Masalimo 105:1-45
-
Yehova watiŵachitiya vinthu mwakugomezgeka ŵanthu ŵaki
-
Chiuta wakumbuka phanganu laki (8-10)
-
“Akusankhika ŵangu mungaŵakwaskanga cha” (15)
-
Chiuta wagwiriskiya ntchitu Yosefi yo wangugulisika kuti waje kapolu (17-22)
-
Vakuziziswa vo Chiuta wanguchita ku Ijipiti (23-36)
-
Ayisirayeli atuwa mu Ijipiti (37-39)
-
Chiuta wakumbuka layizgu lo wangukambiya Abrahamu (42)
-
105 Wongani Yehova,+ daniyani pa zina laki,Ziŵisani ntchitu zaki pakati pa ŵanthu amitundu yosi!+
2 Mumbiyeni, mumbiyeni sumu zakumuthamika,*Lungurukani* ntchitu zaki zosi zakuziziswa.+
3 Mumalikengi pakuthamika zina laki lakupaturika.+
Mitima ya ŵanthu wo apenja Yehova yikondwi.+
4 Penjani Yehova+ kweniso nthazi zaki.
Penjani chisku chaki nyengu zosi.
5 Kumbukani ntchitu zakuziziswa zo iyu wachita,Vakuziziswa vo iyu wachita kweniso vyeruzgu vo iyu wapereka,+
6 Yimwi mphapu* yaku Abrahamu mteŵeti waki,+Yimwi ŵana aku Yakobe, akusankhika ŵaki.+
7 Iyu ndi Yehova Chiuta widu.+
Vyeruzgu vaki ve pacharu chosi chapasi.+
8 Wakumbuka phanganu laki mpaka muyaya,+Layizgu lo iyu wangupereka,* mpaka ku migonezi 1,000,+
9 Phanganu lo iyu wanguchita ndi Abrahamu,+Ndipuso layizgu lo wangulapizgiya Isaki,+
10 Lo wangulijalikiska kuja dangu kwaku YakobeKweniso nge phanganu lamuyaya kwaku Isirayeli,
11 Mwakukamba kuti, “Ndikupaskengi charu cha Kanani+Kuti chije chihara chaku cho ndakugaŵiya.”+
12 Wangukamba venivi pa nyengu yo ŵenga amanavi,+Hinya, ŵenga amana ukongwa, ndipuso ŵenga alendu mucharu cho.+
13 Yiwu ayingangayinganga kutuwa ku mtundu unyaki kuluta ku mtundu unyaki,Kutuwa ku ufumu unyaki kuluta ku ŵanthu anyaki.+
14 Iyu wanguzomereza cha kuti munthu weyosi waŵakandirizgi,+Kweni wanguchenya mafumu chifukwa chaku yiwu,+
15 Iyu wangukamba kuti, “Akusankhika ŵangu mungaŵakwaskanga cha,Ndipu achimi ŵangu mungaŵachitiyanga cha chinthu chechosi chiheni.”+
