Machitidu nga Akutumika 16:1-40
16 Sonu wangufika ku Debe ndi ku Lusitara.+ Ndipu kweniko kwenga wakusambira yo wadanikanga kuti Timote+ mweniyo anyina ŵenga Ayuda akugomezga, kweni awisi ŵenga Agiriki.
2 Ndipu Abali a ku Lusitara kweniso a ku Ikoniyo akambanga vinthu vamampha vakukwaskana ndi iyu.
3 Paulo wangulongo kuti wakhumbisiska kuluta ndi Timote, ndipu wangumuto ndi kumudumuwa chifukwa cha Ayuda a muvigaŵa venivo,+ pakuti wosi aziŵanga kuti awisi mbagiriki.
4 Achiyenda mumatawuni, aŵapaskanga marangu ngakuti agwiriskiyengi ntchitu mwakukoliyana ndi vo akutumika ndi ŵara a ku Yerusalemu angusankha.+
5 Sonu venivi vinguchitiska kuti mipingu yilutirizgi kuja ndi chivwanu chakukho ndipuso chiŵerengeru cha ŵanthu chasazgikiyangaku zuŵa ndi zuŵa.
6 Kweniso yiwu angupitiya ku Furujiya ndi ku Galatiya,+ pakuti mzimu wakupaturika unguŵakaniza kupharazga mazu muvigaŵa va ku Asia.
7 Ndipuso ŵati afika ku Misiya, akhumbisiskanga kuti aluti ku Bituniya+ kweni mzimu waku Yesu unguŵazomereza cha.
8 Mwaviyo angujumphiliya ku* Misiya ndipu anguluta ku Trowa.
9 Ndi usiku Paulo wanguwona chiwona. Iyu wanguwona munthu wa ku Makedoniya wama penipo ndipu wamupemphanga kuti: “Yambukiyani kunu ku Makedoniya, muzitiwovyi.”
10 Paulo wati wawona ŵaka chiwona chenichi, tinguwona kuti tiluti ku Makedoniya chifukwa tinguŵanaŵana kuti Chiuta watidana kuti tikaŵapharazgiyi uthenga wamampha.
11 Sonu tingwenda ulendu wapanyanja kutuwa ku Trowa kuluta ku Samotirake kwambula kuma so kunyaki, kweni mawa laki tingufika ku Neyapoli.
12 Tati tatuwa uku tinguluta ku Filipi,+ tawuni yo yalamulikanga ndi Aroma ndipu yenga yakuzirwa ukongwa muchigaŵa cha Makedoniya. Kwenuku tingujaku kwa mazuŵa nganandiku.
13 Pa zuŵa la Sabata tinguluta kubwalu kwa geti, mumphepeti mwa msinji, kweniko taŵanaŵananga kuti kwe malu ngakupempheriyaku. Ndipu tinguja pasi ndi kwamba kukambiskana ndi anthukazi wo anguwungana kweniko.
14 Ndipu munthukazi munyaki wakusopa Chiuta yo wadanikanga kuti Lidiya, wa ku Tiyatira,+ yo wagulisanga vakuvwala vapepo, wavwisiyanga ndipu Yehova* wangujula mtima waki kuti wavwisi vo Paulo wakambanga.
15 Sonu iyu ndi ŵanthu a munyumba yaki ŵati abatizika,+ wangutipempha kuti: “Asani mwawona kuti nde wakugomezgeka kwaku Yehova,* tiyeni mukaje kunyumba kwangu.” Ndipu wangutichichizga kuti tiluti pe.
16 Sonu tichiluta kumalu ngakupempheriyaku, msungwana wantchitu yo wenga ndi chiŵanda cho chamuwovyanga kuti waloskengi,+ wangukumana nasi. Vo waloskanga* vawovyanga mabwana ngaki kuti ngasaniyengi phindu linandi.
17 Msungwana uyu wangulutirizga kulondo Paulo ndi isi ndipu wadanirizanga kuti: “Ŵanthu yaŵa mbakapolu aku Chiuta Wapachanya Limu+ ndipu atikupharazgiyani nthowa ya utaski.”
18 Msungwana mwenuyu wangulutirizga kuchita venivi kwa mazuŵa nganandi. Pakumaliya, Paulo wanguvuka navu ndipu wangung’anamuka ndi kukambiya chiŵanda cho kuti: “Nditikulamula mu zina laku Yesu Khristu kuti utuwemu mwaku iyu.” Ndipu chiŵanda cho chingutuwa nyengu yeniyo.+
19 Sonu mabwana nga msungwana yo ngati ngawona kuti nthowa yawu yakusaniriya phindu yamala,+ nganguko Paulo ndi Sila ndipu anguŵakwekwete kumsika kwa alongozgi.+
20 Ŵati aluta nawu ku ŵaraŵara a boma, angukamba kuti: “Ŵanthu yaŵa atimbanyizga ukongwa tawuni yidu.+ Yiwu Mbayuda,
21 mbwenu atitipharazgiya midawuku yambula kuzomerezeka kuyitole pamwenga kuyichita, penipo isi te Aroma.”
