Machitidu nga Akutumika 22:1-30
22 “Mwaŵanthu, abali ŵangu ndipuso ada, vwisiyani mazu ngangu ngakujivikiliya.”+
2 Ŵati awona kuti wakambiskana nawu mu Chiheberi, angujaliya limu cheticheti ndipu iyu wangukamba kuti:
3 “Ini nde Myuda,+ ndikuwiya ku Tariso wa ku Kilikiya,+ kweni ndikusambizika ndi Gamaliyeli+ mutawuni yeniyinu. Ndikusambizika kulondo Dangu* la apapi akali+ kwambula kulekaku kanthu kekosi kweniso ndateŵetiyanga Chiuta mwaphamphu nge mo mosi muchitiya sonu.+
4 Ndatombozganga ŵanthu a Nthowa Yeniyi mpaka kuŵabaya, ndipu ndaŵamanganga ndi kuŵaponya mujeri, anthulumi ndi anthukazi viyo.+
5 Ndipu wasembi mura limoza ndi ŵanthu wosi a mu wupu wa ŵara angandichitiya ukaboni. Yiwu ndiwu so angundipaska makalata kuti ndiluti kwa abali ŵidu ku Damasiko ndipu ndalutanga kweniko kuti nkhato wosi wo ŵenga kweniko, nkhaŵamangi ndi kuza nawu ku Yerusalemu kuti azilangiki.
6 “Kweni ndichiluta, nde pafupi kufika ku Damasiko, cha kumsana, mwamabuchibuchi ukweru wanthazi wakutuliya kuchanya unguŵala posi po ndenga.+
7 Ndinguwa pasi ndipu ndinguvwa mazu ngakuti: ‘Saulo, Saulo, utinditombozgiyanji?’
8 Ini ndingumuka kuti: ‘Ndimwi ayani Ambuya?’ Iyu wangundikambiya kuti: ‘Ndini Yesu wa ku Nazareti yo utimutombozga.’
9 Sonu ŵanthu wo ndenga nawu anguwuwona ukweru kweni angungavwa cha mazu nga munthu yo walongoronga nani.
10 Pavuli paki ndingukamba kuti: ‘Ndichitenji Ambuya?’ Ambuya angundikambiya kuti: ‘Soka, sere mu Damasiko ndipu wamukuvwa chechosi cho chanozgeka kuti uchiti.’+
11 Kweni pakuti ndawonanga chechosi cha chifukwa cha unkhankhu wa ukweru wo, ŵanthu wo ndenga nawu anguchita kundiko pajanja mpaka ndinguchifika ku Damasiko.
12 “Pavuli paki, Hananiya munthu yo mwakukoliyana ndi Dangu* wenga wakwanja kusopa Chiuta, mweniyo Ayuda wosi a kweniko akambanga vinthu vamampha vakukwaskana ndi iyu,
13 wanguza kwaku ini. Iyu wanguma pafupi ndi ini ndipu wangundikambiya kuti: ‘Saulo mubali wangu, yamba so kuwona!’ Nyengu yeniyo ndingulereska ndipu ndingumuwona.+
14 Iyu wangukamba kuti: ‘Chiuta wa apapi ŵidu akali wakusankha kuti uziŵi khumbu laki ndi kuwona munthu murunji+ kweniso kuti uvwi mazu nga pamulomu paki.
15 Pakuti uŵengi kaboni waki ku ŵanthu wosi pa vinthu vo wawona ndi kuvwa.+
16 Sonu usweriyanji? Soka, ubatiziki ndipu usambi kuti utuzgi maubudi ngaku+ mwakudaniya pa zina laki.’+
17 “Kweni ndati ndawere ku Yerusalemu,+ po ndapempheranga munyumba yakusopiyamu ndinguchita nge ndagona
18 ndipu ndinguwona Ambuya achindikambiya kuti: ‘Tuwamu liŵi mu Yerusalemu pakuti azomerengi cha ukaboni waku wakukwaskana ndi ini.’+
19 Ini ndingukamba kuti: ‘Ambuya, yiwu ŵeneku aziŵa umampha kuti ini ndaponyanga mujeri wosi wo agomezganga mwaku yimwi kweniso ndaŵakhwechuwanga mumasinagogi ngakupambanapambana.+
20 Ndipuso ndopa zaku Stefano kaboni winu zichipopoma, ndinguma penipo ndipu ndazomerezanga ndi kuphwere malaya ngakubwalu nga ŵanthu wo amubayanga.’+
21 Kweni Ambuya angundikambiya kuti: ‘Luta, chifukwa ndikutumengi kutali ku ŵanthu amitundu yinyaki.’”+
22 Sonu yiwu anguvwisiya mpaka po wangukambiya mazu ngenanga. Pavuli paki angudaniriza ukongwa kuti: “Mutuzgenipu pacharu munthu waviyo, pakuti ngwakwenere cha kuja ndi umoyu!”
23 Chifukwa chakuti adanirizanga ukongwa, aponyanga muchanya malaya ngawu ngakubwalu ndipuso afulunthuliyanga fuvu muchanya,+
24 mura wa asilikali wangulamula kuti Paulo asere nayu munyumba ya asilikali. Kweniso wangukamba kuti amufumbi achimukhwechuwa kuti waziŵi chifukwa cheneku cho chachitiska kuti ŵanthu amuhohotiyengi viyo.
25 Kweni ŵati amulambalika kuti amukhwapi, Paulo wangufumba mura wa gulu la asilikali yo wanguma penipo kuti: “Kumbi dangu litikuzomerezani kukhwechuwa Mroma* mwechendamumbi mulandu?”*+
26 Sonu mura wa gulu la asilikali wati wavwa venivi wanguluta kuchikambiya mura wa asilikali kuti: “Mukhumba kuchitanji? Munthu uyu ndi Mroma.”
27 Sonu mura wa asilikali wanguza pafupi ndi Paulo ndipu wangumukambiya kuti: “Andikambiyi, kumbi ndiwi Mroma?” Iyu wangumuka kuti: “Hinya.”
28 Mura wa asilikali wangukamba kuti: “Ini ndikuchita kugula ndi ndalama zinandi wanangwa wakuti ndije zika ya Roma.” Kweni Paulo wangukamba kuti: “Kweni ini wangu ngwakuwa nawu.”+
29 Nyengu yeniyo, ŵanthu wo akhumbanga kumufumba achimutombozga, angumuleka ndipu mura wa asilikali wanguchita mantha wati waziŵa kuti Paulo ndi Mroma kweniso wati wawona kuti wamumanga simbi.+
30 Sonu mawa laki, wangumufwatuwa ndi kulamula ŵara ŵa asembi ndi wosi a mu Mphara Yikulu ya Milandu* kuti awungani, pakuti wakhumbanga kuziŵa chifukwa cheneku cho Ayuda ambiyanga mulandu Paulo. Iyu wanguza ndi Paulo ndi kumumika pakati pawu.+
Mazu Ngam'mphata
^ Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Pamwenga kuti, “zika ya ku Roma.”
^ Pamwenga kuti, “mwechendaziŵi cho wananga.”
^ Mazu ngaki chayingu, “Sanihedirini.”
