Machitidu nga Akutumika 24:1-27
24 Pati pajumpha mazuŵa ngankhondi, wasembi mura Hananiya+ wanguza ndi anyaki mwa ŵara kweniso Teritulo, munthu wakuziŵa kulongoro pa gulu* ndipu angukambiya nduna mulandu wo ambanga Paulo.+
2 Wati wadanika, Teritulo wangwamba kumba mulandu Paulo ndipu wangukamba kuti:
“Tija mwachimangu chifukwa chaku yimwi kweniso vinthu vinandi visintha mu mtundu widu chifukwa chakuti muwone limu patali.
3 Venivi titiviwona nyengu zosi kweniso kwekosi, ndipu titikuwongani ukongwa Yimwi Wakutumbikika Felekisi.
4 Kweni kuti ndileki kulutirizga kukumaliyani nyengu, ndipempha wezi winu ukulu kuti mundivwisiyi kwa nyengu yimanavi.
5 Pakuti tasaniya kuti munthu uyu ntchideru,*+ ndipu wachitiska kuti ŵanthu ayukiyengi boma+ pakati pa Ayuda mucharu chosi chapasi kweniso ndiyu walongozga kagulu kakugaruka ka ŵanthu a ku Nazareti.+
6 Iyu wakhumbanga so kukazuzga nyumba yakusopiyamu, sonu tingumuko.+
7 * ——
8 Asani mungamufumba mwaŵeni, muvwengi vinthu vosi vo takamba vakukwaskana ndi mulandu waki.”
9 Teritulo wati wakamba venivi, Ayuda nawu so anguseleriyapu kumuyukiya ndipu azomerezanga kuti vinthu ivi vauneneska.
10 Nduna yo yati yakambiya Paulo mwakumukonozga ndi mutu, Paulo wangumuka kuti:
“Ndiziŵa kuti mwaja muchiyeruzga mtundu uwu kwa vyaka vinandi, mwaviyo nde wakunozgeka kujivikiliya.+
11 Asani mungafufuza, musimikizengi kuti mazuŵa 12 ngajumpha cha kutuliya po ndingukwere ku Yerusalemu kuchisopa.+
12 Ndipu angundisaniya ndichipindana ndi munthu weyosi cha pamwenga kwambisa vivulupi munyumba yakusopiyamu, mumasinagogi kweniso mutawuni yosi.
13 Ndipuso palivi ukaboni wo angakupaskani pa vinthu vo sonu atindimba navu mulandu.
14 Kweni ndizomera kwaku yimwi kuti nge mo kagulu ko atikadana kuti kakugaruka kachitiya, nani ndichitiya uteŵeti wakupaturika Chiuta wa apapi ŵangu akali mwakukoliyana ndi nthowa yeniyi,+ pakuti ndigomezga vosi vo vikulembeka mu Dangu* ndipuso mu vo achimi akulemba.+
15 Ndipu nde ndi chilindizga mwaku Chiuta nge cho ŵanthu yaŵa nawu ŵe nachu, kuti kwazamuja chiyuka+ cha ŵanthu arunji ndi ambula urunji.+
16 Chifukwa cha venivi, nditesesa kuti ndije ndi njuŵi yamampha* pa masu paku Chiuta ndi ŵanthu.+
17 Sonu pavuli pa vyaka vinandiku, ndinguza kuzipereka mphasu zalisungu+ ku mtundu wangu kweniso kuzipereka sembi.
18 Ndichichita vinthu venivi, angundisaniya munyumba yakusopiyamu+ ndachita kali mwambu wakujitowesa, kweni ndenga ndi chigulu cha ŵanthu cha ndipuso ndayambisanga viwawa cha. Kweni penga Ayuda anyaki akutuliya muchigaŵa cha Asia
19 wo ŵenga akwenere kuza pa masu pinu kuzindimba mulandu asani ŵe nani ndi chifukwa.+
20 Pamwenga ŵanthu wo ŵe panu akambi ŵija chinthu chiheni cho anguchisaniya mwaku ini po ndenga pa masu pa Mphara Yikulu ya Milandu.*
21 Panyaki angandisaniya ndi mulandu pa chinthu chimoza pe, chakuti nde pakati pawu ndingudaniriza kuti: ‘Ndiyeruzgika pa masu pinu msanawale chifukwa cha chilindizga chakuti akufwa azamuyuskika!’”+
22 Kweni chifukwa chakuti Felekisi waziziŵanga umampha fundu zakukwaskana ndi Nthowa Yeniyi,+ wangumika mulandu ndipu wangukamba kuti: “Ndazamuyeruzga nkhani zinu asani Lusiya, mura wa asilikali waza.”
23 Ndipu wangulamula mura wa gulu la asilikali kuti munthu uyu amumangi, kweni amupaskeku wanangwa ndipuso kuti anyaki aŵazomerezengi kuzimuphwere.
24 Pati pajumpha mazuŵa, Felekisi wanguza limoza ndi muwolu waki Durusila yo wenga Myuda. Felekisi wangudanisa Paulo ndipu wamuvwisiyanga wachilongoro vakukwaskana ndi kugomezga Khristu Yesu.+
25 Kweni Paulo wachilongoro vakukwaskana ndi urunji, kujiko ndipuso cheruzgu cho chituza,+ Felekisi wanguchita mantha ndipu wangumuka kuti: “Pasonu panu luta dankha, kweni asani ndazisaniya nyengu, ndazakukudana so.”
26 Pa nyengu iyi, Felekisi wakhazanga kuti Paulo wamupaskengi ndalama. Mwaviyo wamudanisanga kaŵikaŵi ndipu wakambiskananga nayu.
27 Kweni pati pajumpha vyaka viŵi, Porokiyo Fesito wangusere mumalu mwaku Felekisi. Ndipu chifukwa chakuti Felekisi wakhumbanga kukondwesa Ayuda,+ wangumufwatuwa cha Paulo.
Mazu Ngam'mphata
^ Pamwenga kuti, “loya.”
^ Pamwenga kuti, “ngwakusuzga ukongwa.”
^ Wonani Fundu Zakukumaliya A3.
^ Wonani Mazu ngo Ngakonkhoskeka.
^ Pamwenga kuti, “yambula kalema.”
^ Mazu ngaki chayingu, “Sanihedirini.”