16 Iyu wanguchitiska kuti mucharu cho muwi nja;+Ndipu wanguŵanola chiŵandi.*
17 Wangutuma munthu kuti wadanjiyepu panthazi pawuYosefi yo wangugulisika kuja kapolu.+
18 Yiwu angumanga* malundi ngaki ndi simbi,+Ndipu khosi laki angulisereza muvisulu;*
19 Mpaka pa nyengu yo mazu ngaki ngangufiskikiya,+Mazu ngaku Yehova ndingu ngangumuyengetuwa.
20 Fumu yingulamula kuti amufwatuwi,+Yo walamuliyanga ŵanthu wangumufwatuwa.
21 Wangumuŵika kuja wakuwonere nyumba yaki,Ndipu walamuliyanga pa katundu waki yosi,+
22 Wangumupaska mazaza pa* alongozgi ŵaki kuti wachiti nawu nge mo wakhumbiyaKweniso kuti wasambizi ŵara ŵaki zeru.+
23 Pavuli paki, Isirayeli wanguza ku Ijipiti,+Ndipu Yakobe wanguja nge mulendu mucharu chaku Hamu.
24 Chiuta wanguchitiska kuti ŵanthu ŵaki ayandani;+Wanguŵachitiska kuti aje anthazi ukongwa kuluska arwani ŵawu,+
25 Wo wanguŵazomereza kuti mitima yawu yisinthi ndi kwamba kutinkha ŵanthu ŵaki,Kweniso kuti aŵachitiyi chiŵembu ateŵeti ŵaki.+
26 Wangutuma mteŵeti waki Mozesi,+Kweniso Aroni+ yo wangumusankha.
27 Yiwu anguchita visimikizu vaki pakati pawu,Ndipuso vakuziziswa vaki mucharu chaku Hamu.+
28 Wangutumiza mdima ndipu charu cho chinguchita mdima;+Yiwu angungagarukiya cha mazu ngaki.
29 Maji ngawu wangungasambusa ndopaNdipu wangubaya somba zawu.+
30 Charu chawu chinguzaza amuchuwa,+Chinanga ndi muvipinda va nyumba yachifumu.
31 Wangulamula viphanga kuti viŵayukiyiKweniso nyezi zakuluma kuti zisere muvigaŵa vawu vosi.+
32 Vuwa yawu wanguyisambusa matalalaNdipu wangutumiza malimphezi* mucharu chawu.+
33 Wangunanga mphereska zawu kweniso vimiti vawu va mkuyuKweniso wanguvikita vimiti va muchigaŵa chawu.
34 Wangulamula azombi kuti ateketi,Azombi amanaamana ambula kuŵerengeka.+
35 Azombi wo angutekeka chakume chechosi mucharu cho,Ndipu angurya vipasu va charu.
36 Pavuli paki, wangubaya ŵana wosi akwamba mucharu chawu,+Wo ŵenga chiyambi cha nthazi zawu zakubala.
37 Wangutuzga ŵanthu ŵaki, ndipu pakutuwa angupinga siliva ndi golidi;+Pengavi weyosi pa mafuku ngaki yo wanguguŵa.
38 Yiwu ŵati atuwa, Ijipiti wangukondwa,Pakuti angumuwopa ukongwa Isirayeli.*+
39 Wanguyala mtambu kuti uŵabisi+
Kweniso motu kuti uŵambulikiyengi ndi usiku.+
40 Yiwu angupempha ndipu wanguŵapaska tiyuni ta kambuŵi;+Wangulutirizga kuŵakhorweska ndi viŵandi vakutuliya kuchanya.+
41 Wangujula jalawi ndipu maji ngangupopoma;+Maji ngenanga ngangusapaliya muchipululu nge msinji.+
42 Pakuti wangukumbuka layizgu lakupaturika lo wangulayizga Abrahamu mteŵeti waki.+
43 Mwaviyo wangutuzga ŵanthu ŵaki achisekere,+Ŵanthu ŵaki akusankhika ndi kudaniriza mwalikondwa.
44 Wanguŵapaska vyaru va ŵanthu amitundu;+Yiwu anguhara vinthu vo ŵanthu anyaki anguvisuzgikiya kuti avisaniyi,+
45 Kuti yiwu asungi vo wanguŵalamula+Kweniso kuti avwiyi marangu ngaki.
Thamikani Ya!*
Mazu Ngam'mphata
^ Yapa pangafwatulikiya so kuti, “Mulongorongi vakukwaskana ndi.”
^ Pamwenga kuti, “mupangiyeni sumu.”
^ Mazu ngaki chayingu, “mbewu.”
^ Mazu ngaki chayingu, “Mazu ngo wangulamula.”
^ Mazu ngaki chayingu, “wanguphwanya tivimiti tosi ta viŵandi.” Panyaki kung’anamuwa tivimiti to asungangamu viŵandi.
^ Mazu ngaki chayingu, “angumupweteka.”
^ Pamwenga kuti, “umoyu waki ungusere muvisulu.”
^ Mazu ngaki chayingu, “Kuti wamangi.”
^ Pamwenga kuti, “milipu ya motu.”
^ Mazu ngaki chayingu, “Pakuti yiwu anguŵawopa ukongwa.”
^ Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
