Machitidu nga Akutumika 23:1-35
23 Paulo wachilereseska Mphara Yikulu ya Milandu,* wangukamba kuti: “Mwaŵanthu, abali, ndachita vinthu ndi njuŵi yamampha+ pa masu paku Chiuta kufika msanawale.”
2 Wati wakamba venivi, wasembi mura Hananiya wangulamula ŵanthu wo anguma pafupi ndi Paulo kuti amupumi kumulomu.
3 Sonu Paulo wangumukambiya kuti: “Chiuta wakupumengi yiwi, yiwi chimati chakupakika layimu. Kumbi upenja kundiyeruzga mwakukoliyana ndi Dangu,* penipo utuswa so Dangu* mwakulamula kuti andipumi?”
4 Wo anguma pafupi ndi Paulo, angukamba kuti: “Kumbi unyoza wasembi mura waku Chiuta?”
5 Paulo wangukamba kuti: “Abali, ndinguziŵa cha kuti ngwasembi mura. Chifukwa Malemba ngakamba kuti, ‘Ungamunyozanga cha munthu yo walamuliya ŵanthu ŵaku.’”+
6 Sonu Paulo wati waziŵa kuti anyaki mwa ŵanthu a mu gulu lo ŵenga Asaduki penipo anyaki ŵenga Afarisi, wangudaniriza mu Mphara Yikulu ya Milandu* kuti: “Mwaŵanthu, abali, ini nde Mfarisi,+ mwana wa Afarisi. Ndiyeruzgika chifukwa cha chilindizga chakuti akufwa azamuyuskika.”
7 Wati wakamba venivi, Afarisi ndi Asaduki angwamba kususkana ndipu gulu lo lingugaŵikana.
8 Pakuti Asaduki akamba kuti kulivi chiyuka, angelu pamwenga mzimu, kweni Afarisi azomereza* kuti vosi ivi viliku.+
9 Sonu penga chimtimbaheka chikulu ndipu anyaki mwa alembi a mu gulu la Afarisi angusoka ndi kwamba kususka ndi kukalipa kuti: “Titimusaniya ndi kaheni kekosi cha munthu uyu, kweni asani mzimu pamwenga mungelu wangulongoro ndi iyu . . .”+
10 Ŵati apindana ukongwa, mura wa asilikali wanguwopa kuti Paulo wapalurikengi ndi ŵanthu wo, ndipu wangulamula asilikali kuti akamukwatapuwi pakati pawu ndi kuza nayu kunyumba ya asilikali.
11 Usiku wa zuŵa lo, Ambuya anguma pafupi nayu ndi kumukambiya kuti: “Khwima mtima!+ Pakuti nge mo wapereke ukaboni mwakukwana wakukwaskana ndi ini mu Yerusalemu, ndimu so utenere kuchichitiya ku Roma.”+
12 Sonu kwati kwacha, Ayuda angumunozge chiŵembu ndipu anguchita kulapizga* kuti aryengi pamwenga kumwa chechosi cha mpaka po abayiya Paulo.
13 Penga anthulumi akujumpha 40 wo angulapizga viyo.
14 Ŵanthu ŵenaŵa anguluta kwa ŵara ŵa asembi ndipuso kwa ŵara kuchikamba kuti: “Tosi pamoza talapizga* kuti tiryengi chechosi cha mpaka po tabayiya Paulo.
15 Sonu yimwi limoza ndi Mphara Yikulu ya Milandu* mukambiyi mura wa asilikali kuti wazi nayu kwaku yimwi nge kuti mukhumba kuvwisisa mulandu waki. Kweni wechendafiki pafupi, tazamuja akunozgeka kuti timubayi.”
16 Kweni mwana wa mzichi waku Paulo wanguvwa kuti apangana kuchimukhaza panthowa, ndipu wangusere munyumba ya asilikali kuchikamba venivi kwaku Paulo.
17 Sonu Paulo wangudana yumoza wa ŵara a magulu nga asilikali ndi kukamba kuti: “Lutani ndi mnyamata uyu kwa mura wa asilikali, pakuti we ndi nkhani yakuti wamukambiyi.”
18 Mwaviyo wangumuto ndi kuluta nayu kwa mura wa asilikali ndipu wangukamba kuti: “Paulo mukayidi, wangundidana ndi kundipempha kuti ndizi ndi mnyamata uyu kwaku yimwi, chifukwa we ndi nkhani yakuti wakukambiyeni.”
