Machitidu nga Akutumika 28:1-31
28 Tati tafika umampha kumtunda, tinguvwa kuti chirwa* chenichi chidanika kuti Melita.+
2 Ŵanthu wo alongoronga chineneru chachilendu,* angutilongo lisungu likulu ukongwa. Yiwu angupemba motu ndipu angutilonde umampha tosi chifukwa kwawanga vuwa ndipuso kwaziziranga.
3 Kweni Paulo wati wanyamuwa nkhuni ndi kuziŵika pamotu, chipi chingusotopoka munkhuni zo chifukwa cha chifundizi, ndipu chinguluma Paulo kujanja ndi kukaniriya kweniko.
4 Ŵanthu wo alongoronga chineneru chachilendu ŵati awona njoka yapoyizoni ye lendi kujanja laki, angwamba kukambiskana kuti: “Munthu uyu ngwakubaya ŵanthu nadi, ndipu chinanga kuti wapona munyanja, kweni Urunji* wamuzomereza cha kuti walutirizgi kuja ndi umoyu.”
5 Iyu wangumijuliya njoka yo pamotu, ndipu yingumupweteka cha.
6 Yiwu akhazanga kuti watupengi pamwenga wafwengi mwamabuchibuchi. Ŵati alindizga kwa nyengu yitali, anguwona kuti palivi chiheni cho chitimuchitikiya ndipu yiwu angusintha maŵanaŵanu ngawu ndi kwamba kukamba kuti iyu ndi chiuta.
7 Muchigaŵa cho mwenga malu nga munthu munyaki waudindu pachirwa* cho, yo wadanikanga kuti Pabuliyo. Iyu wangutilondere umampha ndipu wangutiphwere kwa mazuŵa ngatatu.
8 Pa nyengu iyi, awisi aku Pabuliyo angugona chifukwa chakuti angufunda muliŵavu kweniso angutama pamoyu pa ndopa. Paulo wangusere munyumba mo angugona, wangupemphera, wanguŵika manja ngaki paku yiwu ndipu anguchira.+
9 Venivi vati vachitika, ŵanthu anyaki wosi pachirwa* cho wo atamanga, nawu angwamba kuza kwaku iyu ndipu waŵachizganga.+
10 Yiwu angutitumbika ndi mphasu zinandi ndipu tichisoka ulendu wapanyanja, angutipaska vosi vo takhumbikanga.
11 Pati pajumpha myezi yitatu, tingwambapu ulendu widu ndipu tingukwera sitima yo yenga ndi chikwangwani chakulembeka kuti, “Ŵana Anthulumi aku Zewu.” Sitima iyi yenga ya ku Alekizandiriya ndipu yinguma pachirwa* ichi chifukwa cha nyengu ya chipwepwi.
12 Tati tafika pajiti ku Sirakusi, tinguja kweniko kwa mazuŵa ngatatu.
13 Tati tatuwa kwenuku, tingufika ku Regiyo. Pati pajumpha zuŵa limoza kungwamba mphepu yakutuliya kumwera ndipu mawa laki tingufika ku Puteyoli.
14 Kwenuku tingusaniyaku abali ndipu angutipempha kuti tijeku kwa mazuŵa 7. Pavuli paki, tingwambapu ulendu widu wakuluta ku Roma.
15 Abali a ku Roma ŵati avwa vakukwaskana ndi isi, anguza kuzikumana nasi ku Nyumba Zitatu* ndipu anyaki angufika mpaka ku Msika wa Apiyo. Paulo wati waŵawona, wanguwonga Chiuta ndipu wanguchita chiganga.+
16 Pakumaliya paki tingufika ku Roma. Paulo wanguzomerezeka kuja yija ndi msilikali yo wamuwoneriyanga.
17 Kweni pati pajumpha mazuŵa ngatatu, wangudana ŵanthu akuzirwa pakati pa Ayuda. Ŵati awungana, wanguŵakambiya kuti: “Mwaŵanthu, abali ŵangu, chinanga kuti ndachita chinthu chechosi cha chakususkana ndi ŵanthu amtundu wangu pamwenga midawuku ya apapi ŵidu akali,+ kweni ndikuperekeka kwa Aroma nge mukayidi kutuwa ku Yerusalemu.+
18 Ŵati andifumbafumba,+ akhumbanga kundifwatuwa, pakuti pengavi chifukwa chakuti ndibayikiyi.+
19 Kweni Ayuda ŵati akana, ndinguwona kuti ndipemphi kuti Kayisara wakawuwoni so mulandu wangu.+ Kweni ndinguchita viyo chifukwa chakukhumba kumba mulandu ŵanthu amtundu wangu cha.
