Masalimo 102:1-28
Pempheru la munthu wakukandirizgika yo we mu suzgu,* ndipu wapunguliya Yehova vo vitimufipiska mtima.+
102 Yimwi Yehova, vwani pempheru langu;+Kuliya kwangu kwakupempha chovyu kukufikeni.+
2 Mungandibisiyanga chisku chinu cha pa nyengu ya masuzgu.+
Laziskiyani gutu linu* kwaku ini;Mundimukengi mwaliŵiliŵi asani ndidana.+
3 Pakuti mazuŵa ngangu ngamala liŵiliŵi nge josi,Ndipu viwanga vangu vanyeka nge nkhuni pachipembu.+
4 Mtima wangu wawisikiya pasi nge uteka ndipu wafota,+Pakuti ndiluwa kurya chakurya changu.
5 Chifukwa cha kukuta kwangu kwakudaniriza,+Viwanga vangu vikaniriya kumnofu wangu.+
6 Ini ndiyanana ndi chiyuni cha khuya chamuchipululu;Kweniso nde nge phululu mumahami.
7 Asani ndagona ndiŵavi tulu;*Nde nge kayuni ko ke kija pachanya pa nyumba.+
8 Arwani ŵangu atindinyoza zuŵa losi lamphumphu.+
Wo atindinena, agwiriskiya ntchitu zina langu pakutemba.
9 Pakuti nditurya vyotu nge chakurya changu,+Ndipu chakumwa changu chasazgikana ndi masozi,+
10 Chifukwa cha ukali winu kweniso kutoloma kwinu,Pakuti mungundinyamuliya muchanya kuti munditayi.
11 Mazuŵa ngangu nge nge mduzi wo umala,+Ndipu ndifota nge uteka.+
12 Kweni yimwi Yehova ndimwi wamuyaya,+Mulutirizgengi kuziŵika* mpaka ku migonezi yosi.+
13 Yimwi mutondekengi cha kuyuka ndipu Ziyoni mumulongongi lisungu,+Pakuti nyengu yakuti mumulongo lisungu linu yakwana;+Nyengu yakuŵikika yafika.+
14 Pakuti ateŵeti ŵinu akondwa ndi mya yaki+Kweniso atanja chinanga ndi fuvu laki.+
15 Mitundu yiwopengi zina laku Yehova,Ndipu mafumu ngosi nga pacharu chapasi ngawopengi unkhankhu winu.+
16 Pakuti Yehova wazengengi so Ziyoni;+Iyu wawonekiyengi mu unkhankhu waki.+
17 Wavwisiyengi pempheru la ŵanthu wo asoŵa pakuko;+Pempheru lawu waliyuyuwengi cha.+
18 Ivi valembeke mugonezi wakunthazi,+Kuti ŵanthu wo ŵechendaweku* azithamiki Ya.
19 Pakuti iyu walereska pasi kutuliya mumalu ngaki ngapachanya ngakupaturika,+Yehova walereska charu chapasi kutuliya kuchanya,
20 Kuti wavwi kukuta kwa akayidi,+Kuti wafwatuwi wo ayeruzgika kuti abayiki,+
21 Ndi chilatu chakuti zina laku Yehova lipharazgiki mu Ziyoni+Ndipuso kuti wathamikiki mu Yerusalemu,
22 Asani ŵanthu kweniso maufumuAwungana pamoza kuti ateŵete Yehova.+
23 Iyu wangundiphanga nthazi zangu nyengu yaki yechendakwani;Ndipuso wangudumuwa mazuŵa ngangu.
24 Ini ndingukamba kuti: “Yimwi Chiuta wangu,Mungandibayanga mazuŵa nga umoyu wangu ngeche pakatikati cha,Yimwi yo vyaka vinu vilutiriya mu migonezi yosi.+
25 Mukuŵika mafawundeshoni nga charu chapasi kali ukongwa,Ndipu kuchanya ndi ntchitu ya manja nginu.+
26 Vinthu venivi vazamumala kweni yimwi mulutirizgengi kuŵaku;Vosi vazamumala nge mo chakuvwala chimaliya.
Muweziyengepu vinyaki nge mo viŵiya ndi malaya, ndipu navu vimalengi.
27 Kweni yimwi musintha cha, ndipu vyaka vinu vimalengi cha.+
28 Ŵana ŵa ateŵeti ŵinu ajengi mwakuvikilirika,Ndipu mphapu yawu yijalikiskikengi mwakukho pa masu pinu.”+
Mazu Ngam'mphata
^ Pamwenga kuti, “yo walopwa.”
^ Pamwenga kuti, “Sindamani ndipu vwisiyani.”
^ Yapa pangafwatulikiya so kuti, “Ndawonda ukongwa.”
^ Pamwenga kuti, “Zina linu lilutiriyengi.” Mazu ngaki chayingu, “Chikumbusu chinu chilutiriyengi.”
^ Mazu ngaki chayingu, “ŵechendalengeki.”