22 Chigulu chosi cha ŵanthu chinguŵayukiya ndipu ŵaraŵara a boma anguŵakeruliya malaya ngawu ndi kulamula kuti aŵakhwapi vikoti.+
23 Ŵati aŵakhwapa vikoti vinandi, anguŵaponya mujeri ndipu angulamula mulonda wa jeri kuti wawonesesi kuti angathaŵanga cha.+
24 Chifukwa cha venivi, anguŵaponya muchipinda chamukati ndipu maphazi ngawu angungamanga mumatangaza.
25 Kweni chapakati pa usiku, Paulo ndi Sila apempheranga ndi kumba sumu zakuthamika Chiuta+ ndipu akayidi anyawu aŵavwanga.
26 Mwamabuchibuchi kunguchitika chidilirisi ndipu fawundeshoni ya jeri yingusukunyika. Visasa navu vingujulika nyengu yeniyo, ndipu simbi za mukayidi weyosi zingufwatuka.+
27 Mulonda wa jeri wati wayuka ndi kuwona kuti visasa vakujula, wangusolo lipanga laki ndipu wakhumbanga kujibaya chifukwa waŵanaŵananga kuti akayidi athaŵa.+
28 Kweni Paulo wangudaniriza ukongwa kuti: “Leka kujipweteka, tosi te mwenimunu!”
29 Sonu iyu wangupempha vakumbulikiya, wangusere muchipinda cho liŵiliŵi, ndipu chifukwa chakuti wambwambwanthiyanga ukongwa, wanguwa panthazi paku Paulo ndi Sila.
30 Wanguŵatuzgiya kubwalu ndi kukamba kuti: “Mabwana, nditenere kuchitanji kuti nditaskiki?”
31 Paulo ndi Sila angumukambiya kuti: “Gomezga mwa Ambuya Yesu ndipu yiwi ndi a munyumba yaku mutaskikengi.”+
32 Pavuli paki angulongoro nayu mazu ngaku Yehova* limoza ndi a munyumba yaki wosi.
33 Sonu wanguŵato ndi usiku mu ora lenilo ndipu wanguchiŵasuka vilonda vawu. Pavuli paki, iyu ndi a munyumba yaki angubatizika nyengu yeniyo.+
34 Wanguŵasereza munyumba yaki ndipu wanguŵaŵikiya chakurya pathebulu. Iyu wangukondwa ukongwa limoza ndi a munyumba yaki chifukwa sonu wangugomezga mwaku Chiuta.
35 Kwati kwacha, ŵaraŵara a boma angutuma asilikali kuti akakambi kuti: “Afwatuweni ŵanthu ŵa.”
36 Mulonda wa jeri wangupereka uthenga wo kwaku Paulo kuti: “Ŵaraŵara a boma atuma ŵanthu kuti mosi mwaŵaŵi mufwatuliki. Sonu tuwani ndi kuluta mu chimangu.”
37 Kweni Paulo wanguŵakambiya kuti: “Angutikhwechuliya pakweru kwambula kutiyeruzga* chinanga kuti te Aroma.+ Kumbi sonu akhumba kutituzga mujeri mwachisisi? Vingachitika cha venivo! Azi ŵeneku, azitituzgi.”
38 Asilikali anguchikamba mazu ngenanga ku ŵaraŵara a boma ndipu yiwu anguchita mantha ukongwa chifukwa chakuvwa kuti ŵanthu wo ŵenga Aroma.+
39 Sonu yiwu anguza ndipu anguŵaŵeyere. Pavuli paki anguŵatuzga ndi kuŵapempha kuti atuwemu mutawuni yo.
40 Kweni ŵati atuwa mujeri, anguluta kunyumba yaku Lidiya ndipu ŵati awona abali, anguŵachiska+ pavuli paki angutuwaku.
Mazu Ngam'mphata
^ Pamwenga kuti, “angujumpha mu.”
^ Wonani Fundu Zakukumaliya A5.
^ Wonani Fundu Zakukumaliya A5.
^ Pamwenga kuti, “Vo wakambiyanga limu.”
^ Wonani Fundu Zakukumaliya A5.
^ Pamwenga kuti, “kutimba mulandu.”