20 Sonu pa chifukwa chenichi, ndingupempha kuti ndiwonani namwi ndipuso ndikambiskani namwi. Pakuti cho ndamangikiya simbi izi, ntchifukwa cha chilindizga cho Ayisirayeli ŵe nachu.”+
21 Yiwu angumukambiya kuti: “Talondiyapu kalata yeyosi cha yakukwaskana ndi yiwi kutuliya ku Yudeya, ndipuso palivi mubali weyosi wakutuliya kweniko yo wakambapu chiheni chechosi chakukwaskana ndi yiwi.
22 Kweni tiwona kuti mphakwenere kuti tivwi kwaku yiwi maŵanaŵanu ngaku, pakuti cho tiziŵa ntchakuti kwekosi+ ŵanthu akamba vinthu vamampha cha vakukwaskana ndi kagulu kakugaruka kenaka.”+
23 Sonu yiwu angunozga zuŵa lakuti azikumani nayu, ndipu ŵanthu anandi anguza ko iyu wajanga. Iyu wanguŵakonkhoske nkhani yo kwamba mlenji mpaka mazulu ndipu wangupereka mwakukwana ukaboni wakukwaskana ndi Ufumu waku Chiuta ndipuso kuŵakopa ndi nkhani zakukwaskana ndi Yesu+ kutuliya mu Dangu* laku Mozesi+ kweniso mu vo achimi akulemba.+
24 Ŵanthu anyaki angwamba kugomezga vinthu vo wakambanga, penipo anyaki agomezganga cha.
25 Sonu pakuti apindananga yiwuyiwu pe, angwamba kutuwapu, kweni Paulo wanguŵakambiya fundu yimoza yakuti:
“Mzimu wakupaturika unguneneska nadi po ungukambiya apapi ŵinu akali kuporote mwa mchimi Yesaya
26 kuti, ‘Luta ku ŵanthu yaŵa ndipu ukaŵakambiyi kuti: “Mwazamukuvwa kweni mwazamuvwisa cha, mwazamuwona kweni mwazamuwonesesa cha.+
27 Chifukwa mitima ya ŵanthu yaŵa, yanonopa ndipu ndi makutu ngawu atuvwa kweni achitapu kanthu cha, ajala masu ngawu kuti aleki kuwona ndi masu ngawu, kuti aleki kuvwa ndi makutu ngawu, kuti aleki kuvwisa ndi mitima yawu, kuti aleki kung’anamuka ndipuso kuti ndileki kuŵachizga.”’+
28 Sonu ziŵani kuti utaski wakutuliya kwaku Chiuta waperekeka ku ŵanthu amitundu yinyaki+ ndipu yiwu avwisiyengi nadi.”+
29 * ——
30 Sonu wanguja kweniko kwa vyaka viŵi vamphumphu munyumba yo wajilipiriyanga yija,+ ndipu wosi wo azanga kwaku iyu waŵalondiyanga umampha.
31 Iyu waŵapharazgiyanga Ufumu waku Chiuta ndipuso wasambizanga vakukwaskana ndi Ambuya Yesu Khristu. Wachitanga ivi ndi wanangwa ukulu wakulongoro*+ kwambula chakutondekesa chechosi.
Mazu Ngam'mphata
^ Anyaki akamba kuti, “chilumba.”
^ Pamwenga kuti, “Ŵanthu akweniko.”
^ Mu Chigiriki Di′ke, viwoneka kuti mazu yanga ngangang’anamuwa chiuta munthukazi yo waweze kuti paje urunji, pamwenga ndi mazu ŵaka ngo ngakamba va urunji.
^ Anyaki akamba kuti, “pachilumba.”
^ Anyaki akamba kuti, “pachilumba.”
^ Anyaki akamba kuti, “chilumba.”
^ Yanga ngenga malu ngakuryiyaku ndi kupumuliyaku.
^ Wonani Mazu ngo Ngakonkhoskeka.
^ Wonani Fundu Zakukumaliya A3.
^ Pamwenga kuti, “ndi chiganga chosi chakulongoro.”
