Machitidu nga Akutumika 18:1-28
18 Pavuli paki, Paulo wangutuwaku ku Atene ndipu wanguluta ku Korinto.
2 Kwenuku, wangusaniya Myuda munyaki yo wadanikanga kuti Akula+ yo pa nyengu iyi ndipu wafika ŵaka kutuwa ku Itale limoza ndi muwolu waki Purisila. Yiwu angutuwaku ku Itale chifukwa Kilaudiyo wangulamula kuti Ayuda wosi atuweku ku Roma. Sonu Paulo wanguluta kwaku yiwu,
3 ndipu chifukwa chakuti agwiranga ntchitu yakuyanana, wajanga kunyumba kwawu. Yiwu agwiriyanga limoza ntchitu,+ pakuti wosi ntchitu yawu yenga yakusona mahema.
4 Paulo wakambanga nkhani* musinagogi+ pa sabata peposi+ ndipu wakopanga Ayuda kweniso Agiriki.
5 Sonu Sila+ ndi Timote+ ŵati aza kutuwa ku Makedoniya, Paulo wangutangwanika ndi ntchitu yakupharazga mazu. Iyu waperekanga ukaboni kwa Ayuda wakusimikiza kuti Yesu ndiyu Khristu.+
6 Yiwu ŵati alutirizga kumususka ndi kumunyoza, wangukung’untha malaya ngaki+ ndipu wanguŵakambiya kuti: “Ndopa zinu zije pamitu yinu.+ Ini ndilivi mulandu.+ Ndipu kwamba sonu, ndilutengi ku ŵanthu amitundu yinyaki.”+
7 Sonu wangutuwaku kwenuku* ndipu wanguluta kunyumba ya munthu munyaki wakusopa Chiuta yo wadanikanga kuti Titiyasi Yusito, mweniyo nyumba yaki yenga pafupi ndi sinagogi.
8 Kweni Khrisipu,+ mulongozgi wa sinagogi limoza ndi a munyumba yaki wosi, anguja akusambira ŵa Ambuya. Ndipu ŵanthu anandi ku Korinto wo avwanga mazu ajanga akusambira ndipuso abatizikanga.
9 Kweniso Ambuya angukambiya Paulo mu chiwona ndi usiku kuti: “Ungawopanga cha, lutirizga kulongoro, ungajanga cheti cha,
10 pakuti nde nawi,+ palivi munthu yo wakuyukiyengi kuti wakupweteki, ndipuso nde ndi ŵanthu anandi mutawuni iyi.”
11 Mwaviyo wanguja kweniko kwa chaka ndi myezi 6. Iyu waŵasambizanga mazu ngaku Chiuta.
12 Pa nyengu yo Galiyo wenga nduna* ya ku Akaya, Ayuda angupangana kuti ayukiyi Paulo ndipu anguluta nayu kumpandu wakuyeruzgiyapu milandu.
13 Yiwu akambanga kuti: “Munthu uyu wakopa ŵanthu kuti asopengi Chiuta mu nthowa yo yisuskana ndi dangu.”
14 Kweni Paulo we pafupi kwamba kulongoro, Galiyo wangukambiya Ayuda kuti: “Mwaŵayuda, asani panguchitika chinthu chinyaki chiheni pamwenga mulandu ukulu, patingi paŵengi pakwenere kuti ndivwisiyi mwakuphwere.
15 Kweni asani mulimbana pa mazu, mazina pamwenga dangu linu,+ mbwenu malanani navu mwaŵeni. Ndikhumba cha kuyeruzga nkhani zenizi.”
16 Wati wakamba venivi, wanguŵadikisa kumpandu wakuyeruzgiyapu milandu.
17 Sonu wosi anguko Sositeni,+ mulongozgi wa sinagogi ndipu angwamba kumupuma panthazi pa mpandu wakuyeruzgiyapu milandu. Kweni vichichitika vosi venivi, Galiyo walereskangaku ŵaka.
18 Kweni Paulo wati waja kweniko kwa mazuŵa nganandiku, wangulayirana ndi abali ndipu wangwenda ulendu wapanyanja kuluta ku Siriya. Purisila ndi Akula anguluta nayu. We ku Kenkereya+ wangusenga sisi laki chifukwa wangulapizga.
19 Sonu angufika ku Efeso ndipu anyaki wanguŵasiya, kweni iyu wangusere musinagogi ndi kwamba kukambiskana ndi Ayuda.+
20 Chinanga kuti angumupempha kuti wajeku kwa nyengu yitali, iyu wangukana.
21 Mumalu mwaki, wanguŵalayira ndi kuŵakambiya kuti: “Ndazamukuza so asani Yehova* wakhumba.” Sonu wangwenda ulendu wapanyanja kutuwa ku Efeso
22 ndipu wangusikiya ku Kayisareya. Iyu wanguluta* ndipu wangutawuzga mpingu, pavuli paki wangusikiya ku Antiyoke.+
23 Wati wajaku kwa kanyengu, wangusoka ndi kuluta mumalu ngakupambanapambana mucharu cha Galatiya ndi Furujiya.+ Iyu wachiskanga akusambira wosi.+
24 Sonu Myuda munyaki yo wadanikanga kuti Apolo+ wa ku Alekizandiriya, wanguza ku Efeso. Iyu wenga munthu wakuziŵa kuŵereŵeta kweniso wangaziŵanga umampha ukongwa Malemba.
25 Munthu mwenuyu wangusambizika* nthowa yaku Yehova.* Ndipu chifukwa chakuti wakolenga ndi mzimu, walongoronga ndi kusambiza mwauneneska vinthu vakukwaskana ndi Yesu, kweni waziŵanga ŵaka ubatizu waku Yohane pe.
26 Iyu wangwamba kulongoro mwachiganga musinagogi ndipu Purisila ndi Akula+ ŵati amuvwa, angumuto ndipu angumukonkhoske mwauneneska nthowa yaku Chiuta.
27 Kweniso chifukwa chakuti wakhumbanga kuti wayambukiyi ku Akaya, abali angulembe akusambira ndipu anguŵapempha kuti amulonde umampha. Sonu wati wafika kweniko wanguwovya ukongwa ŵanthu wo anguja akusambira chifukwa cha wezi ukulu waku Chiuta.
28 Iyu waŵasimikiziyanga pakweru ndipuso mwanthazi Ayuda kuti anangisanga, ndipu waŵalongonga kutuliya mu Malemba kuti Yesu ndiyu Khristu.+
Mazu Ngam'mphata
^ Pamwenga kuti, “wakambiskananga nawu.”
^ Kung’anamuwa kusinagogi.
^ Nduna yachiroma yo yalamuliyanga chigaŵa. Wonani Mazu ngo Ngakonkhoskeka.
^ Wonani Fundu Zakukumaliya A5.
^ Watenere kuti wangukwere ku Yerusalemu.
^ Pamwenga kuti, “wangusambizika mwapamulomu.”
^ Wonani Fundu Zakukumaliya A5.