19 Mura wa asilikali wangumuko pajanja ndi kuluta nayu pamphepeti ndipu wangumufumba kuti: “Ndi nkhani wuli yo ukhumba kundikambiya?”
20 Iyu wangukamba kuti: “Ayuda akoliyana kuti akupempheni kuti mawa Paulo waluti ku Mphara Yikulu ya Milandu* nge kuti akhumba kuchivwisisa mulandu waki.+
21 Kweni angakunyengeliyaningi cha, chifukwa anthulumi ŵawu akujumpha 40 akhumba kumukhaza panthowa ndipu alapizga* kuti aryengi pamwenga kumwa chechosi cha mpaka po amubayiya.+ Ndipu anozgeka kali, alindizga ŵaka kuti muŵazomerezi.”
22 Sonu mura wa asilikali wangukambiya mnyamata yo kuti wakengi. Wechendaluti wangumulamula kuti: “Ungakambiyanga munthu weyosi cha kuti wandikambiya nkhani yeniyi.”
23 Ndipu wangudana ŵaŵi mwa ŵara a magulu nga asilikali ndi kuŵakambiya kuti: “Tumani asilikali 200 kuti ayendi kuluta ku Kayisareya pa ora lachitatu la usiku,* limoza ndi asilikali 70 apamahachi kweniso asilikali 200 amikondu.
24 Kweniso muto mahachi ngakuti Paulo wakwerepu kuti wakafiki umampha kwa Nduna Felekisi.”
25 Ndipu wangulemba kalata yakuti:
26 “Ini Kilaudiyo Lusiya, nditikulembiyani yimwi Wakutumbikika Nduna Felekisi: Timoneni!
27 Munthu uyu wangukoleka ndi Ayuda ndipu ŵenga pafupi kumubaya, kweni ndinguza mwaliŵi ndi asilikali ŵangu kuzimutaska+ chifukwa ndinguvwa kuti ndi Mroma.+
28 Ndinguza nayu ku Mphara Yikulu ya Milandu* ya Ayuda kuti ndiziŵi chifukwa cho atimumbiya mulandu.+
29 Ndasaniya kuti atimumba mulandu wakukwaskana ndi Dangu* lawu,+ kweni palivi mulandu wakuti wangabayikiya pamwenga kuŵikika mujeri.
30 Sonu pakuti ndavwa va chiŵembu cho amunozge,+ ndamutumiza kwaku yimwi ndipuso ndalamula wo atimumba mulandu kuti azilongoro pa masu pinu.”
31 Mwaviyo, asilikali ŵenaŵa, anguto Paulo+ mwakukoliyana ndi vo anguŵalamula ndipu anguluta nayu ku Antipatiri ndi usiku.
32 Mawa laki anguzomereza asilikali apamahachi kuti aluti nayu kweni asilikali anyaki wosi anguwere kunyumba ya asilikali.
33 Asilikali apamahachi angusere mu Kayisareya, angupereka kalata kwa nduna ndipuso angupereka Paulo.
34 Sonu Nduna Felekisi yinguŵerenga kalata yo kweniso yingufumba kuti Paulo wakutuliya kuchigaŵa nichi ndipu yinguvwa kuti wenga waku Kilikiya.+
35 Iyu wangukamba kuti: “Asani ŵanthu wosi wo atikumba mulandu afika,+ ndazamuvwisiya umamphaumampha mulandu waku.” Ndipu wangulamula kuti Paulo amusungi munyumba ya Fumu Herodi.
Mazu Ngam'mphata
^ Mazu ngaki chayingu, “Sanihedirini.”
^ Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Mazu ngaki chayingu, “Sanihedirini.”
^ Pamwenga kuti, “apharazga pakweru.”
^ Pamwenga kuti, “kujitemba.”
^ Pamwenga kuti, “tajitemba.”
^ Mazu ngaki chayingu, “Sanihedirini.”
^ Mazu ngaki chayingu, “Sanihedirini.”
^ Pamwenga kuti, “ajitemba.”
^ Cha mu ma 9 koloku usiku.
^ Mazu ngaki chayingu, “Sanihedirini.”
^ Wonani Mazu ngo Ngakonkhoskeka.
