangu nginu.+
Mazu Ngam'mphata
^ Pamwenga kuti, “wo mbakugomezgeka.”
^ Mazu ngaki chayingu, “Mphanyi nthowa zangu zingujalikiskika mwakukho.”
^ Pamwenga kuti, “Ndisambirengi.”
^ Mazu ngaki chayingu, “Kunkhuzgiyani kutali ndi ini.”
^ Pamwenga kuti, “ndisambira.”
^ Mazu ngaki chayingu, “ndivwisi nthowa ya marangu nginu.”
^ Pamwenga kuti, “ndisambirengi.”
^ Pamwenga kuti, “ndilengeseki.”
^ Mazu ngaki chayingu, “Nditchimbiyengi pa.”
^ Yapa pangafwatulikiya so kuti, “Pakuti mwachitiska kuti mtima wangu uje wachiganga.”
^ Pamwenga kuti, “Ndiyendeseni.”
^ Pamwenga kuti, “Mumalu mwakwanja phindu.”
^ Pamwenga kuti, “mungukambiya.”
^ Yapa pangafwatulikiya so kuti, “Layizgu lo mulayizga ŵanthu wo atikuwopani.”
^ Pamwenga kuti, “mwakukoliyana ndi vo mungukamba.”
^ Pamwenga kuti, “Pakuti ini ndilindizga cheruzgu chinu.”
^ Pamwenga kuti, “mumalu ngasani.”
^ Pamwenga kuti, “ndisambirengi.”
^ Pamwenga kuti, “layizgu linu lo.”
^ Pamwenga kuti, “Munyumba yo ndijamu nge mulendu.”
^ Pamwenga kuti, “Ndiwoloŵesa chisku chinu.”
^ Pamwenga kuti, “ndi vo mungukamba.”
^ Pamwenga kuti, “ndabudanga mwangozi.”
^ Pamwenga kuti, “Pakuti ndilindizga mazu nginu.”
^ Pamwenga kuti, “mazu ngo.”
^ Yapa pangafwatulikiya so kuti, “atindibudiya ndi maboza.”
^ Pamwenga kuti, “ndisambirengi.”
^ Pamwenga kuti, “Pakuti ndilindizga mazu nginu.”
^ Kung’anamuwa vinthu vosi vo wakulenga.
^ Mazu ngaki chayingu, “ndisani ukongwa.”
^ Pamwenga kuti, “Nditilisambira.”
^ Pamwenga kuti, “ndisambira.”
^ Mazu ngaki chayingu, “sembi zawanangwa zakutuliya pamulomu wangu.”
^ Pamwenga kuti, “Umoyu wangu uja mujanja langu kaŵikaŵi.”
^ Pamwenga kuti, “chihara.”
^ Mazu ngaki chayingu, “Mtima wangu wasimikiza.”
^ Pamwenga kuti, “wakugaŵikana.”
^ Pamwenga kuti, “Pakuti ini ndilindizga mazu nginu.”
^ Pamwenga kuti, “mukukambiya.”
^ Pamwenga kuti, “kuti ndichiti soni chifukwa cha vo ndilindizga.”
^ Vinthu vo vijaliya asani ayengetuwa visulu.
^ Mazu ngaki chayingu, “Mnofu wangu unjekeme.”
^ Pamwenga kuti, “mazu nginu ngaurunji.”
^ Pamwenga kuti, “golidi wakuyengetulika.”
^ Pamwenga kuti, “Chitiskani kuti ndingasukunyikanga cha pakwenda.”
^ Mazu ngaki chayingu, “Ndiwomboni.”
^ Pamwenga kuti, “Ndisekeriyeni.”
^ Pamwenga kuti, “nyenyezi za ku matandakucha zichituwa.”
^ Pamwenga kuti, “Pakuti ini ndilindizga mazu nginu.”
^ Pamwenga kuti, “ndisambiri.”
^ Pamwenga kuti, “jalidu launyakazi.”
^ Pamwenga kuti, “Yeruzgani mulandu wangu.”
^ Pamwenga kuti, “ndi mazu nginu.”
^ Pamwenga kuti, “Ndipu kwaku yiwu kulivi chakuguŵiska.”
^ Pamwenga kuti, “mukukambiya.”
